30 ¹ Ra-zên, phătc nănh max hayh naih sây phunz Ya-côpv, nănh songđ stâyx munz nănh nyăngz ô, nănh coong ănz Ya-côpv, mâyh zuc phunz yaz naih sây, năngđ max phunz yaz naih sây têx yaz six tayc đev. ² Ya-côpv, siv nhleenx Ra-zên, songđ tauz coong, "Yaz six Tênb-Hungh bix hayh ayx tuz phunz mâyh piz max naih sây mah?" ³ Ra-zên, coong, "nâyx zanyf yaz naih ah lanh nâuh sab Bi-la, mâyh phanv cloon nănh phâyx, phunz nănh hayh naih sây, wâyc nănh phunz yaz mungc nănh nyăngz sây năngx naih six miuh." ⁴ Ra-zên, songđ zoz nănh nyăngz nâuh sab Bi-la, jaoz phunz nănh nyăngz langh nongc ayx au, nzof Ya-côpv, songđ cloon nâyx tauh sab phâyx. ⁵ Bi-la, naih stynb stengb tuz ah lanh toonz phunz Ya-côpv. ⁶ Ra-zên, coong, "Tênb-Hungh songđ phătc yaz max naih stoif, năngx mungv yaz jođ nyăngz woac, sađ phunz yaz naih ah lanh toonz, nănh songđ oonz bux phunz nâyx tauh toonz hipđ ayx Đan. ⁷ Ra-zên, nyăngz nâuh sab Bi-la, zâyf naih stynb stengb tuz nyâyc lanh toonz taih. ⁸ Ra-zên, coong, "Yaz cloon yaz nyăngz ô tinyh zab six yaz nzengz tuz hingh, nănh songđ oonz bux phunz nâyx lanh toonz hipđ ayx Nepv-ta-li. ⁹ Lê-a, pâyz nănh max hayh naih sây nzof, nănh songđ zoz nănh nyăngz nâuh sab Siny-ba, jaoz phunz nănh nyăngz langh nongc ayx au. ¹⁰ Lê-a, nyăngz nâuh munh songđ stengb tuz ah lanh toonz phunz Ya-côpv. ¹¹ Lê-a, coong, "Yaz seenz mengc gongx nzongf, nănh songđ oonz bux hipđ ayx Gatv. ¹² Lê-a, nyăngz nâuh sab Siny-ba, năngx stengb tuz ah tauh toonz, phunz Ya-côpv tymb. ¹³ Lê-a, coong, "Yaz seenz numđ nyađ tuz coz gôh, wâyc zuc muif lanh munh sab songđ coong yaz tuz hônb-hiđ, nănh songđ oonz bux hipđ ayx A-se. ¹⁴ tauv quănf blauh stêtz, Ru-bên, ninyh woa jêmh lov pongh tungh juông, nzâyz lauf phunz nănh nyăngz nzif Lê-a, Ra-zên, coong ănz Lê-a, jođ ô phunz tikx cay mâyh toonz nyăngz (củ ngải) tungh juông yaz jađ geh." ¹⁵ Lê-a, tauz, mâyh zab zoz yaz langh six ănz stêu dlayc, nâyx zanyf zef năngx oix zab cloon yaz toonz nyăngz (juông) tymb mah? Ra-zên, coong, ha nâyx munf nănh six cloon ô phâyx, nongc wănc lâyc đomc (juông) geh." ¹⁶ Tauv cayx nzămc, Ya-côpv, tăng woa jêmh lauf, Lê-a, ninyh stipx nănh songđ coong, "Nâyx munf mâyh six zuc cloon yaz phâyx, nongc wănc toonz nyăngz (juông). woax munf Ya-côpv, songđ cloon Lê-a, phâyx. ¹⁷ Tênb-Hungh tauz Lê-a, jođ Zâu nyăngz woac, nănh zef năngx naih stynb stengb tuz tah ngâuf lanh toonnz phunz Ya-côpv. ¹⁸ Lê-a, coong, "Wâyc zuc yaz phunz yaz nyăngz nâuh sab phunz yaz nyăngz langh nongc, Tênb-Hungh songđ sađ sâuđ nyâyc nongc clao yaz nyăngz congz." Nănh songđ oonz bux hipđ ayx Y-sa-ca. ¹⁹ Lê-a, zâyf năngx naih stynb, stengb tuz tah guc lanh toonz, phunz Ya-côpv. ²⁰ Lê-a, coong, "Tênb-Hungh sađ sâuđ nyâyc gongx phunz yaz, nâyx zanyf yaz nyăngz langh songđ stăngz yaz, wâyc zuc yaz stengb tuz joz lanh toonz phunz Ya-côpv. nănh songđ oonz bux hipđ ayx Sa-bu-lôn. ²¹ Blătc woa nănh năngx stengb tuz ah lanh sab, nănh oonz bux hipđ ayx Đi-na. ²² Tênb-Hungh săngx tauv Ra-zên, đoouc coouv nyăngz woac, songđ phunz nănh naih stynb. ²³ Nănh naih stynb stengb tuz ah lanh toonz nănh coong, "Tênb-Hungh songđ stăngc tuz yaz max zuc munh phătc stanc. ²⁴ Nănh songđ oonz bux hipđ ayx Yô-sepv. Wâyc zuc nănh coong, "Zâu Ye-hô-wa, six năngx sađ phunz yaz naih ah lanh toonz tymb." Ya-côpv jaf La-ban ²⁵ Ra-zên, stengb Yô-sepv, blătc quaix đangz Ya-côpv, songđ ninyh coong ănz nănh nyăngz pha taz La-ban; jođ pha phunz yaz phunb đangz muf yaz nyăngz lôx stăngz phangz gôh. ²⁶ Pha pâyz tuz yaz naih stymz taih stăngc pha ayx cumh pâuz