2 ¹ Yaz oix nongc nyâuh yâuf pez pâyz tuz yaz nzac jab ayx cumh pâuz zâuđ wâyc nyâuh yâuf pez yămz Lau-đi-sê, cloon max zengx tuz pongh yaz quaix nyăngz munh. ² Yaz oix nongc nyâuh yâuf pez zeen tingc, hopđ stymz dlongh âyx lanh stăngz lanh. Hayh zeen tingc, songđ pâyz nzuf Tênb-Hungh max zengx phunz plongx yangh nyăngz dlayc six yămz Njâuv Zâu. ³ Muif hungđ saix nyăngz Tongb-manyh cloon bănh sangz six zaub ănz nănh nyăngz tync cah njaf. ⁴ Yaz coong nâyx đomc woac phunz nyâuh yâuf pez, wâyc max phunz nzeetx blangc nyăngz munh nongc cuyb mungv nyăngz woac jaf zuc nyâuh yâuf pez. ⁵ Max cun yaz nyăngz stynb max cloon nyâuh yâuf pez yămz. Six yaz nyăngz stymz nyâuđ yămz stătx nyâuh. Yaz tuz phătc nyâuh yâuf pez nyăngz seenz stymz zeen wăn Njâuv Zâu. Yaz seenz numđ nyađ nzongf. Njâuv Zâu phunz munh naih clakx-clunh nyăngz mengc ⁶ Wâyc zuc nyâuh yâuf pez tuz stipx Njâuv Zâu Yê-su ayx Zâu. songđ zuc săngh yămz nănh cah njaf. ⁷ Oix zuc nzac đungh năngx đôz yămz nănh cah njaf zâyv quaix taih zeen wăn. Năngđ munh nzaox nyâuh quaix nâyx yâuc naih nyâuđ clo ănz. ⁸ Six zuc buôngh stymz, năngx gâyf phunz laiv lanh nongc bamh munh nyăngz tongb-manyh nyâyh seetb taih nyăngz gâyf jaf nyâuh yăngh longđ jau. Jaf munh nyăngz jau six tăng cun đamx gungh woax tauh manđ nyâyh seetb taih wengh nyâuh. Wâyc âyz bamh munh nyăngz stungz zez tâuh. Max zâyf tăng Njâuv Zâu seetb taih. ⁹ Wâyc zuc Tênb-Hungh nyăngz stymz nyâuđ nyâyh muif hungđ six yămz njâuv Zâu nyăngz stynb dloih nzuf. Tăng nănh năngx săngh yămz nây nib mync. ¹⁰ Nyâuh yâuf pez naih dloih nzuf muif hungđ nyâuh sămv nongc nyăngz laiv hungđ six yămz Njâuv Zâu nyăngz cah njaf, Nănh six naih dloih muif hungđ nyăngz Zâu. muif hungđ nyăngz hungh. ¹¹ Nâyx zanyf nyâuh yâuf pez tuz stipx ah hungđ quaix catz nyăngz gâyf njămx săngb yămz nănh cah njaf, max zâyf nongc munh puf catz, Quaix catz nyăngz Gâyf six yămz Njâuv Zâu Yê-su nănh zuc tayc nyăngz jau, nyâuh yâuf pez nyăngz stynb songđ tuz zay đutb pamf Stoif nyăngz jab. ¹² Nyâuh yâuf pez quaix womz nyăngz gâyf woax zanyf, songđ tuz plopx cloon Njâuv Zâu Yê-su, yâuc tuz cloon nănh săngh phunb stengb taih quaix seenz stymz, six Tênb-Hungh nyăngz lanyf, seenz hayh ayx phunz Njâuv Zâu Yê-su tayc blătc năngx săngh phunb stengf taih woax hungđ lanyf. ¹³ Cah đangc noib wâyc nyâuh yâuf pez pamf Stoif yâuc max ayx (quaix catz nyăngz gâyf) max quanyf pamf stoif nyăngz stymz, nyâuh songđ longđ zuc tayc. six Tênb-Hungh phunz nyâuh yâuf pez cloon Njâuv Zâu săngh phunb stengb songđ quanyf nzuf pănh nyăngz stoif zaix. ¹⁴ Nănh stotb pănh zuc tingc stoif nyăngz zaix tanz, ja cloon đoouc lif tanz lêpc, six cloon pănh tinyh nzengz nyăngz gâyf, zoz ninyh tingz ănz săpc đăngc zax nzof gôh. ¹⁵ Tênb-Hungh phunz nănh yămz săpc đăngc zax nyăngz gâyf tuz hingh quaix cun đamx yâuh naih quênh naih lanyf cun dlayc woax đomc, Năngx toongx songx munh ênz nănh stiz ninyh năngđ zuc zab tuz seetb taih nyăngz munh nâyx, phunz yămz nây bamh canz nyăngz munh tuz phătc yaz nyăngz lanyf hingh quaix. Max tuz lêpc bamh munh njăpc taih nyăngz gâyf ¹⁶ Wâyc năngđ naz nongx gâyf bây laiv lanh wâyc pănh nhlinc hopb nyăngz jau, Quaix stêtz nyăngz gâyf, mah six quaix săngb lav nyăngz stêtz, mah six tingc congz noib nyăngz gâyf pib nyâuh. ¹⁷ Nâyx đomc dlayc six cungb ayx bah cloiz goib yangh đangz phanx oix seetb taih nyăngz dlayc. Seenz nyăngz stynb six Njâuv Zâu. ¹⁸ Nongx gâyf bây laiv lanh yônx nyâuh yâuf pez yâuc nongc nănh stiz nyăngz zux ix yac nyâuh yâuf pez nhlimc ayx jeenz canyx paix Stynz-munh. Woax đomc munh cungb lănv nănh stiz phătc nyăngz dlayc, yâuc âyz bamh munh oongx nzongf nyăngz zux ix zanyb lub. jaf phunz nyâuh yâuf pez nyăngz sâuđ nyâyc tuih. ¹⁹ Woax hungđ munh yâuc max coouv Njâuv Zâu ayx pyây. Pyây yâuc ayx coonz phunz stynb taux tuz hopđ, jaz taux jaz, sanz taux sanz, âyz Tênb-Hungh nyăngz zux ix clopb taih săngh ah nomz stynb stayđ lub taih. ²⁰ Ha nyâuh yâuf pez cloon Njâuv Zâu zuc tayc tuz gâyh đutb cun đamx yâuh naih quênh naih lanyf cun dlayc nyăngz manđ nzof, ha săngh laix nyâuh yâuf pez yâuc năngx yămz năngđ bamh canz munh? nyâuh wâyc săngh laix lauf năngx lêpc bamh munh njăpc taih nyăngz gâyf? ²¹ Nănh stiz coong, “năngx gâyf nhlync nâyx đomc, yâuc năngx gâyf đopx woax đomc, yâuc max tuz lumz pitc hungđ.” ²² Six nâyx đomc yeetx stong muif hungđ năngđ nzuf songđ pac, nâyx đomc cungb pênx bamh munh njăpc taih nyăngz muif hungđ cloon bamh canz munh nzaox nyăngz woac. ²³ Nzăngđ phătc six năngđ munh naih tongb-manyh, canyx paix âyz nănh stiz nyâyh seetb taih nyăngz gâyf, jaf nhlimc ayx jeenz, ayx phunz stynb zuc zâuđ, six nâyx đomc muif hungđ max naih lungđ stuyh, yâuc max stăngc tuz munh nyăngz stynb sangc oix ayx nyăngz jau! Săngb mengc six yămz Njâuv Zâu ye-su