28 ¹ Songx munh tinyh đoih tuz mengc seetb wăngx synh taih nzuf. nzăngđ pâyz tuz nâyx nomz coiđ nyăngz bux six hipđ ayx Man-tơ. ² Yămz woax nomz stâyz-Phangz nyăngz munh stipx buz gongx nzongf. Yâuc toix bungc lub gungh song, Nănh stiz songđ cuyx ah lâuh tâuf phunz buz siz.” ³ Phao-lô jom ah bokc stangh taih quanyf ănz woa tâuf lâuh, lênh dlih naih ah tauh năngz đokc seetb taih jeo Phao-lô nyăngz puf tăpc nănh.” ⁴ Yămz woax nomz coiđ nyăngz munh, Phătc nangz jeo Phao-lô nyăngz puf tăpc Nănh, Nănh stiz lanh bux lanh coong, “Lâyc tauh munh nyăngz luf naih dlih tayx munh quaix nzof gôh! hănđ six njâuv tuz đutb mengc max tayc lâyc coiđ, six gungh-nib max yongh, lauf max njâuh nănh.” ⁵ Six Phao-lô boongf nangz tuih nzac tâuf lâuh ninyh, yâuc max phătc nănh săngh laix. ⁶ Six yămz woax nomz coiđ nyăngz munh laic stăngz six nănh hayh omx, mah six ah zanyf nănh hayh yămh glinyf lâyc gôh naz, Six nănh stiz zu mangc lauh max phătc săngh laix. “Nănh stiz wănc ix coong, “lâyc tauh ya six ah tauh dlănh.” ⁷ Yămz woa naih batz cuyb bupv-liu nyăngz njingh, nănh yâuc ayx zâu cun woax nomz coiđ, Nănh six ah tauh naih manyh yangh gongx nyăngz munh, Nănh stipx buz ninyh yămz nănh nyăngz pyau pôz noib yâuc bokc dlic buz gongx nzongf.” ⁸ Bupv-liu nyăngz Pha Săngh gumc nyâuđ munz steođ phâyx woa zâuv Stynb sangc ah zanyf joomz zanyf song, Phao-lô nzac ninyh mangc tăpx puf ănz đoouc coouv Zâu Phunz songđ zany tuz gumc gongx.” ⁹ Yămz woax nomz coiđ săngh gumc nyăngz munh, tinyh đoih taih lov Phao-lô, Songđ tuz zany gumc gongx nzuf.” ¹⁰ Yămz woa nyăngz songx munh gwoanb stymz cloon buz gongx nzongf, Yâuc phunz đungx hungđ sâuđ nyâyc buz, Buz nzac đangđ woax zanyf, buz Sămv nongc nyăngz laiv hungđ, nănh stiz yâuc stungx nzâyz taih ănz woa đangđ tuz caux buz nongc.” Phao-lô ninyh Lô-ma nzêuh ¹¹ Buz Yămz Man-tơ coiđ tuz pôz lav, buz nzac ah saz đangđ, Six tăng A-likc-sơn taih zapz đangđ ănz woa quaix tongz dlih gungh, woax saz đangđ pyây naih zamf dlănh stengb toix nyăngz hanyh.” ¹² Buz songđ ninyh zapz đangđ ănz Si-ra-qui nyăngz jau nzeetx pôz noib.” ¹³ Tăng woa buz njăpc đangđ lêmh ninyh Rê-gum, Cah đangz oib, Namh Phanx nzaox sâyb taih, Buz năngx ninyh tauv Bu-tô-li.” ¹⁴ Buz ninyh tauv woa pongh ah đomc zeen Zâu munh, Nănh stiz êu buz yămz woa ayx đaoc ah jeetb, buz nzăngđ ninyh tauv Lô-ma nzêuh.” ¹⁵ Yămz woax nomz stâyz-Phangz nyăngz zeen Zâu munh, Numđ lănv coong buz taih tauv nây naz, Nănh stiz songđ numđ nyađ ninyh stipx buz, tăng A-bi-butv caiz, cloon Ba-Luv quanx tinyh ênz ninyh stipx buz. Phao-Lô phătc nănh stiz songđ hâuđ Tênb-Hungh, songđ numđ nyâuđ lomđ têx, Phao-lô yămz Lô-ma ¹⁶ Buz ninyh tauv Lô-ma nzêuh, Phao-lô tuz phepb yămz lanyc, Cungb naih ah tauh pengz