26 ¹ Apv-ra-ham, woax stâyv munh, pongh zuc nyâuđ sab lub, Y-sakv, songđ ninyh tauv A-bi-mê-lekv, Phi-li-tin, Hungh woa, yămz Gê-ra. ² Zâu Yê-hô-wa, hynđ yangh taih bux Y-sakv, coong, "Mâyh năngx gâyf ninyh yămz Y-yiêpv-tô, stâyz phangz, phanv yămz yaz bux phunz mâyh woax nomz stâyz phangz. ³ Mâyh phanv yămz nâyx nomz stâyz phangz gôh, yaz six cloon mâyh yămz yâuc sađ pôz phunz mâyh, năngx phunz cloon mâyh nyăngz sây stunz stâyv, năngx cloon mâyh nyăngz pha Apv-ra-ham, nyunc woax đomc woac. ⁴ Yaz six oix ayx phunz mâyh nyăngz sây stunz zunx đungx staox buc yămz gungh nyăngz stingz tau, yaz yâuc năngx oix ayx phunz mâyh nyăngz sây stunz stâyv yămz pong nâyx nomz bamh canz nib mync, yămz nây gungh đi muif stingx đâuf munh songđ wâyc mâyh nyăngz sây stunz bix tuz stipx pôz. ⁵ Wâyc zuc Apv-ra-ham, mungv âyz yaz bux nyăngz woac ayx, nănh yâuc ayx âyz yaz nyăngz đoouc lif gâyf, cloon yaz nyăngz gao." ⁶ Y-sakv, songđ yămz Gê-ra, stengv. ⁷ Woax nomz tync nyăngz munh naic nănh, wâyc nănh nyăngz au, nănh tauz coong, Rê-bê-ca, six yaz nyăngz muc, nănh cumh nzav max nzađ coong zac Rê-bê-ca, six nănh nyăngz au, nănh nyâyh coong, "Woangb yămz woa woax đomc munh hayh tayx nănh zab zoz Rê-bê-ca, nongc ayx nănh stiz nyăngz au, wâyc zuc Rê-bê-ca, seenz quai nzongf. ⁸ Y-sakv, yămz woa ah dlapc batz lauh, naih ah noib A-bi-mê-lekv, Phi-li-tin, nyăngz Hungh, mangc quaix woa jengh jeenz ninyh jenx phătc Y-sakv, cloon nănh nyăngz au, Rê-bê-ca, tinyh panv poc woa. ⁹ A-bi-mê-lekv, êu Y-sakv, taih pongh Phi-li-tin Hungh naic nănh coong, "lâyc tauh ya munh sab six mâyh nyăngz au lêc, ha săngh laix mâyh yâuc coong nănh six mâyh nyăngz muc? Y-sakv, songđ tauz, wâyc zuc yaz nyâyh taih woangb munh hayh oix tayx yaz zab zoz nănh." ¹⁰ A-bi-mê-lekv, coong, "mâyh wâyc săngh laix bix ayx nâyx đomc dlayc phunz buz? six coong năngđ naih tix lanh yaz nyăngz pec stingx ninyh cloon nănh phâyx, mâyh six ayx phunz buz pamf stoif nzec." ¹¹ A-bi-mê-lekv, songđ bux phunz nănh nyăngz pec stingx, laiv lanh năngđ ayx laix ănz nâyx lanh munh mah six nănh nyăngz au six zuc tayx tayc. Y-sakv săngh puv quâyx munh ¹² Y-sakv, yămz woax nomz stâyz phangz songx zunb, songx ah phănc sâub taih tuz ah pez phănc, wâyc zuc woax nyăngv Zâu Yê-hô-wa, sađ pôz phunz nănh đungx nzongf. ¹³ Nănh cun ayx cun puv quâyx staox, songđ seenz pênx puv quâyx munh. ¹⁴ Y-sakv, nănh naih ngoongh naih pa jiz yungh đungx staox, yâuc năngx naih cloon nâuh munh pong pyau, songđ ayx bây Phi-li-tin munh stâyx munz nănh. ¹⁵ Apv-ra-ham, woax stâyv munh, nănh nyăngz nâuh munh witz woax đomc womz cangz, zuc Phi-li-tin munh witz nib plopx tynh pong nzuf. ¹⁶ A-bi-mê-lekv, bux Y-sakv, coong, "Mâyh six zuc seetb ninyh năngx gâyh buz nyăngz stâyz phangz, wâyc zuc mâyh seenz năngx puv quâyx têx buz." ¹⁷ Y-sakv, songđ ninyh gâyh woax nomz stâyz phangz, stuyđ ninyh ayx đupx njiuh ănz Gê-ra, nyăngz lungf njiuh yămz woa. ¹⁸ Apv-ra-ham, năngx yămz yangh stâyv nănh witz woax đomc womz cangz, tauv nănh tayc blătc, Phi-li-tin munh witz nib plopx