24 ¹ Apv-ra-ham, yămz tuz nyăngv tauh côx nzongf, yămz nănh ayx nyăngz muif hungđ dlayc, Zâu Ye-hô-wa, songđ sađ pôz phunz nănh. ² Apv-ra-ham, coong bux cloon nănh yămz lauh woax tauh pâuz, jămđ nănh nyăngz jax toongx woax tauh, "Stungb mâyh nyăngz puf taih ănz yaz nây staux bongc jađ geh. ³ Yaz oix nongc mâyh nuz Zâu Ye-hô-wa, Tênb-Hungh gungh cloon nib nyunc woac, mâyh six max zoz laiv lanh yămz Ca-na-an nyăngz munh sab phunz yaz nyăngz toonz nongc ayx au. ⁴ Mâyh six zuc muf yaz nyăngz lôx stâyz phangz lov ah lanh yaz nyăngz seenz jeenb, phunz yaz nyăngz toonz Y-sakv nongc ayx au." ⁵ Woax tauh pâuz tauz, six coong woax tauh munh sab năngđ max nyeenc lauf nâyx nomz stâyz phangz six cayx ayx laix? max zâyf zuc stungx mâyh nyăngz toonz muf yămz woa lôx stâyz phangz mah? ⁶ Apv-ra-ham, coong ănz nâyx tauh tah, mâyh six max tuz nyunc woac ênz yaz nyăngz toonz phunb đangz muf yămz woa! ⁷ Ye-hô-wa, six Tênb-Hungh yămz cah zâyc gungh nyăngz Zâu, songđ ênz yaz ninyh gâyh yaz nyăngz pha stâyz phangz, yâuc nyunc woac phunz yaz, mâyh zuc pungx stymz nyunc woac phunz yaz, yaz six sađ pôz phunz mâyh nyăngz sây stunz yămz nâyx nomz stâyz phangz, Zâu six phunz nănh nyăngz Stynz-munh ninyh đangc mâyh, mâyh six hayh ninyh lov tuz pongh woax nomz stâyz phangz ah lanh munh sab ênz lauf nây phunz yaz nongc ayx bongf. ⁸ Woax tauh munh sab hănđ six max nhlimc nzeetx cloon mâyh lauf nây, yaz nyunc cloon mâyh nzof, hănđ six tayc săngh mâyh yâuc max tuz stungx yaz nyăngz toonz muf yămz woax nomz stâyz phangz. ⁹ Năngđ naz nâyx tauh pâuz, songđ stungb nănh nyăngz puf quaix taih ănz nănh nyăngz zâu Apv-ra-ham, nyăngz staux bongc nyunc ayx âyz nâyx đomc woac. Săngđ coonz lov au ¹⁰ Nâyx tauh pâuz songđ nzâyz nănh nyăngz Zâu săpc tauh loh toh, nzâyz cloon đungx hungđ jax dlaih seetb jau ninyh A-ram, Na-ha-ra-im, Na-cô, nyăngz stengv. ¹¹ Ninyh tauv woa stengv cungh ngwoaic, nănh phunz loh toh, quâyc nzac woa womz cangz cah synh ninyh, woax zanyf yâuc gungh cayx nzămc nzof, woax zanyf toix zuc naih ah lanh munh sab seetb taih woa womz cangz quab womz. ¹² Woax tauh pâuz đoouc coouv Zâu coong, "ô yaz nyăngz Zâu Apv-ra-ham, nyăngz Zâu Ye-hô-wa, Tênb-Hungh lex! jođ stăngc yaz nâyx noib phunz yaz ayx săngh yaz nyunc woac cloon yaz nyăngz Zâu Apv-ra-ham, ayx nyăngz cumh pâuz. ¹³ Nâyx zanyf yaz stâuđ yămz nây stengv nâyx nomz womz cangz cah synh, nâyx nomz stengv nyăngz munh sab yâuc taih nây womz cangz quab womz. ¹⁴ Jođ phunz yaz nâyx đomc dlayc seetb taih năngđ yaz nyâyh nâyx, six coong yaz năngđ jođ ah lanh munh sab coong, "Jođ pungx mâyh nyăngz cah luf womz nzac phunz yaz hopb, nzof nănh yâuc năngx coong, "Yaz six năngx phunz cloon mâyh nyăngz loh toh hopb, yaz songđ pâyz tuz coong woax tauh six Zâu sên taih nongc ayx Y-sakv nyăngz au, six coong năngđ naih nâyx đomc dlayc seetb taih năngđ nâyx, yaz songđ pâyz tuz Zâu six ayx gongx nyăngz dlayc phunz yaz nyăngz Zâu." Lov tuz au ¹⁵ Nănh coong max zengx pac, naih ah lanh munh sab bux hipđ ayx Rê-bê-ca, đamz ah nomz cah luf ănz womz pong tăng woa cangz seetb taih, nănh six Bê-tu-ên, nyăngz sab Miny-ca, six Na-cô, nyăngz au, Na-cô, six Apv-ra-ham nyăngz yâuf. ¹⁶ Nâyx tauh munh sab seenz quai nzongf, nănh yâuc max zengx tuz cloon laiv lanh munh baox ayx đaoc quaix. nănh zăngf tuz cah luf womz pong tăng womz cangz seetb taih cayx phunb đangz nzac woa stengv muf." ¹⁷ Nâyx tauh pâuz coonx tyuv ninyh coong ănz nâyx tauh ya munh sab, jođ phunz mâyh lâyc cah luf womz yaz hopb tikx cay jađ." ¹⁸ Nâyx tauh munh sab tauz, ê Zâu lex! nyămh dlongh hopb geh." Nâyx tauh munh sab pungx cah luf womz nzac taih, nănh yâuc stăngc zoz puf pâuh phunz nâyx tauh pâuz hopb. ¹⁹ Phunz nâyx tauh munh hopb pac, nâyx tauh munh sab năngx coong, "Yaz six năngx quab womz phunz cloon mâyh nyăngz loh toh tuz pêu nzăngđ sec." ²⁰ Nâyx tauh munh sab songđ nzâyz cah luf womz ninyh taox womz ănz woa stôh phunz loh toh womz, yâuc njynh lub coonx tyuv nzac woa womz cangz ninyh quab womz nzâyz lauf taox phunz nănh nyăngz loh toh hopb. ²¹ Nâyx tauh pâuz stâuđ woa max tongf setx mangc jađ Zâu Ye-hô-wa, ayx săngh âyz yaz nyăngz cumh pâuz seetb taih max naih? ²² Nâyx đomc loh toh hopb womz tuz pêu nzuf, nâyx tauh pâuz songđ zoz ah nomz sămz bah đoz quinb taih tăngh phunz Rê-bê-ca, niđ cox pyaz stynh, năngx zoz cloon iz nomz sămz sămh taih, muif nomz niđ pyâyz gungf, zoz taih tăngh ănz nâyx tauh munh sab nyăngz puf. ²³ Songđ naic nănh, "Nyâuh pha six mănv, jođ phunz yaz pâyz mâyh nyăngz pyau naih tync caux phunz cloon buz sec quaix ah munf max? ²⁴ Nâyx tauh munh sab tauz, yaz six Bê-tu-ên, nyăngz sab, Miny-ca, Na-cô, nyăngz sây. ²⁵ Nâyx tauh munh sab tauz, Yaz nyăngz pyau yâuc năngx naih cloon bah gao đungx nongc uyx stanyb hauđ, yâuc năngx naih tync đungx caux phunz nyâuh sec quaix ah munf." ²⁶ Nâyx tauh pâuz songđ quâyc nzac nib ninyh paix Zâu Ye-hô-wa. ²⁷ Nănh tauz coong, "Seenz jic tuz tanv yaz nyăngz Zâu Apv-ra-ham, nyăngz Zâu Ye-hô-wa, Tênb-Hungh, Zâu seenz max quanyf yaz nyunc nyăngz woac, songđ naih stymz nyâuđ ayx gongx dlayc phunz yaz nyăngz