5 ¹ Njâuv Zâu stăngc nzâux pănh tuz ayx pungx goib nyăngz munh nzof, oix zuc zeen tingc, nongx gâyf zef năngx ninyh nzâyz đoouc-lif gâyf nyăngz bănx tanz. ² Mungv gongx yaz Phao-lô bux nyâuh yâuf pez nâyx đomc jau bex! Six coong nyâuh yâuf pez năngx staix phunb đangz muf lêpc đoouc-lif gâyf ayx quaix catz nyăngz gâyf têx, Njâuv Zâu six max naih stuyh muc phunz nyâuh yâuf pez gôh. ³ Yaz năngx bux woax đomc muif lanh munh toonz tuz ayx quaix catz nyăngz gâyf woax đomc munh, six zuc ayx âyz đoouc-lif gâyf năngx nzuf. ⁴ Nyâuh yâuf pez oix lêpc Đoouc-lif gâyf bix tuz cloon Tênb-Hungh hopđ nyâuđ nyăngz munh lex! Nyâuh zuc gâyh đutb Njâuv Zâu gôh, ayx Tênb-Hungh nyăngz Pôz tađ nzuf. ⁵ Six pănh naih tync mungc songđ tuz hipđ ayx pengh stymz nyăngz munh, pănh six zuc nongc seenz stymz coouv Singx-lingh joomz nyâuđ zu. ⁶ Wâyc zuc pănh cloon Njâuv Zâu songc mengc Săngh, Quaix catz cloon max quaix catz nyăngz Gâyf max nongc seen, nongc seen quaix six zuc lanh stăngz lanh. ⁷ Nyâuh yâuf-pez tinyh tâu tyuv yoiz, laiv lanh tăng nyâuh yâuf-pez lêpc seenz gâyf? ⁸ Jaf nyâuh yâuf-pez woax tauh max zâyf êu nyâuh yâuf-pez woax tauh đêh. ⁹ Six zuc năngđ cayx buôngh, ah tix nzu piny) ayx tuz ah coongh văn phutx nzuf. ¹⁰ Six yaz zeen tingc nyâuh yâuf-pez cloon yaz max naih pitc tyuh nyâuđ nyâyh njingc, Six sêu lunc nyâuh yâuf-pez woax đomc max jez laiv lanh songđ zuc tingc Stoif. ¹¹ Yâuf-pez lex! Six coong yaz năngx lănv bux êu munh ayx quaix catz nyăngz gâyf têx, Ha yaz săngh laix zâyf năngx zuc munh ayx peo? Six coong yaz năngđ năngx nzaox êu munh quaix catz nyăngz gâyf têx! Yaz lănv săpc đăngc zax nyăngz gâyf songđ max naih laiv hungđ phunz munh nzêmh. ¹² Jic tuz sêu nyâuh yâuf-pez lunc woax đomc munh, max zâyf cungb ayx quaix catz nyăngz Gâyf cungv, ymz njynh cloon tix njynf năngx nzuf. ¹³ Songx yâuf-pez lex! Tênb-Hungh êu nyâuh taih ayx pungx goib nyăngz munh nzof, six max tuz dluyh stymz ninyh pamf Stoif, songđ zuc lanh stăngz lanh, yâuc lanh Canyx bongc lanh. ¹⁴ Wâyc zuc Đoouc-lif Gâyf yeetx stong dlonf săngh ah tyuh coong, “seenz zuc lanh stăngz lanh. Năngđ stăngz pănh nyăngz stynb nâyx. ¹⁵ Six coong nyâuh yâuf-pez năngđ stanyđ hauđ lanh tăpc lanh, lanh naz lanh six zuc buôngh, nâyx tauh six zuc pitc tauh hoiđ tayc stutc nzuf. Oix zuc phunz Singx lingh yeenv pănh ¹⁶ Yaz coong nyăngz âyz gâyf six năngđ nâyx, six zuc phunz Singx-lingh yeenv nyâuh yâuf-pez, năngx gâyf âyz Stoif-munh nyăngz stymz nyâuđ cănh nyâyh ayx. ¹⁷ Âyz bamh munh stymz nyâuđ nyâyh nyăngz jau cloon Singx-lingh six max tinyh zuc, Singx-lingh oix ayx nyăngz dlayc yâuc max hođ bamh munh nyăngz stymz nyâuđ, nây iz hungđ songđ pênx yônz zaz, nyâuh songđ max hayh ayx âyz stymz nyâuđ nyâyh. ¹⁸ Six coong phunz Singx-lingh yeenv nyâuh yâuf-pez têx, nyâuh songđ max zuc yămz Đoouc-lif gâyf cah đi. ¹⁹ Bamh munh nyăngz stymz oix ayx nyăngz dlayc six năngđ nâyx, ayx max đăngb zengh, tinyh phanv ayx pongz lauh nyăngz dlayc. ²⁰ Paix miuc hanyh, ayx papz, lanh hănđ lanh, nzengz zax, panx zax, stâyx munz, yâuc nzengz ayx lub phunz ayx sax peob. ²¹ Hănđ munh hopb tyu bynz, căpx dlonf ayx huđ dlayc. nâyx đomc woac yaz bux nyâuh quaix nzof, six nâyx zanyf yaz năngx bux nyâuh yâuf-pez tymb, laiv lanh ayx nâyx đomc dlayc six max tuz stipx Tênb-Hungh nyăngz Côkz. ²² Six Singx-lingh stengb taih nyăngz dlayc six năngđ nâyx, phunz munh naih nyâuđ hâuđ lênh munh. Yâuc phunz munh naih hônb-hiđ naih pengh oonz, naih stymz stăngz munh. ²³ Ayx nyâuđ dlênc nyangc munh. nâyx đomc dlayc Đoouc-lif Gâyf max cangđ. ²⁴ Seenz ayx Njâuv Zâu nyăngz Munh woax đomc, songđ zoz nănh stiz bamh munh ayx Stoif nyăngz oix tingz ănz săpc đăngc zax nzuf nzof gôh. ²⁵ Pănh coouv Singx lingh tuz săngh, songđ zuc phunz Singx-lingh yeenv jau. ²⁶ Năngx Gâyf zanyb lub, lanh ayx peo lanh. Lanh hănđ lanh. Oix zuc lanh stăngc lanh