3 ¹ Mâyh six zuc pâyz tuz cayx môtc zapz nyăngz noib tauv stătx, six hayh naih zâuđ nanc đungx. ² Bamh munh cungb tâuh cănh tuz gongx, mauh stynh nyanh, zanyb lub, nzeetx blangc tanv cănh naih bănh sangz, lanh coong woac peo lanh, stymz yêuz max đăngb zengh, max mungv nzif pha nyăngz woac, yâuc max naih njâuv pôz. ³ Nănh stiz max stăngz munh, max quanyf tuz munh ayx peo, max nyangc tuz munh coong woac peo, nănh stiz đokc, hănđ ayx gongx nyăngz dlayc. ⁴ Maic côkz maic yâuf pez, max nyâyh cah đangz cah đangc, nyâyh oix tuz gongx năngx đungx têx, stăngz Tênb-Hungh. ⁵ Pâyh sangc ayx năngđ zeen Tênb-Hungh, six stymz nyâuđ max âyz nănh stiz zeen nyăngz jau, woax đomc munh mâyh oix zuc pyeenv năngx gâyh nănh stiz. ⁶ Naih ah đomc nâyx hungđ munh, puv nzac munh nyăngz pyau ninyh, hox woax đomc nyâuđ oongx nyăngz munh nzif, dluyh stymz nyâuđ nyâyh ayx pongz lauh nyăngz jau, songđ zuc đamz toongz nănh stiz nyăngz stoif niđ nzongf. ⁷ Woax đomc munh nzif njynh leox hođ gâyf, six hănđ hođ sax stoiz lauf max pâyz tuz tauv seenz gâyf. ⁸ Lôx-noib Gian-netv, cloon Yam-be zengv Mô-sê, six nâyx zanyf ayx huđ woax đomc munh lauf zengv seenz gâyf năngđ woa nâyx, nănh stiz nyăngz stymz nyâuđ huđ nzuf, max tanyđ tuz stâyv nyâuđ nyăngz jau. ⁹ Nănh stiz ayx nâyx đomc dlayc năngđ nâyx, six ayx max tuz lauh, wâyc zuc songx munh phătc nănh stiz ayx oongx nyăngz dlayc, năngđ Gian-netv, cloon Yam-be, buz ayx nâyx. Phao-lô zăpx Ti-mô-thê nzuf woax hâyđ ¹⁰ Six mâyh pâyz tuz yaz nzaox nyăngz gâyf, cloon yaz ayx nyăngz dlayc, mâyh phătc yaz nyăngz seen stymz, cloon yaz nyăngz âyx, mâyh yâuc tuz phătc yaz naih stymz ayx laix stăngz munh. ¹¹ Mâyh phătc yaz zuc munh ayx peo, yâuc zuc dlauc wâyb, yămz An-ti-ôtv stengv, Y-cô-ni, cloon Liv-zah, zuc munh ayx peo zâuđ nzongf, six Zâu lauf năngx njâuv yaz gâyh đutb nâyx đomc zâuđ nanc nyăngz dlayc. ¹² Laiv lanh oix cloon Njâuv Zâu Yê-su songc mengc săngh, yâuc zeen tingc Tênb-Hungh woax tauh, songđ hayh zuc munh ayx peo. ¹³ Okx njangh nyăngz munh, cloon jaf munh nyăngz munh, ah noib ayx năngx huđ têx ah noib, nănh stiz cungb nyâyh oix jaf munh, yâuc zuc munh jaf nănh stiz ayx longđ. ¹⁴ Six mâyh tuz hođ nzuf, zeen wăn nyăngz seenz gâyf, six zuc muif dlih âyz seenz ayx, wâyc zuc mâyh pâyz tuz laiv lanh stăngc nzaox mâyh hođ pâyz tuz seenz gâyf. ¹⁵ Mâyh tăng năngx jeenz tuz hođ Canyx-stâub, Canyx-stâub songđ phunz mâyh naih tongb manyh hayh pâyz tuz six zuc zeen coouv Njâuv Zâu Yê-su nzăngđ tuz Njâuv. ¹⁶ Muif zâux Canyx-stâub Tênb-Hungh yeenv munh ja taih nongc nzaox munh mađ munh, yâuc nongc zany munh ayx longđ nyăngz tync, wâyc nongc nzaox êu munh ayx gongx nyăngz jau. ¹⁷ Năngđ nâyx songđ phunz Tênb-Hungh sên taih nyăngz munh tuz clakx clunh, hayh ayx tuz muif hungđ gongx nyăngz dlayc.