33 ¹ Ya-côpv, cany pyây tex mangc phătc Ê-sau, cloon stâyx pez lanh munh taih, Ya-côpv, songđ tinyh phunz sây, phunz Lê_A cloon Ra-zên, cloon iz lanh nâuh sab jămđ mangc." ² Nănh bênc phunz nănh nyăngz iz lanh nâuh sab cloon nănh stiz nyăngz sây ninyh đangc, songđ tauv Lê-a, cănh cloon nănh nyăngz sây ninyh, nzăngđ tauv Ra-zên, cloon Yô-sepv, ninyh đangz. ³ Six Ya-côpv, cănh ayx pyây yeenv ninyh quâyc nzac pyây nokx tauv nib paix nhlic hâyđ, ayx tuz cayx tauv nănh nyăngz tah woa. ⁴ Six Ê-sau, coonx tyuv ninyh stipx, joom toomz nănh stiz songđ tinyh đoih haoh. ⁵ Ê-sau, zaub mynb mangc phătc nâyx đomc munh nzif cloon sây, nănh songđ naic, nâyx đomc munh nzif lêpc mâyh taih nâyx đomc munh six mănv neh? Ya-côpv, tauz, nâyx đomc sây six Tênb-Hungh hâuđ lênh bix sađ pôz phunz yaz tah nyăngz yâuf. ⁶ Nâyx đomc iz lanh nâuh sab, songđ cloon nănh stiz nyăngz sây taih quâyc nzac paix. ⁷ Zâyf tauv Lê-a, cloon nănh nyăngz sây songđ taih quâyc nzac paix. Yô-sepv, cloon Ra-zên, taih tauv đangz songđ lauf quâyc nzac paix. ⁸ Ê-sau, naic yaz taih pongh mâyh ênz ah peob stanyb hauđ nongc ayx lungđ heh? Ya-côpv, tauz, ôh woa six yaz oix phunz tah goib stymz goib âyx stăngz yaz." ⁹ Ê-sau, tauz, "Yâuf lex, yaz cănh naih caux nongc nzof, phanv njâuh phunz mâyh cănh nongc gôh. ¹⁰ Ya-côpv, coong, jođ năngx gâyf ayx đomc đêh, six coong, mâyh năngđ pungx stymz nongc yaz nyăngz pôz têx yaz six phătc mâyh nyăngz mynb năngđ phătc Tênb-Hungh nyăngz mynb nâyx. ¹¹ Jođ tah stipx yaz nzâyz ninyh nyăngz pôz gôh, Tênb-Hungh hâuđ lênh yaz, phunz yaz cănh naih caux nongc." Ya-côpv, coong tuz Ê-Sau songđ nyunc nongc gôh. ¹² Ê-sau, coong, "pănh tinyh đoih ninyh gôh. yaz six ninyh đangc yeenv mâyh." ¹³ Ya-côpv, tauz, "Zâu pâyz coong yaz nyăngz sây lauf năngx jeenz nzof, nâyx đomc stanyb hauđ lauf năngx cloon jeenz gunx, six coong năngx staix ninyh tymb têx, stiz songđ tayc nzuf gôh. ¹⁴ Mâyh phanv ninyh đangc gôh, yaz cănh ah manc muf đangz lêc. six coong sây cloon nâyx đomc stanyb hauđ ninyh tuz yaz cănh lêpc stiz muf tuz tauv woa pongh mâyh yămz Sê-i-rơ pongh zâu yămz woa. " ¹⁵ Ê-sau, coong, woa hungđ yaz cayx phunz yaz nyăngz sax lanh munh phunz mâyh cloon mâyh yămz nây, Ya-Côpv tauz max zâuđ ayx tuz nâyx đêh tinyh phanv tuz yaz nyăngz zâu hâuđ lênh yaz tuz gôh " ¹⁶ Woax noib, Ê-sau, songđ phunb đangz lauf Sê-i-rơ. ¹⁷ Six Ya-côpv, ninyh Su-côtv, homđ pyau ayx lungf njiuh woa nomz tync songđ hipđ ayx Su-côtv. ¹⁸ Ya-côpv, tăng Pha-đan, A-ram, phunb đangz muf tauv Sê-zem stengv, Ca-na-an, stâyz phangz, gongx nzongf nănh songđ ayx ah siênz njiuh ănz woa stengv cah synh. ¹⁹ Nănh nongc ah pez lepz nyanh pec maif Ha-mô cloon Sê-zem, stiz iz pha toonz nyăngz nib tâyc nongc ayx đupv njiuh. ²⁰ Yămz woax nomz tync nănh njăpc ah nomz gongc hoomb, hipđ ayx Ên-ê-lô-hê, Y-sa-la-ên.* Đi-na, zuc munh zăpc văngc