Zâu, Zâu Ye-hô-wa, cănh yeenv jau ênz yaz taih tauv Apv-ra-ham, yaz nyăngz zâu jeenb nyăngz pyau. ²⁸ Nâyx tauh munh sab coonx tyuv nzac pyau njaf muf lănv nâyx đomc dlayc bux nănh nyăngz pyau munh. ²⁹ Rê-bê-ca, naih ah lanh tah, bux hipđ ayx La-ban, La-ban, coonx tyuv ninyh tauv woa singh jengh cungh ngwoaic, woax zanyf, nănh mangc phătc nâyx tauh pâuz songđ năngx stâuđ woa womz cangz cah synh. ³⁰ La-ban, phătc nănh nyăngz muc, puf tăngh sămz bah đoz quinb, yâuc tăngh sămz sămh, năngx numđ nănh nyăngz muc lănv nzuf woax đomc woac, nănh songđ tyuv ninyh tex mangc phătc nâyx tauh pâuz, cloon woax đomc loh toh stâuđ woa womz cangz cah synh. ³¹ la-ban coong, "Tuz Zâu Ye-hô-wa, sađ pôz phunz nyăngz munh lex! mâyh năngx stâuđ lâyc nongc ayx lungđ ngeh? buz bêc bênc tync săngh woa pyau phunz nyâuh, bênc cloon loh toh nyăngz tync dloih nzuf phunz nyâuh nzof gôh." ³² Nâyx tauh pâuz songđ nzac pyau muf gôh, La-ban, songđ stăngc pâuh loh toh to nzac taih, nănh stiz nzâyz mađ cloon bah gao taih phunz loh toh nhlync, yâuc năngx zoz womz phunz cloon lêpc Apv-ra-ham, nyăngz pâuz ninyh nyăngz munh đaox staux. ³³ Nănh stiz bênc năngv săngh taih bux êu Apv-ra-ham, nyăngz pâuz buz nhlync, six nănh coong, "Yaz max zengx nhlync đêh, zu yaz coong nzuf buz ayx nyăngz cumh pâuz, buz nzăngđ nhlync lêc, La-ban, coong, "phanv coong geh!" ³⁴ Nănh coong, "Yaz six Apv-ra-ham, nyăngz pâuz. ³⁵ Yaz nyăngz Zâu, seenz tuz Zâu Ye-hô-wa, sađ pôz phunz đungx nzongf, tuz puv quâyx, naih ngoongh, naih yungh, naih pa-jiz yungh đungx, naih loh toh, naih maf lih, naih sămz naih nyanh đungx nzongf, naih nâuh toonz, naih nâuh sab đungx. ³⁶ Yaz nyăngz Zâu nyăngz au Sa-ra, nyăngv tauh côx nzongf nzăngđ stengb tuz ah tauh toonz taih phunz yaz nyăngz Zâu, nâyx zanyf yaz nyăngz Zâu naih nyăngz muif hungđ jax toongx six jaoz phunz nănh nyăngz toonz nzuf gôh. ³⁷ Yaz nyăngz zâu êu yaz cloon nănh nyunc woac, nănh êu yaz max tuz zoz yămz Ca-na-an, nănh nâyx zanyf nănh yămz woax nomz stâyz phangz laiv lanh munh sab phunz nănh nyăngz toonz nongc ayx au, ³⁸ Nănh coong, "Mâyh six zuc muf lov yaz lôx stâyz phangz nyăngz jeenb, lov ah lanh munh sab phunz yaz nyăngz toonz nongc ayx au." ³⁹ Yaz năngx naic yaz nyăngz Zâu coong, "Six coong woax tauh munh sab năngđ max nyeenc lêpc yaz lauf nây six cayx ayx laix? ⁴⁰ Six yaz nyăngz Zâu tauz coong, "Yaz canyx bongc nyăngz Zâu Ye-hô-wa, six êu nănh nyăngz Stynz-munh ninyh đangc mâyh, mâyh six hayh ninyh lov tuz ah lanh yaz nyăngz pha nyăngz yâuf pez jeenb nyăngz ah lanh sab phunz