cun nănh.” ¹⁷ Tuz pôz noib quaix đangz, Phao-lô, êu Yiu-thai munh côx taih dloih woa, Phao-lô lănv bux nănh stiz coong, “Songx Yâuf pez lex! Yaz max ayx laiv hungđ peo pănh nyăngz munh, Yâuc max ayx longđ pănh stung zez tâuh nyăngz gâyf. Six yaz zuc zoz yămz Ye-lu-sa-lem stengv, Nongc ayx Stoif-munh, Nzăngđ zuc ênz taih tauv nây Lô-ma nzêuh. ¹⁸ Nănh stiz Stămđ nzuf đungx hungđ max phătc yaz ayx longđ toix lungđ jic tuz tayx yaz tayc, songđ cayx ta pungx yaz gôh.” ¹⁹ Six yămz woa nyăngz Yiu-thai munh zengv yaz, Yaz songđ oix phunz Lô-ma nzêuh Sê-sa hungh pob yaz nyăngz dlayc, Six max zâyf yaz taih nây cooux cloon yaz songc Stingx nyăngz munh đêh. ²⁰ Wâyc năngđ nâyx, yaz songđ oix pongh nyâuh yâuf pez toix mynb coong woac. Yaz nzâyz nâyx stynz njab langb, Six wâyc yaz zeen Y-sa-la-ên munh nyăngz njih mungc tync.” ²¹ Nănh stiz tauz, “Buz max zengx tuz stipx Yu-đê Stengv nyăngz munh tix zây jeenx lănv tauv tah ayx nyăngz dlayc, Yâuc max numđ toix laiv lanh Yiu-thai munh nyăngz yâuf pez tăng woa taih tauv nây lănv tauv tah ayx saih toix lungđ dlayc đêh.” ²² Six buz oix mungv tah mâyh lănv mâyh nyăngz ix jênx, wâyc zuc buz pâyz tuz yămz nzêux stâyz zâuv đâuf munh oix pib nâyx hungđ đaof.” ²³ Phao-lô cloon woax đomc Yiu-thai munh, Đôngh ix sên ah noib nzomf tymb, Yiu-thai munh hongđ nzongf taih nzomf yămz Phao-lô yămz woax siênz zeb pyau. Nănh songđ cloon nănh stiz lănv woac săngh noib, nongc Mô-sê nyăngz Gâyf, cloon tâuc woac munh nyăngz Stâub. Lănv tauv Tênb-Hungh ayx Zâu cun munh nyăngz gâyf. Lov jau bux nănh stiz zeen Zâu Yê-su. ²⁴ Naih ah phanx zeen Phao-lô nyăngz woac, Six naih ah phanx max jiuc zeen.” ²⁵ Nănh stiz đanv lunc seetb ninyh, “Phao-lô cloon nănh stiz coong ah hungđ tymb, “Singx-lingh coong seenz toix nzuf pănh nyăngz stung zez tâuh, “Tâuc woac munh Ê-sai coong nyăngz woac.” ²⁶ Ê-sai coong, “Nyâuh six zuc ninyh bux nâyx đomc pec Stingx, “Nănh stiz hănđ mangc yâuc mangc max phătc, “hănđ mungv yâuc max saz.” ²⁷ Wâyc zuc nâyx đomc munh nyâuđ nhlengc, “Nănh stiz nzipx mâyc, Yâuc zeetx bah noomh. Năngđ max têx, “Nănh stiz nyăngz mâyc hayh mangc tuz Phătc, bah noomh yâuc hayh mungv tuz saz, Phunb đangz lauf lov yaz hayh songđ tuz zany gongx.” (Ê-sai 6:9-10) ²⁸ Phao-lô năngx coong, “Năngđ nâyx nyâuh six zuc pâyz, Tênb-Hungh nzâyz Nây Njâuv pôz taih, Lănv phunz max Zâyf Yiu-thai munh mungv.” ²⁹ Phao-lô coong nzuf nâyx đomc woac, Yiu-thai munh songđ tinyh nzengz seetb ninyh. ³⁰ Phao-lô yămz nănh câux taih nyăngz pyau tuz iz nyăngv, “Toix laiv lanh taih lov nănh yâuc numđ nyađ stipx.” ³¹ Nănh pungx stymz lănv Tênb-Hungh ayx Zâu cun munh nyăngz gâyf. yâuc zoz njâuv Zâu Yê-su nyăngz gâyf nzaox nănh stiz.” “Max naih toix laiv lanh cangđ tuz Nănh.”