nongc wănc au sây năngđ laix, jođ mâyh nâyx zanyf jaoz au sây phunz yaz phunb đangz muf gôh. ²⁷ La-ban, tauz, năngx gâyf zengx, six coong pha năngđ ayx tuz hođ sây nyăngz stymz nyâuđ bix yămz nây đangc, wâyc zuc sây songđ pâyz tuz Zâu Ye-hô-wa, sađ pôz phunz pha năngx đungx têx, sađ phunz sây." ²⁸ Mâyh nyăngz congz stynh oix nongc buc laiv bix phanv coong bux yaz nzof, yaz nzăngđ hayh phunz mâyh." ²⁹ Ya-côpv, tauz nănh nyăngz pha taz, pha pâyz tuz yaz stăngc pha ayx cumh pâuz năngđ laix, yâuc pâyz tuz tăng yaz jămđ pha nyăngz stanyb hauđ tuz zunx đungx staox buc laiv. ³⁰ Tăng yaz taih stăngc pha jămđ stengb hauđ woax zanyf, pha lauf max zengx naih đungx bah laiv, tăng yaz taih stăngc jămđ mungc Zâu Yê-hô-wa, sađ pôz phunz nâyx zanyf nzăngđ tuz naih đungx staox, cayx tauv laiv zanyf yaz nzăngđ tuz njăpc yaz nyăngz jax toongx loz?" ³¹ La-ban, naic, "pha cayx zuc clao congz phunz sây năngđ laix? Ya-côpv, tauz, "Pha max zâuđ clao lungđ nyanh đêh, six coong pha năngđ nyeenc têx, yaz six năngx yămz nây jămđ pa-jiz yungh phunz pha tymb. ³² Nâyx noib yaz six tex mangc pha nyăngz stanyb hauđ yeetx stong, woax đomc pa jiz yungh naih manx jaz yaz six lanyc zoz seetb taih. năngx cloon woax đomc yungh manx, six săngh yaz nyăngz phănc. ³³ Yaz ayx nyăngz cumh pâuz cănh ayx zanyx manyf phunz yaz đangz phanx. pha ninyh tex mangc yaz nyăngz congz stynh, yaz woax peob yungh laiv tauh max naih manx, cloon yaz woax peob pa jiz yungh max zâyf manx jaz, yaz woax peob yungh năngđ max naih laiv tauh năngđ ha, six săngh yaz ayx stac." ³⁴ La-ban, tauz, ưrh, ha six phanv ayx âyz mâyh coong nâyx." ³⁵ Woax noib La-ban, ninyh lanyc zoz woax đomc yungh congz naih manx tom, cloon yungh janx naih manx tom, six woax đomc yungh naih manx pec tom, cloon yeetx stong pa jiz yungh jaz, nănh jaoz phunz nănh nyăngz toonz. ³⁶ La-ban, songđ zoz nănh nyăngz phănc cloon Ya-côpv, nyăngz phănc lanyc ênz ninyh tinyh gâyh cox pôz noib jau tingh, năngđ naz, Ya-côpv, songđ njynh luz jămđ năngx yăngc La-ban, woax đomc stanyb hauđ. ³⁷ Ya-côpv, ninyh cumv zoz (bakc dương, njăngx, hanyf đaoh njăngx,) cloon bôh đaoh njăngx) quah mengz nzâyz lauf tătc đupx ayx quengx phunz njăngx nzayh pec loi seetb. ³⁸ Nzof nănh zoz woax đomc njăngx quah tătc đupx ayx quengx woax đomc tăpx ănz woa stanyb hauđ ninyh hopb womz nyăngz stôh cah đangc phunz woax đomc stanyb hauđ nongc stengb tuz bix ninyh hopb womz woax zanyf. ³⁹ Phunz woax đomc stanyb hauđ yămz nâyx đomc njăngx quah cah đangc nongc stengb yâuc naih jeenz, tauv nănh stiz stengb stâyv taih, yâuc naih manx, naih pyênx, naih tom, naih styn săngh tyuh. ⁴⁰ Ya-côpv, njengx zoz nănh stiz nzăngđ stengb stâyv taih woax đomc, nănh lanyc zoz woax đomc yungh cloon pa jiz yungh naih styn manx jaz, nănh cănh lanyc zoz seetb taih ănz ah đomc tync max phunz zanb La-ban, nyăngz stanyb hauđ. ⁴¹ Toix woax đomc pa jiz yungh zoongx nongc stengb nyăngz săngx huđ, Ya-côpv, yâuc zoz nâyx đomc njăngx quah nzâyz taih tăpx ănz woa womz stôh cah zâyc phunz nănh stiz mangc, phunz nănh stiz yămz nâyx đomc njăngx quah cah đangc naih jeenz. ⁴² Nzof tauv woax đomc pa jiz yungh max zoongz taih nongc stengb nyăngz săngx huđ, Ya-côpv, yâuc max zoz nâyx đomc njăngx quah nzâyz taih ănz nănh stiz woa cah đangc, woax đomc max zoongx six săngh La-ban, nyăngz phănc, nzof woax đomc zoongx vâyc yâuc săngh Ya-côpv nyăngz phănc. ⁴³ Ya-côpv, cun ayx cun puv quâyx staox, naih yungh naih loh toh, naih maf lih, naih nâuh toonz, naih nâuh sab cloon stanyb hauđ phutx đungx staox. Ya-côpv tyuv