yaz nyăngz toonz nongc ayx au. ⁴¹ Six coong mâyh năngđ ninyh tuz tauv yaz nyăngz yâuf pez jeenb woa, bix nănh stiz năngđ max nyunc phunz nănh stiz ah lanh sab lêpc mâyh lauf nây têx, tauv woax zanyf yâuc max zuc stayb mâyh cloon yaz nyunc nyăngz woac." ⁴² Six nâyx noib yaz taih tauv nây womz cangz cah synh coouv Zâu coong, "Yaz Apv-ra-ham, nyăngz Zâu Ye-hô-wa, Tênb-Hungh lex, jođ stăngc yaz ayx năngx săngh yaz seetb taih nâyx hâyđ jau ayx nyăngz cumh pâuz tuz đatc. ⁴³ Nâyx zanyf yaz stâuđ nây womz cangz cah synh, jođ phunz naih tix lanh munh sab taih nây zăngf womz, yaz songđ coong, "jođ phunz yaz hopb cay mâyh lâyc cah luf womz. ⁴⁴ Nzof nănh yâuc phunz woax tauh munh sab tauz coong, "nyămh dlongh hopb geh naz, nzof nănh yâuc năngx coong, "Yaz yâuc năngx zăngf womz phunz cloon mâyh nyăngz loh toh hopb tymb." nzof woax tauh munh sab six Zâu Ye-hô-wa, sên taih nongc ayx yaz nyăngz Zâu nyăngz bongf." ⁴⁵ Yaz coouv Zâu nyâyh coong năngđ nâyx max zengx tuz, mangc woax đangđ woa phătc tauh munh sab bux hipđ ayx Rê-bê-ca, đamz nib engz cah luf nzac woa cangz ninyh quab womz, yaz songđ naic nănh coong, jođ phunz tikx cay womz yaz hopb jađ." ⁴⁶ Woax tauh munh sab songđ pungx cah luf womz nzac taih tauz coong, "hopb geh, nzof nănh năngx coong, "Yaz cayx quab womz phunz cloon mâyh loh toh hopb tymb." ⁴⁷ Nzof yaz naic woax tauh munh sab coong, "Mâyh six mănv nyăngz sây yeh? woax tauh sab tauz coong, "yaz six Bê-tu-ên nyăngz sây, Na-cô, nyăngz sây, nănh nyăngz au six Miny-ca, nzof yaz songđ tăngh bah đoz quinb phunz nănh, yâuc năngx zoz sămh taih tăngh phunz nănh. ⁴⁸ Nzof yaz songđ quâyc nzac nib ninyh paix yaz nyăngz zâu Apv-ra-ham, nyăngz Zâu Ye-hô-wa, Tênb-Hungh. Nănh phunz yaz ninyh tuz toix jau, yâuc phunz yaz ninyh tuz toix nănh nyăngz stunz sab phunz yaz nyăngz zâu nongc ayx bongf. ⁴⁹ Six coong nâyx zanyf nyâuh năngđ bênc nyâuđ stipx yaz nyăngz zâu pyau munh nyăngz woac, jođ bux phunz yaz pâyz, năngđ max nyeenc lauf zuc coong bux phunz yaz pâyz six cayx zuc ayx laix. ⁵⁰ La-ban cloon Bê-tu-ên tauz coong, "Nâyx đomc dlayc six Zâu Ye-hô-wa, bênc taih, buz max hayh cloon mâyh coong gongx, max six coong huđ. ⁵¹ Yec Rê-bê-ca, yămz mâyh lâyc cah đangc, mâyh phanv ênz nănh muf phunz mâyh nyăngz zâu nongc ayx bongf, âyz năngđ Zâu Ye-hô-wa bux nyăngz woac nâyx." ⁵² Apv-ra-ham, nyăngz pâuz numđ nănh stiz coong nâyx đomc woac, nănh songđ quâyc nzac nib ninyh paix Zâu Ye-hô-wa. ⁵³ Nzof nănh songđ zoz nongc sămz nongc nyanh zâyx taih nongc zoongz stynb gwuyz quav nyăngz tungh