21 ¹ Phunz gâyh nănh stiz, “Buz songđ nzac đangđ ninyh zac tauv côtv coiđ, Cah đangz noib buz ninyh tauv côtv stengv, nzof tăng woa quaix ninyh tauv Ba-ta-la muôngf.” ² Yămz woa buz phătc naih ah saz đangđ pungx lêmh cayx ta ninyh Phê-ni-si, stâyz phangz, Buz songđ nzac woax saz đangđ ninyh.” ³ Buz ninyh tauv zipv-zơ coiđ, mangc phătc woax nomz coiđ, Buz songđ zav quaix namh puôngz ninyh, Buz zav quaix staix phanx ninyh zac tauv Si-li, Buz ninyh tauv tia stengv songđ zăpx woa, Đangđ cayx pungx huv seetb taih.” ⁴ Buz yămz woa lov pongh batz lanh lêpc Zâu munh, Buz cloon nănh stiz yămz woax tuz ah jeetb, Singx lingh êu nănh stiz bux max phunz Phao-lô ninyh Ye-lu-sa-lem Stengv.” ⁵ Six buz yămz woa ah jeetb, Songđ seetb jau ninyh, yeetx stong zeen Zâu nyăngz munh, Njynh au sây tinyh đoih stungx buz seetb stengv cungh ngwoaic ninyh tauv woa coiđ synh, Songđ quâyc nzac coouv-Zâu.” ⁶ Phunz gâyh nănh stiz buz nzac đangđ ninyh, woax đomc zeen Zâu munh songđ phunb đangz muf pyau.” ⁷ Buz yăngh jau ninyh tăng tia stengv, Ninyh tauv Bê-tô-lê-mai, Buz zav ninyh tauv tayđ zeen Zâu munh, Cloon nănh stiz yămz woa ah noib.” ⁸ Cah đangz noib buz ninyh gâyh stengv Tô-lê-mai, ninyh tauv stengv Sê-sa-rê, Buz năngx ninyh tayđ (Mukc-sư) Phi-lipv. Woax đomc nhlic lanh lănv cuđ jeenx munh naih ah lanh.” ⁹ Nănh naih pyâyz lanh sab hayh coong stênx-stengb woac, Six nănh stiz max zengx zoz langh.” ¹⁰ Yămz woa batz lauh, Naih ah tauh Stênx stengb tăng Yu-đê Stengv taih tauv, Bux hipđ ayx A-ga-butv. ¹¹ Nănh jođ Phao-lô nyăngz stayb clai langb zoz taih stayb nănh nyăngz puf staux yâuc coong, “Singx-lingh bux coong nâyx, “Yiu-thai munh six nongc stayb đamx clai langb stayb yaz nyăngz Zâu, Stayb năngđ nây nâyx nzof nzăngđ jaoz phunz max zâyf Yiu-thai munh.” ¹² Numđ nzuf nâyx đomc woac, Buz cloon yămz woa nyăngz munh, Seetb jab jođ max phunz Phao-lô, Ninyh tauv Ye-lu-sa-lem Stengv.” ¹³ Six Phao-lô tauz, “Ha săngh laix nyâuh yâuf-pez bix haoh bây yaz nyăngz stymz nyâuđ Yiuf nzuf? Yaz max zâyf cungb nyunc zuc stayb yămz Ye-lu-sa-lem Stengv, Six yaz năngx bênc nyâuđ zuc tayc wâyc Zâu Yê-su nyăngz bux yămz Ye-lu-sa-lem stengv tymb.” ¹⁴ Hănđ cangđ max phunz Phao-lô ninyh Ye-lu-sa-lem Stengv, Nănh yâuc max mungv, Cungb coong jođ Zâu ayx âyz Zâu nyăngz zux ix.” ¹⁵ Blătc woa quaix đangz, buz songđ bênc ninyh Ye-lu-sa-lem Stengv.” ¹⁶ Naih ah phanx zeen Zâu