35 ¹ Tênb-Hungh bux Ya-côpv, coong, "nyoongz quef tyuv ninyh tauv Bê-tên, yămz woa, njăpc ah nomz tync nongc congx Zâu, six Tênb-Hungh hynđ yangh phunz mâyh phătc, mâyh tyuv gâyh mâyh nyăngz tah Ê-sau, ninyh yămz woax nomz tync." ² Ya-côpv, coong bux nănh nyăngz pyau munh, cloon lêpc nănh woax đomc munh, nyâuh six zuc quanyf nzuf pitc stingx munh nyăngz miuc hanyh, stav wâyx tuz bix wănc gwuyz quav zef gôh." ³ Pănh six zuc gâyh nâyx nomz tync tyuv ninyh tauv Bê-tên, yămz woa, yaz six zâyv ah nomz tync nongc congx Zâu Tênb-Hungh, six đangc dlih yaz pongh zuc zâuđ nanc, Nănh yâuc stăngc yaz, yaz ninyh tauv laiv nănh yâuc cloon yaz ninyh woax tauh." ⁴ Nănh stiz songđ tinyh đoih zoz pitc stingx munh nyăngz miuc hanyh, cloon binb, cloon yeetx stong taih jaoz phunz Ya-côpv, plopx ănz woa (njăngx sôih) pluiz đi, stătx Sê-zem stengv. ⁵ Ya-côpv, cloon nănh nyăngz munh seetb jau ninyh woax zanyf, Tênb-Hungh ayx ah hungđ cumh nzav nyăngz dlayc nzac woa stengv iz pôz nganc taih, ayx phunz woax nomz stengv nyăngz munh cumh nzav max nzađ luiđ lêpc Ya-côpv, buz nyăngz cah đangz. ⁶ Ya-côpv, cloon yeetx stong lêpc nănh ninyh nyăngz munh, ninyh tauv Lu-sơ, six Bê-tên, Ca-na-an, stâyz phangz. ⁷ Nănh năngx zâyv ah nomz tync taih nongc congx Zâu, nănh hipđ woax nomz tync ayx Ên-bê-tên, wâyc zuc nănh tyuv nănh nyăngz tah Ê-sau, woax zanyf, Tênb-Hungh yămz woax tix tync hynđ yangh phunz nănh phătc. ⁸ Lôx noib ênz tuz Rê-bê-ca, lub taih woax tauh nâuh munh Đê-bô-ra, quaix stâyv, nănh stiz plopx nănh ănz woa Bê-tên, namh puôngz, (njăngx sôih) coonz cah synh, nănh stiz songđ hipđ woax nomz tync ayx A-bô-ba-cutv. Ya-côpv nyăngz săngb bux ⁹ Ya-côpv, tăng Pha-đan, A-ram, stâyz phangz phunb đangz lauf tauv woa, Tênb-Hungh yâuc hynđ yangh taih poou woac phunz nănh. ¹⁰ Tênb-Hungh bux coong, "M âyh nyăngz bux six hipđ ayx Ya-côpv, six blătc nâyx staox ninyh mâyh nyăngz bux max zâyf hipđ ayx Ya-côpv, nzof gôh, six hipđ ayx Y-sa-la-ên, năngđ naz Tênb-Hungh songđ hipđ nănh Y-sa-la-ên munh. ¹¹ Tênb-Hungh năngx coong, "Yaz six lemđ quaix nyăngz Zâu Tênb-Hungh, mâyh six zuc naih sây stunz zunx đungx staox, pênx ah hungđ pec stingx yămz ah nomz côkz, nzof muif hungđ pec stingx six tăng mâyh zunx staox taih, nzof mâyh yâuc tuz ayx đungx stingx munh, đungx tauh Hungh nyăngz stu stongz. ¹² Yaz jaoz phunz Apv-ra-ham, cloon Y-sakv, nyăngz stâyz phangz, yaz yâuc phunz mâyh cloon mâyh đangz phanx nyăngz sây stunz." ¹³ Coong nzuf, Tênb-Hungh songđ yămz woax nomz tync gâyh nănh staox gungh ninyh. ¹⁴ Ya-côpv, songx ah nomz njauz pyây nongc ayx njâuh ănz woa Tênb-Hungh hynđ taih cloon coong woac woax tix tync, nănh zămđ tungh côh tyu ănz woa, songđ taox yâuh njămh ănz. ¹⁵ Ya-côpv, songđ hipđ Tênb-Hungh cloon nănh coong woac woax tix tync hipđ ayx Bê-tên. Ra-zên quaix stâyv ¹⁶ Ya-côpv, buz tăng Bê-tên, seetb jau ninyh năngx gâyh Epv-ra-ta, côz côz ha, Ra-zên, bengc săngx huđ đutb stynb, six nănh seenz stengb sây zâuđ nzongf. ¹⁷ Nănh tanyđ munz nyăngz săngx huđ, jămđ nănh woax tauh munh nzif bux nănh coong, "mâyh năngx gâyf cumh nzav, wâyc zuc nâyx zanyf, mâyh năngx stengb tuz ah lanh toonz." ¹⁸ Ra-zên, cayx quaix stâyv munz nzongf woax zanyf, nănh oonz bux phunz nâyx tauh sây hipđ ayx Bê-nô-ni.* six Ya-côpv, hipđ ayx Bên-ya-min. ¹⁹ Ra-zên, quaix stâyv plopx ănz Epv-ra-ta, jau synh năngx naih ah nomz bux hipđ ayx (bêtv-le-hem.) ²⁰ Ya-côpv, zoz nomz njauz taih songx nongc ayx Ra-zên, nyăngz stâub payh, woax nomz njauz pyây năngx yămz woa tuz tauv nâyx zanyf. ²¹ Y-sa-la-ên, stuyđ ninyh zoongz đupx njiuh ănz Mikv-đan, namh puôngz Ê-đe womz zamc." ²² Yămz woax nomz stâyz phangz lauh Y-sa-la-ên, nyăngz toonz, Ru-bên, ninyh cloon Bi-la, nănh stiz pha nyăngz au jeenz phâyx, Y-sa-la-ên, lauf pâyz nâyx đomc dlayc, Ya-côpv, naih săpc nyâyc lanh toonz. ²³ Lê-a, nyăngz toonz coonz Ru-bên, Sê-mê-ôn, Lê-vi, Yu-đa, Y-sa-ca, Sa-bu-lôn. ²⁴ Ra-zên, nyăngz toonz, Yô-sepv, cloon Bên-ya-min. ²⁵ Ra-zên, nâuh sab Bi-la, nyăngz toonz, Đan, cloon Nepv-ta-li. ²⁶ Lê-a, nâuh sab Siny-ba, nyăngz toonz Gatv, A-se. Yămz Pha-đan, A-ram, stengb nâyx đomc toonz phunz Ya-côpv. ²⁷ Ya-côpv, lauf tauv nănh nyăngz pha Y-sakv, yămz Mam-rê, stâyz phangz, Ci-li-atv, A-ra-ba, (Hêpv-rôn,) six dlênh noib Apv-ra-ham, cloon Y-sakv, yămz nyăngz tync. ²⁸ Y-sakv yămz tuz ah pez pêtz săpc nyăngv. ²⁹ Y-sakv, yămz tuz mengc đao côx nzongf songđ quaix stâyv muf cloon nănh nyăngz stu stongz yămz, nănh nyăngz iz lanh toonz Ê-sau, cloon Ya-côpv, songđ plopx (mokb) nănh.