tynh pong nzuf, Y-sakv, zâyf ngwoai zoz seetb taih nzuf, songđ năngx oonz bux âyz nănh nyăngz pha oonz đangc woax đomc bux. ¹⁹ Y-sakv, nyăngz nâuh munh witz woa lungf ah nomz womz cangz, nănh stiz lov pongh ah nomz womz sting cuđ. ²⁰ Gê-ra, stengv nyăngz jămđ stanyb hauđ munh, taih zab Y-sakv, jămđ stanyb hauđ nyăngz munh, nănh stiz coong, "nâyx nomz womz cangz six buz nyăngz lêc, Y-sakv, songđ hipđ woax nomz womz cangz ayx Ê-sekv, wâyc zuc nănh stiz taih zab. ²¹ Y-sakv, buz quengx woax nomz zâyf ninyh witz pitc nomz womz cangz, woax đomc munh lauf ninyh zab woax nomz womz cangz, nănh songđ oonz bux bây woax nomz cangz hipđ ayx Sitv-na." ²² Y-sakv, quengx woax nomz tync, zâyf ninyh witz tah stamz nomz, tauv woax nomz nănh stiz songđ max naih mănv taih zab nzof, Y-sakv, songđ hipđ woax nomz ya womz cangz ayx Rê-hô-bôtv." Nănh coong, "Zâu Yê-hô-wa, songđ njengx nâyx nomz tync phunz pănh, pănh songđ tuz puv quâyx yămz nâyx nomz stâyz phangz." ²³ Y-sakv, năngx stuyđ ninyh yămz Bê-ê-sê-ba stengv. ²⁴ Woax munf, Zâu Yê-hô-wa, hynđ yangh taih bux nănh coong, "Năngx gâyf cumh nzav, yaz six mâyh nyăngz pha Apv-ra-ham, nyăngz Tênb-Hungh, yaz six cloon mâyh yămz yâuc sađ pôz phunz mâyh nyăngz sây stunz phutx hongđ staox, wâyc zuc Apv-ra-ham, six ayx yaz nyăngz pâuz." ²⁵ Y-sakv, songđ ayx ah nomz gongc homb nongc coouv Zâu Yê-hô-wa, nyăngz bux, nănh songđ zoongz đupx njiuh ănz woa, nănh nyăngz pâuz songđ witz ah nomz womz cangz ănz woa. ²⁶ Woax zanyf, A-bi-mê-lekv, tăng Gê-ra, taih tayđ nănh, A-hu-satv, cloon nănh nyăngz pyeoz, Phi-côn, ayx quanz pengz pyây nyăngz munh taih lov nănh. ²⁷ Y-sakv, naic nănh stiz, "Nyâuh taih nây lov yaz naih lungđ dlayc yeh, đangc dlih mâyh hănđ yaz, yâuc luiđ yaz seetb ninyh gâyh mâyh nyăngz stâyz phangz, nâyx zanyf mâyh zef năngx taih nây lov yaz ayx lungđ?" ²⁸ Nănh stiz tauz, Buz phătc tuz manyh pec, seenz naih Zâu Yê-hô-wa cloon mâyh yămz, buz songđ oix taih cloon mâyh nyunc woac, buz songđ taih jođ mâyh phunz buz cloon mâyh njăpc nyunc woac. ²⁹ Phunz mâyh max ayx laiv hungđ hoiđ tauv buz, cayx năngđ cah đangc dlih, buz max ayx laix hoiđ mâyh, ayx gongx phunz mâyh pengh oonz seetb stâyz phangz ninyh, mâyh seenz tuz Zâu Yê-hô-wa, sađ pôz phunz mâyh." ³⁰ Y-sakv, songđ bênc ah tonx năngv tinyđ nănh stiz, nănh stiz songđ yămz woa nhlync hopb. ³¹ Nyâyc đoomz njâu quef taih nănh stiz songđ nyunc woac tuz songf nzuf, Y-sakv, songđ stungx nănh stiz pengh oonz muf. ³² Toongx woax noib Y-sakv, nyăngz pâuz buz taih lănv bux nănh, nănh stiz bux coong, "buz witz woa cangz lov pongh womz nzof." ³³ Nănh songđ hipđ woax nomz cangz ayx Si-ba, năngđ naz woax nomz stengv songđ naih bux hipđ ayx Bê-e-sê-ba, taih tauv nâyx noib. Ê-sau zoz au ³⁴ Ê-sau, tuz stâyx săpc nyăngv, nănh zoz iz lanh au, Hê-titv, munh sab bux hipđ ayx Yu-đitv, Bê-e-ri, nyăngz sab, năngx cloon Batv-sê-ma, Ê-lôn, nyăngz sab. lauf Hê-titv, munh sab. ³⁵ Wâyc nây iz lanh bongf songđ ayx phunz Y-sakv, cloon Rê-bê-ca, seenz numđ stauh tuz max zâyf stoc. Ya-côpv jaf Y-sakv