munh tăng Sê-sa-rê lêpc buz ninyh, ênz buz ninyh tauv Na-son nyăngz pyau (tamc zuv) sec woa, Nâyx lanh munh stengb stâyv yămz Zipv-zơ coiđ. nâyx lanh six zeetx lanh zeen Zâu đangc nyăngz munh yămz nâyx nomz stâyz-phangz.” Phao-lô tayđ Gia-cơ ¹⁷ Buz ninyh tauv Ye-lu-sa-lem stengv, Zâu nyăngz munh numđ nyađ stipx buz.” ¹⁸ Tauv nyâyc noib, Buz cloon Phao-lô ninyh tayđ Gia-cơ, Cloon munh côx nzomf yămz woa.” ¹⁹ Phao-lô đeh nănh stiz lănv tinyh pongh woac nzuf, Nănh songđ lănv nzuf Tênb-Hungh phunz nănh yămz max zâyf Yiu-thai munh nyăngz tync ayx laiv hungđ dlayc, ²⁰ Yămz woa woax đomc munh numđ nâyx đomc dlayc, Songđ tanv Tênb-Hungh zâyf năngx coong bux Phao-lô, Tah lex! Tah phătc săngh tynb lanh Yiu-thai munh săngh zeen Zâu munh, woax đomc zeen Zâu munh six zuc phunz nănh stiz jomz nyâuđ lêpc Mô-sê nyăngz đoouc-lif gâyf.” ²¹ Nănh stiz numđ lănv coong mâyh yămz Yiu-thai munh nyăngz stâyz phangz, nzaox max zâyf Yiu-thai munh, êu nănh stiz six zuc quengx Mô-sê nyăngz gâyf, Max nongc ayx quaix catz nyăngz gâyf phunz munh sây. Yâuc max nongc lif âyz Yiu-thai munh nyăngz gâyf zez.” ²² Ha nâyx zanyf buz cayx ayx laix? Songx munh numđ lănv coong mâyh taih tauv nây tex buz! ²³ Mâyh six zuc ayx năngđ nâyx, Nâyx zanyf yămz nây buz naih pyâyz lanh munh nyunc woac cloon Tênb-Hungh.” ²⁴ Six nâyx zanyf mâyh six zuc lêpc nănh stiz ninyh, Yâuc cloon nănh stiz seetb stav wâyx nyanh, Phunz nănh stiz tâyv pyây. năngđ nâyx ayx phunz songx munh songđ hayh pâyz tuz nănh stiz tuz lănv woax đomc woac, Six max zâyf seenz, mâyh cănh ayx âyz Mô-sê nyăngz gâyf.” ²⁵ Six lôx noib buz ja ah zây jeenx bux nănh stiz zeen nănh stiz max zâyf Yiu-thai munh. Jeenx ja coong, “Max cuyb nhlync congx phunz Miuc hanyh nyăngz laiv hungđ, “Max cuyb nhlync samđ, “Yâuc max cuyb nhlync stanyb hauđ tayc stanđ nyăngz A. Yâuc max cuyb pamf pongz lauh nyăngz Stoif.” Phao-lô zuc munh zoz ²⁶ Tauv nyâyc noib, Phao-lô ênz woax đomc pyâyz lanh munh cloon nănh ninyh stav wâyx, Phao-lô năngx nzac gâyf paix pyau ninyh bux stayb-munh, năngx naih batz noib nzăngđ pong stav wâyx nyăngz noib, Tauv zomc woax noib, Muif lanh munh six zuc nongc stanyb lanyh Canyx-bongc Zâu.” ²⁷ Cayx pong woa nhlic noiđ, Tăng woa tiêuz-av taih woax đomc Yiu-thai munh taih jenx phătc Phao-lô yămz woa gâyf paix pyau, Nănh stiz songđ hox songx munh ayx huđ topz zoz Phao-lô.” ²⁸ Nănh stiz hamv coong, “Y-sa-la-ên