4 ¹ Yaz Phao-lô, zuc yămz nzauh six wâyc Zâu Yê-su. Yaz bux bây nyâuh yămz nây stâyv sangc six zuc yămz năngx payh Zâu Tênb-Hungh. Nănh êu nyâuh taih năngđ ayx laix yămz nzăngđ tuz naih săngb mengc. ² Six zuc ayx muif hungđ dlayc nhlimc ayx jeenz, ayx stymz đao, ayx nyâuđ dlênc, lanh stăngz lanh. ³ Pănh tuz Singx-lingh stayb seen đăngz six zuc lanh cloon lanh hopđ stymz dlongh âyx yămz pengh stymz. ⁴ Songc ah nomz stynb, ah tauh Singx-lingh, ah tauh Tênb-Hungh êu nyâuh yâuf pez taih stipx Ah nomz njih mungc tync. ⁵ Cungb naih ah tauh Zâu, ah nomz seenz stymz, cloon ah hungđ quaix womz nyăngz Gâyf. ⁶ Cungb naih ah tauh Zâu Tênb-Hungh. Ayx nyeenh mănh nyăngz Pha. Nănh ayx Zâu cun muif hungđ, Nănh yămz nzêux muif hungđ munh nyâuđ njaf. ⁷ Njâuv Zâu sađ sâuđ nyâyc gongx phunz muif lanh munh. ⁸ Wâyc năngđ ha, Canyx-Stâub songđ ja coong, “Nănh staox njăngb quaix nyăngz tync woax zanyf, Nănh ênz ah peob Stoif-munh cloon Nănh ninyh, “Yâuc sađ Pôz phunz bamh munh. ⁹ Canyx-Stâub ja coong, “Staox njăngb woax zâux woac nyăngz âyz Gâyf six lungđ? âyz Gâyf six zuc nzac tauv nây bamh canz hav quaix nyăngz tync. ¹⁰ Nzac taih woax tauh Yê-su. Six staox năngx njăngb quaix muif tab Gungh, yâuc yămz pong nyeenh mănh woax tauh. ¹¹ Njâuv Zâu sađ sâuđ nyâyc phunz nâyx lanh ayx stâyb sây, woax lanh ayx tâuc munh munh nzônh cuđ jeenx, ah phanx ayx stênx stengb nzaox gâyf. ¹² Tênb-Hungh bênc săngh nâyx hungđ sâuđ nyâyc sađ phunz đăngb zengh nyăngz pec stingx. Wâyc zâyv phunz Njâuv Zâu nyăngz stynb zoongx taih. ¹³ Zu tauv pănh songc nyâuđ naih seenz stymz zeen gongx, pâyz tauv Tênb-Hungh nyăngz Sây. Pănh nyăngz mengc hoonh songđ lub taih pênx munh côx. Clakx-clunh nzuf năngđ Njâuv Zâu nâyx. ¹⁴ Tauv woax zanyf, pănh songđ max zâyf munh sây nzof gôh. Max zâuđ zuc cuyx quaiz nyăngz munh nzaox nây nzaox woa jaf pănh plungh plănb năngđ nzaox sâyb đangđ nzungh nzaz. Nănh stiz cuyx quaiz zongđ coong puv maoh nyăngz woac jaf hox munh ninyh yăngh longđ jau lêpc za gâyf. ¹⁵ Six zuc nongc stăngz munh nyăngz nyâuđ coong seenz gâyf, pănh songđ săngh munh côx lub taih, ayx pyây năngđ Njâuv Zâu* ¹⁶ Njâuv Zâu stynb sangc nyăngz muif hungđ taux tuz tinyh hođ taih, sanz taux sanz, nyoiz taux nyoiz. Stynb sangc nyăngz muif hungđ taux ayx tuz hopđ woax zanyf, songđ lanh stăngz lanh ah manc lub taih. Lêpc Njâuv Zâu tuz taih nyăngz săngb mengc ¹⁷ Yaz tym Zâu Yê-su nyăngz bux êu nyâuh yâuf pez. Năngx gâyf yămz năngđ max zeen Zâu nyăngz munh nâyx. Nănh stiz nyâyh nyăngz dlayc seenz max săngh nongc. ¹⁸ Nănh stiz max oix mungv, yâuc max oix pâyz tuz tauv săngh mengc nyăngz jau. Nănh stiz oongx nzongf songđ max hayh tuz stipx Tênb-Hungh sađ phunz nyăngz phănc. ¹⁹ Nănh stiz ayx mynb đupx, max pâyz tuz nyayz, tinyh phanv âyz nyâuđ cănh nyâyh ayx muif hungđ bah lotb nyăngz dlayc. ²⁰ Six Nyâuh yâuf pez âyz Njâuv Zâu nyăngz gao năngx gâyf ayx năngđ nănh stiz. ²¹ Nyâuh yâuf pez songđ tuz hođ pâyz tauv Zâu Yê-su nzaox quaix seenz gâyf nyăngz jau. ²² Six zuc quanyf quengx pănh nyăngz lôx mengc. Yâuc zuc quanyf jaf nyâuh oix ayx huđ woax hungđ lôx mengc. Lôx mengc songđ ah manc quaiz nzuf. ²³ Nyâuh yâuf pez seenz zuc phunz Tênb-Hungh coi nyâuh nyăngz nyâuđ yeenv nyâuh nyăngz âyx pênx săngb nyăngz taih. ²⁴ Yâuc pênx săngb munh, nâyx hungđ mengc Zâu Tênb-Hungh zâyx taih năngđ nănh nâyx. Nyâuh săngh seenz gâyf songđ gongx nzongf. ²⁵ Nyâuh yâuf pez six zuc quanyf puv maoh jaf munh nyăngz woac. Lanh cloon lanh coong seenz woac. Wâyc zuc pănh muif lanh munh six săngh ah nomz stynb. ²⁶ Six coong siv nhleenx năngx gâyf ayx taih pamf Stoif. yâuc năngx gâyf siv nhleenx săngh noib tauv gungh nzămc. ²⁷ Yâuc năngx gâyf phunz Manđ naih congv nzac taih. ²⁸ Lôx noib ayx stac nymc laiv hungđ woax đomc munh yâuc zuc quanyf năngx gâyf ayx, six zuc nongc pănh nyăngz puf ayx săngh nongc nyăngz cumh pâuz yungf pănh nyăngz mengc yâuc stăngc munh zâuđ munh. ²⁹ Năngx gâyf bây nyâuh yâuf pez nyăngz nzeetx coong seetb max pênx nyăngz woac, six zuc coong hayh stăngc tuz phunz munh naih lôif nyăngz woac. ³⁰ Yâuc năngx gâyf ayx bây Zâu Tênb-Hungh nyăngz singx-lingh stauh. Wâyc zuc Tênb-Hungh phunz Singx-lingh yămz nyâuh yâuf pez six năngđ tăpb yeenx nâyx ayx zanyx manyf houđ nyâuh. Zu tauv môtc zapz Nănh năngx taih Njâuv nyâuh yâuf pez. ³¹ Seenz zuc quanyf ymz nyăngz nyâuđ, năngx gâyf hănđ munh. năngx gâyf siv lub tinyh panx. Năngx gâyf coong woac zokb munz munh nyăngz nyâuđ. ³² Lanh zuc ayx gongx phunz lanh, lanh stăngz lanh. lanh quanyf lanh ayx peo nyăngz dlayc, năngđ Zâu Tênb-Hungh nongc Njâuv Zâu quanyf nyâuh yâuf pez ayx longđ nyăngz Stoif nâyx. Oix zuc ayx cumh pâuz payh yămz gwăngz