28 ¹ Y-sakv, songđ êu Ya-côpv, taih poou woac phunz nănh yâuc zăpx nănh coong, "Mâyh max tuz zoz nây Ca-na-an, laiv lanh munh sab nongc ayx au. ² Mâyh bix nyoongz quef ninyh Pha-đan, A-ram, stâyz phangz, nyâuh nyăngz taz Bê-tu-ên, woa zoz nyâuh nauf La-ban, ah lanh sab nongc ayx au bex. ³ Jođ Zâu Tênb-Hungh sađ pôz phunz mâyh nyăngz sây stunz zunx hongđ staox, nzof mâyh yâuc ayx đungx stingx munh nyăngz stu stongz. ⁴ Jođ Nănh sađ pôz phunz mâyh nyăngz sây stunz đangz phanx tuz sađ pôz phunz năngđ Apv-ra-ham, mâyh cloon đangz phanx nyăngz sây stunz stâyv, tuz Tênb-Hungh sađ pôz phunz mâyh tăng lôx yămz nâyx nomz Apv-ra-ham, nyăngz stâyz phangz." ⁵ Năngđ naz, Y-sakv, songđ bux êu Ya-côpv, ninyh gâyh năngx côz, nzof Ya-côpv, songđ ninyh Pha-đan, A-ram, munh nyăngz stâyz phangz, ninyh tauv La-ban, Bê-tu-ên, nyăngz toonz, A-ram, munh, Ê-sau, cloon Ya-côpv, stiz nzif Rê-bê-ca, nyăngz tah woa. ⁶ Ê-sau phătc nănh nyăngz pha Y-sakv, poou woac phunz Ya-côpv, yâuc êu nănh ninyh Pha-đan, A-ram, stâyz phangz lov au zoz. ⁷ Ê-sau, yâuc phătc Y-sakv, poou woac phunz yâuc zăpx Ya-côpv, êu nănh năngx gâyf zoz laiv lanh munh sab yămz Ca-na-an, stâyz phangz, nongc ayx au, Ê-sau, yâuc phătc Ya-côpv, mungv nzif pha nyăngz woac ninyh Pha-đan, A-ram, stâyz phangz. ⁸ Ê-sau, songđ pâyz tuz nănh nyăngz pha max numđ nyađ laiv lanh munh sab ayx nănh nyăngz au yămz Ca-na-an stâyz phangz. ⁹ Ê-sau, songđ ninyh zoz Apv-ra-ham, nyăngz toonz ikv-ma-ên, ah lanh sab Ma-ha-latv, nongc ayx au, Nê-ba-ôtv, nyăngz ô. max cun nănh hănđ naih iz lanh au. Ya-côpv yămz Bê-tên bâyx ¹⁰ Ya-côpv, gâyh Bê-e-sê-ba, ninyh Za-ran. ¹¹ Nănh cun ninyh lauh tauv ah nomz tync, phătc bah noib mutc zâyc nzămc nzof, nănh songđ zoz ah nomz njauz taih nzomx phâyx woa mâyc njoomh ah munf yămz woax nomz tync. ¹² Ya-côpv, phâyx mâyc njoomh bâyx phătc ah tauh tâyb tăng nây nib zax ninyh tauv gungh, yâuc phătc Zâu Tênb-Hungh nyăngz Stynz-munh staox ninyh nzac taih. ¹³ Ya-côpv, yâuc phătc Zâu Yê-hô-wa, stâuđ woa tâyb đany bux nănh coong, "Yaz six nyâuh claof Apv-ra-ham, nyăngz Zâu Yê-hô-wa, Tênb-Hungh, năngx cloon Y-sakv, nyăngz Zâu Tênb-Hungh, nâyx zanyf mâyh lâyc cuyb tync, yaz six jaoz phunz mâyh, cloon mâyh nyăngz sây stunz stâyv yămz. ¹⁴ Mâyh nyăngz sây stunz six phutx hongđ năngđ yămz nây gungh đi nyăngz njauz staiz, yămz đanv ninyh pong pyâyz phangz, tăng tongz namh stayz pakx puôngz, muif stingx đâuf munh nyăngz sây stunz yămz nây nib mync songđ mungc mâyh bix tuz sađ pôz phunz. ¹⁵ Săngx bex, max cun mâyh hănđ ninyh tauv laiv tix yaz yâuc leđ phunz mâyh ninyh tauv woa, nzof yaz yâuc năngx ênz mâyh phunb đangz lauf yămz nâyx nomz stâyz phangz, wâyc zuc yaz six max quanyf mâyh, yaz six ayx tuz songf nzuf yaz cloon mâyh nyunc nyăngz woac." ¹⁶ Ya-côpv, đyub taih songđ coong, "Zâu Yê-hô-wa, seenz hynđ yangh yămz nây yaz lenf lôx max pâyz." ¹⁷ Nănh numđ cumh nzav nzongf songđ coong, "Nây six Tênb-Hungh nyăngz pyau, seenz six Tênb-toongh côkz nyăngz singh jengh." ¹⁸ Ya-côpv, quef taih njâu, nănh songđ zoz nănh nzomx woax nomz njauz pyây njăpc quef songx ănz woa nongc ayx tonb njămh yâuh ănz. ¹⁹ Nănh hipđ woax nomz tync ayx Bê-tên, six woax nomz stengv lauf naih bux hipđ ayx Lu-sơ. ²⁰ Ya-côpv, năngx njăpc nyunc woac nănh coong, "Six coong Tênb-Hungh năngđ seenz cloon yaz yămz, yâuc leđ phunz yaz jynh đangh ninyh nâyx stêtz jau, sađ nzu phunz yaz nhlync, yâuc sađ gwuyz quav phunz yaz zuz. ²¹ Yâuc leđ phunz yaz pengh oonz muf tauv yaz pha nyăngz pyau, Zâu Yê-hô-wa, seenz zâyf yaz nyăngz Tênb-Hungh. ²² Yaz njăpc nâyx nomz njauz pyây six nongc ayx jix houđ, pênx Tênb-Hungh nyăngz pyau, yaz six pungx hođ Zâu sađ phunz yaz nyăngz phănc, săpc phănc ah phănc phunz Zâu. Ya-côpv pongh Ra-zên