munh lex! Taih cloon buz gôh! Nâyx tauh ya munh, Nănh ninyh nzêux Tênb-yaf nzaox êu munh mangc stam Mô-sê nyăngz gâyf, zengv pănh Yiu-thai munh nyăngz gâyf, Yâuc ênz max zâyf Yiu-thai munh nzac Đăngb-zengh nyăngz gâyf paix toongh taih, ayx phunz nâyx nomz tync Đăngb naih wâyx.” ²⁹ Yiu-thai munh coong năngđ nâyx, Six wâyc nănh stiz phătc, Zô-phim, yămz Ê-phê-sô, “lêpc Phao-lô ninyh woa Ye-lu-sa-lem Stengv, “Nănh stiz laic Stăngz six Phao-lô, ênz nănh nzac woa gâyf paix toongh ninyh.” ³⁰ Njynh Ye-lu-sa-lem Stengv nyăngz songx munh lunc nzuf, Tyuv nzac gâyf paix toongh ninyh topz zoz Phao-lô, Đănx seetb gâyf paix pyau cungh ngwoaic taih, Songđ lênh dlih conz jengh.” ³¹ Nănh stiz cayx tayx Phao-lô woax zanyf, Viên Ziz-huy (zươngz đoanh) yămz Lô-ma, numđ lănv coong Yămz Ye-lu-sa-lem Stengv nyăngz munh lunc nzuf.” ³² Nănh lênh dlih ênz pengz cloon nănh coonx tyuv ninyh tauv songx munh nzomf woa, Nănh stiz phătc pengz ninyh tauv nzăngđ sec max bopc Phao-lô.” ³³ Pengz pyây ninyh tauv songđ topz zoz Phao-lô, seetb lanyf phunz pengz nongc iz Stynz njab langb stayb Nănh, “Nănh naic coong Phao-lô six mănv? Nănh ayx toix laiv hungđ dlayc.” ³⁴ Songx munh đungx naih ah đomc hamv coong Nây, ah phanx coong woa, Pengz pyây max zoz tuz coonz nengx, Songđ êu pengz ninyh zoz Phao-lô ênz muf woa (đônh).” ³⁵ Ninyh tauv Phao-lô woa, songx munh bopc ayx huđ nzongf, “lekb tauv woax tab iz tâyb, Pengh songđ zuc zengz nănh staox cah zâyc ninyh.” ³⁶ Songx munh lêpc đangz ninyh hamv coong, “Bopc nănh năngx tayc zef gôh!” ³⁷ Pengz cayx ênz nănh nzac (đônh) ninyh woax zanyf, Phao-lô coong bux woax tauh pengz pyây, jođ phunz yaz cloon mâyh coong tix Zâux woac tuz max?” Viên Ziz huy tauz coong, “Tah lauf hayh coong Hi-lapc woac yaz?” ³⁸ Yaz laic stăngz mâyh six lôx noib sêu lunc, Zengv zanyx pâu Y-yiêpv-tô, nzof bix ênz pyâyz tynb lanh munh nzac Stâyz phangz blănf ninyh woax tauh ya munh!” ³⁹ Phao-lô tauz, max! Yaz six Yiu-thai munh stengb stâyv yămz Tatc-sơ, Si-li-si stâyz phangz.” Yaz six ah tauh naih manyh yangh nyăngz pec stingx woax nomz Stengv.” Jođ phepv phunz yaz cloon nâyx đomc songx munh coong cay woac đangc.” ⁴⁰ Viên Ziz huy phunz phepx, Phao-lô Songđ stâuđ woa tâyb đany hangb puf êu songx munh mengx nzeetx, “Songx munh mengx nzeetx nzuf, “Phao-lô Songđ nongc Hipc-lu woac quef coonz cloon nănh stiz coong, “ Phao-lô lănv bux songx munh