8 ¹ Nâyx đomc munh tayx Ê-tiên Sau-lơ lauf numđ nyađ. Phao-lô ayx peo huyđ đăngb munh Tăng woax noib munh quef coonz ayx peo hoiđ munh lêpc Zâu nyăngz munh Yămz Ye-lu-sa-lem stengv nyăngz Huyđ-đăngb zâuđ nzongf, “Seetb blătc cumh pâuz munh, zeen Yê-su nyăngz munh tyuv đanv nzuf, Tyuv ninyh yămz Yu-đê stengv, Cloon Sa-ma-li Stengv.” ² Naih ah đomc munh lêpc Zâu gongx, songđ nzâyz Ê-tiên nyăngz stynb stayđ ninyh plopx (mokb) yâuc haoh tuz caux Stâuv. ³ Six Sau-lơ oix mêtc Huyđ đăngb songđ jămc pyau ninyh lov zeen Yê-su nyăngz munh, Zoz munh nzif munh pha nzâyz ninyh clăngđ ănz nzauh nzuf. Phi-lipv ninyh yămz Sa-ma-li stengv ⁴ Six nănh stiz lunc ninyh tauv laiv, Yâuc lănv cuđ jeenx tauv woa.” ⁵ Phi-lipv, Ninyh tauv Sa-ma-li Stengv lănv bux munh coong Yê-su Six ayx Njâuv Zâu. ⁶ Songx nunh numđ Phi-lipv coong nâyx đomc woac, yâuc phătc nănh ayx jix-caox njingc nyăngz dlayc, Nănh stiz songđ mungv nănh lănv.” ⁷ Phi-lipv luiđ Stanyv manđ seetb đungx lanh munh nyăngz stynb, manđ tyuv seetb ninyh yâuc hamv ngwăngz-ngwăngz têx, Naih munh đungx staux quac, staux ngokx yâuc tuz zany gongx.” ⁸ Yămz woax nomz stengv nyăngz munh seenz numđ nyađ nzongf. Ayx papz woax tauh Si-môn ⁹ Naih ah lanh munh bux hipđ ayx Si-môn, Nănh yămz woax nomz stengv ayx papz lauh nzongf, Sa-ma-li stengv nyăngz munh yâuc phătc nănh njingc, Nănh yâuc cănh tanv nănh naih manyh yangh.” ¹⁰ Muif lanh munh tăng munh gunx tauv côx, tinyh đoih mungv Si-môn yâuc lanh bux lanh coong, “Lâyc tauh ya munh lauf naih ah hungđ Tênb-Hungh nyăngz quênh, six munh hipđ ayx đaic quênh woax Tauh.” ¹¹ Si-môn ayx papz jaf munh lauh nzongf, stâyz zâuv munh tinyh đoih yâuc zeen lêpc Nănh. ¹² Six Phi-lipv lănv tauv Tênb-Hungh nyăngz cuđ jeenx, yâuc coong Yê-su Six ayx Njâuv Zâu, Songx munh songđ zeen nănh nyăngz woac. Njynh toonz cloon sab tinyh đoih nyunc ayx quaix womz nyăngz Gâyf.” ¹³ Si-môn lauf zeen, Yâuc quaix womz nyăngz gâyf, Nănh muif dlih lêpc Phi-lipv ninyh, Nănh phătc Phi-lipv ayx Jix-caox njingc nyăngz dlayc, Nănh seenz nyâyh ganc nzongf. ¹⁴ Cumh pâuz munh yămz Ye-lu-sa-lem Stengv numđ munh lănv coong, “Sa-ma-li Munh stipx Tênb-Hungh nyăngz woac, Nănh stiz songđ êu Phê-rơ Cloon Giăng ninyh woa tayđ nănh Stiz.” ¹⁵ Phê-rơ cloon Giăng ninyh tauv songđ đoouv coouv Zâu phunz Sa-ma-li munh tuz stipx Singx lingh.” ¹⁶ Wâyc zuc Singx lingh max zengx nzac taih cloon laiv lanh yămz, munh cungb tym Zâu Yê-su nyăngz bux ayx quaix womz nyăngz gâyf. ¹⁷ Phê-rơ, cloon Giăng Songđ tăpx puf ănz muif lanh munh đoouc coouv-Zâu, Nănh stiz nzăngđ tuz stipx Singx lingh.” ¹⁸ Si-môn phătc cumh pâuz munh tăpx puf ănz laiv lanh yâuc tuz stipx singx lingh, nănh songđ zoz nyanh clôc phunz stiz lanh cumh pâuz munh. ¹⁹ Nănh coong, “Jođ phunz nâyx hungđ quênh yaz, Phunz yaz hayh tăpx puf ănz laiv lanh yâuc tuz stipx Singx lingh. ²⁰ Phê-rơ tauz Nănh, “Mâyh nyâyh taih, Mâyh laic stăngz six mâyh hayh nongc nyanh stynh maif tuz Tênb-Hungh nyăngz pôz naz! Mâyh cloon mâyh nyăngz nyanh stynh songđ seenz zuc mêtc nzuf.” ²¹ Mâyh yămz buz