zăngc taih sangđ phunz woax tauh sab, Rê-bê-ca, năngx zoz saix nyăngz tungh zăngc taih sangđ phunz woax nâyx tauh sab nyăngz tah, cloon woax tauh sab nyăngz nzif pha. ⁵⁴ Woax zanyf, Apv-ra-ham nyăngz pâuz phunz woax đomc tungh zăngc tuz nzuf nzof, lêpc nănh ninyh woax đomc munh songđ tinyh đoih nhlync năngv. nănh stiz songđ phâyx woa ah munf, nyâyc đoomz quef taih, nănh stiz coong, "Jođ phunz buz phunb đangz muf buz nyăngz zâu woa gôh!" ⁵⁵ Nâyx tauh sab nyăngz tah, cloon nănh nyăngz nzif bux coong, "Six zuc phunz nâyx tauh sab cloon buz yămz nây ah dlapc cox săpc noib nâyx, nănh nzăngđ tuz ninyh." ⁵⁶ Six woax tauh pâuz tauz coong, "Jođ năngx gâyf ngaih buz, jođ phunz buz phunb đangz muf buz nyăngz zâu woa. Wâyc zuc Zâu Ye-hô-wa, pêuz phunz buz taih yăngh jau." ⁵⁷ Nănh stiz bux coong, "ha buz êu nâyx tauh sab taih naic nănh mangc jađ nănh nyâyh ayx laix." ⁵⁸ Nănh stiz songđ êu Rê-bê-ca, taih naic nănh coong, "Mâyh oix lêpc nâyx đomc yâuf muf max? nâyx tauh sab tauz, hưrb yaz oix muf lêc đêh." ⁵⁹ Nănh stiz songđ phunz nâyx tauh sab nyăngz stayx, cloon nâyx tauh sab nyăngz nâuh sab, lêpc Apv-ra-ham, nyăngz pâuz buz yăngh jau phunb đangz muf. ⁶⁰ Nănh stiz poou woac sađ pôz phunz Rê-bê-ca, coong, "Buz nyăngz stayx lex, jođ phunz mâyh ayx sax panc munh nyăngz nzif, yâuc phunz mâyh nyăngz sây stunz hayh zab tuz stipx mâyh yônz zaz nyăngz stengv dlanyh." ⁶¹ Rê-bê-ca, cloon nănh nyăngz pâuz bênc tungh zăngc dloih nzuf songđ lekb staox loh toh cah tănf ninyh zâyh, lêpc Apv-ra-ham, nyăngz pâuz buz muf, năngđ naz nâyx tauh pâuz songđ ênz Rê-bê-ca, lêpc nănh muf nănh nyăngz zâu woa. ⁶² Y-sakv, năngx yămz, Nê-gepv, nănh nzăngđ tăng Bê-e-la-za, phunb đangz lauf. ⁶³ Naih ah noib gungh cayx nzămc, Y-sakv, ninyh woa jêmh, nănh zaub mynb mangc phătc naih ah peob loh toh quaix nănh woa taih. ⁶⁴ Rê-bê-ca, lauf zaub mynb mangc phătc Y-sakv, nănh songđ coonx đanyz nzac loh toh taih. ⁶⁵ Nănh naic Apv-ra-ham, nyăngz pâuz coong, "yămz woax đangđ woa jêmh, nănh cayx quaix nây taih woax tauh ya munh six mănv neh? nâyx tauh pâuz tauz coong, "nănh six yaz nyăngz zâu nyăngz toonz geh." Nâyx tauh sab songđ zoz tungh mynb buyx taih tăng mynb. ⁶⁶ Nâyx tauh pâuz songđ lănv nzuf nănh ayx nyăngz dlayc bux bây Y-sakv mungv. ⁶⁷ Y-sakv, songđ ênz Rê-bê-ca, nzac nănh nyăngz nzif Sa-ra, nyăngz njiuh njaf muf, căpx nănh nongc ayx au. Yâuc hâuđ lênh nâyx tauh sab. năngđ naz Y-sakv, songđ tuz nănh nyăngz au taih stăngc nănh zay stauh, wâyc zuc toix nănh nyăngz nzif quaix stâyv. Apv-ra-ham nyăngz pyau munh