¹ Yaz toongx Tênb-Hungh yâuc toongx Njâuv Zâu Yê-su, six stămđ munh săngh, cloon munh tayc, nănh năngx oix taih ayx Zâu cun munh woax tauh, bux nyâuh mâyh. ² Six zuc lănv cuđ jeenx, max cun hănđ hênh mah six max hênh, yâuc zuc lănv, zuc năngđ cayb nongc noic nzaox mađ bux êu songx munh seenz zuc pâyz tauv ayx gongx nyăngz dlayc. ³ Săngx huđ oix tauv, munh max oix mungv naih coonz tay nyăngz seenz gâyf, cungb oix âyz stymz nyâuđ ninyh lov đungx lanh stênx stengb taih nzaox payh tuz zuc nănh stiz nyăngz bah noomh oix mungv nyăngz gâyf. ⁴ Nănh stiz max oix mungv seenz gâyf, cungb nzaz bah noomh wynb ninyh mungv max naih coonz tay nyăngz ưrx jeetx woac. ⁵ Six mâyh nyăngz phănc, mâyh six zuc yămz muif hungđ dlayc hayh cun tuz phănc stynb, six zuc nongc noic tanyđ zâuđ nanc, yâuc zuc ayx nzônh cuđ jeenx nyăngz munh, Tênb-Hungh jaoz phunz nyăngz cumh pâuz, six zuc ayx năngx tauv nzuf. ⁶ Nâyx zanyf cayx tauv săngx huđ, yaz nongc yaz nyăngz mengc nongc ayx stanyb lanyh congx phunz Tênb-Hungh nzof gôh, cayx tauv yaz quaix stâyv nyăngz săngx huđ nzof gôh. ⁷ Yaz nongc nzuf jab, bopc tuz hingh gongx nyăngz zax, tinyh tâu tyuv, yaz tyuv ninyh tuz tauv yaz zeen nyăngz tync, leđ tuz gongx yaz zeen nyăngz gâyf. ⁸ Nâyx zanyf naih ah nomz banyh tênb mouc njâuh phunz yaz, tauv stămđ stoif woax noib, Zâu six ayx pengh stymz nyăngz stămđ stoif quanz, Zâu oix zoz woax nomz mouc taih nongc ayx sâuđ nyâyc phunz yaz, max zâyf cănh phunz yaz ah lanh, yâuc năngx phunz cloon zu mungc nănh năngx taih woax đomc munh. ⁹ Jođ mâyh cox găngx coonx taih yaz nây căn gôh, ¹⁰ Wâyc zuc Đê-ma, stăngz bamh canz nyăngz jau nănh quanyf yaz ninyh Ti-sa-lô-ni-ca stengv nzof gôh, Cê-lê-sên ninyh Ga-la-ti stengv, Titv yâuc ninyh Đan-ma-ti. ¹¹ Cungb năngx naih Lu-ca cloon yaz yămz nây, jođ mâyh stăngc yaz ninyh lov Makv ênz nănh lauf, wâyc nănh hayh stăngc tuz yaz toongz cumh pâuz. ¹² Yaz paiđ Ti-zi-cơ, ninyh Ê-phê-sô stengv nzof, ¹³ Yaz nyâuđ cob ah byeenđ gwuyz lub ănz woa Zô-êkv stengv, yănz Ca-butv nyăngz pyau, năngx cloon ah zây đupx stâub glonc. ¹⁴ Woax tauh ayx tongh stangc, A-lekv-san-đê, nănh ayx hoiđ yaz đungx nzongf, âyz nănh ayx nyăngz dlayc, Zâu songđ oix clao phunz nănh. ¹⁵ Mâyh songđ seenz zuc buôngh nănh, wâyc zuc nănh hayh nzac jab nzengz pănh nyăngz gâyf. ¹⁶ Yaz zay tah yeetx hâyđ stynb woax zanyf, max naih mănv stăngc yaz, songđ quanyf yaz nzuf, jođ Tênb-Hungh quanyf stoif phunz nănh stiz. ¹⁷ Six Zâu cloon yaz yămz, phunz yaz naih jab lănv nzuf nănh nyăngz gâyf phunz max zâyf Yiu-thai munh mungv, yâuc njâuv yaz yămz njanh zongh nyăngz nzeetx seetb taih. ¹⁸ Yâuc Njâuv yaz gâyh đutb muif hungđ okx nyăngz dlayc, yâuc ênz yaz pengh oonz ninyh tauv tênb toongh côkz, six zuc tanv nănh tauv banc stâyv banc đaic (A-men.) ¹⁹ Yaz zaoh Bikv-si-la, cloon A-qui-la, cloon Ô-nê-si-phô-rơ nyăngz pyau munh. ²⁰ Ê-latv-tatv lauf năngx yămz Cô-lin-tô, Tô-phi-matv săngh gumc, yaz songđ njâuh nănh yămz Mi-lê. ²¹ Jođ mâyh cox găngx taih yaz nây quaix đangc tongz dlih gungh, Yu-bu-latv, Bu-đên, Li-natv, Ca-lau-đê, cloon zeen Zâu nyăngz songx munh lauf săngx tauv mâyh. ²² Jođ Zâu cloon mâyh nyăngz mengc hoonh yămz, yâuc sađ pôz phunz mâyh.