nyăngz mungh tongx max naih mâyh nyăngz phănc. Wâyc zuc Tênb-Hungh phătc mâyh stymz nyâuđ max zanyx.” ²² Mâyh six zuc coi nyâuđ quanyf mâyh ayx nzuf muif hungđ huđ dlayc, yâuc zuc nhlimc stoif jođ Zâu, naih dlih mengc gongx songđ tuz Zâu quanyf mâyh nyăngz Stoif.” ²³ Yaz phătc mâyh nyăngz stymz nyâuđ imz-lemb pong nzuf zuc Stoif stayb mâyh.” ²⁴ Si-môn coong bux Nănh stiz Jođ nyâuh iz lanh đoouc coouv Zâu phunz yaz, max phunz yaz pongh zuc nâyx đomc dlayc.” ²⁵ Phê-rơ cloon Giăng lănv Zâu Yê-su cuđ jeenx nzuf, nănh stiz songđ phunb đangz muf Ye-lu-sa-lem stengv, muf bah đămx jau nănh stiz ninyh Sa-ma-li- Stengv đungx tyuh njăngv lănv cuđ jeenx phunz pec stingx.” Phi-lipv pob manyf Canyx stâub phunz quanz mungv ²⁶ Naih ah tauh Zâu nyăngz Stynz-munh bux Phi-lipv coong, “Mâyh six zuc yăngh namh phanx woa stynz jau, Tăng Ye-lu-sa-lem ninyh Ga-sa woax stynz jau jeenz six vâyv.” ²⁷ Phi-lipv seetb jau ninyh woax zanyf, nănh pongh ah lanh munh bux hipđ ayx Ê-thi-ô-bi, Ayx quanz munh, nănh six ah lanh ayx quanz cun nyanh coh phunz Can-đakv, munh nzif hungh stix, Ê-thi-ô-bi, nănh ninyh Ye-lu-sa-lem Stengv Canyx-bongc Zâu. ²⁸ Phunb đangz lauf bah đămx jau nănh stâyv woa maf sex toc Ê-sai Stênx stengb ja nyăngz stâub.” ²⁹ Singx-lingh coong bux Phi-lipv, mâyh coonx ninyh năngx saic woax saz sex jađ geh!” ³⁰ Phi-lipv luiđ ninyh tuz tauv woa maf sex cah synh, “Numđ nănh toc Ê-sai Stênx stengb ja nyăngz Stâub, Phi-lipv naic nănh coong, “Mâyh saz nâyx đomc âyz gâyf max?” ³¹ Quanz songđ tauz, “Max naih mănv pob manyf bux yaz, yaz ayx laix hayh pâyz? Nănh songđ êu Phi-lipv Stâyv nănh woa cah synh. ³² Quanz toc nâyx yămc Canyx-stâub six coong năngđ nâyx, “Nănh six năngđ tauh Pa-jiz yungh zuc nzâyz ninyh tayx ayx a, “yâuc zuc munh ênz ninyh nzunb pyâyz Nănh yâuc max nyaoc. ³³ Nănh zuc munh nongc Gâyf jaz hoiđ Nănh, “Max naih laiv lanh tuz lănv tauv Nănh nyăngz six miuh. “Wâyc Nănh yămz bamh canz nyăngz mengc jac nzuf.” ³⁴ Woax tauh quanz naic Phi-lipv coong, “Jođ mâyh lănv bux yaz gôh, “Nâyx tauh tâuc woac munh coong toix mănv? Cănh coong zuc nănh mah six coong pitc tauh? ³⁵ Phi-lipv, songđ quef coonz nongc Ê-sai ja nâyx yămc Canyx-stâub lănv tauv Zâu Yê-su phunz nâyx tauh quanz mungv. ³⁶ Nănh stiz stâyv woa sex ninyh lauh, Phătc nomz tync naih womz, woax tauh quanz coong, “Mangc geh! Yămz nây naih womz, naih lungđ hayh nzez tuz yaz max hayh ayx quaix womz nyăngz gâyf max?* ³⁷ Phi-lipv tauz, “Six coong mâyh năngđ naih stymz zeen têx, quaix tuz lêc! “Quanz songđ coong yaz zeen Njâuv Zâu Yê-su Six ayx Tênb-Hungh nyăngz Toonz.” ³⁸ Coong nzuf, Quanz songđ êu sex yămf, nănh stiz iz lanh nzac woa womz ninyh, Phi-lipv songđ stăngc woax tauh quanz ayx quaix womz nyăngz gâyf phunz nănh.” ³⁹ Nănh stiz seetb womz taih, “Zâu nyăngz Singx lingh lênh dlih ênz Phi-lipv ninyh, “woax tauh quanz taux woa mangc max phătc nănh, Quanz songđ numđ nyađ muf pyau, ⁴⁰ Quaix đangz munh phătc Phi-lipv yămz A-sôtv stengv, Lănv cuđ jeenx tăng A-sôtv stengv ninyh tauv Sê-sa-rê stengv.” Phao-lô zeen Yê-su