¹ Yaz nyăngz toonz lex, mâyh six zuc coouv Njâuv Yê-su sađ phunz nyăngz pôz yongb quaix taih. ² Mâyh numđ yaz toongx zanyx manyf munh đungx nzaox munh woax đomc woac, mâyh yâuc zuc jaoz phunz woax đomc naih stymz zeen nyăngz munh, phunz nănh năngx hayh naih bănh sangz ninyh nzaox pitc lanh. ³ Mâyh zuc cloon yaz naih phănc tanyđ zâuđ nanc, năngđ Njâuv Zâu Yê-su nyăngz pengz gongx. ⁴ Toongz pengz nyăngz munh, max naih laiv lanh muif dlih năngx nyâyh tauh pitc hungđ dlayc taih zeenv, nănh cungb oix ayx hopđ phunz cun nănh woax đomc pengz pyây. ⁵ Tinyh tâu nyăngz munh, tinyh tâu nyăngz săngx huđ, max ayx toix gâyf, six max tuz banyh tênb mouc. ⁶ Seetb jab ayx njăngx nyăngz munh, nănh naih gâyf tuz sâub nănh songx nyăngz zunb jengz. ⁷ Mâyh ah manc nyâyh năngx gongx yaz coong bux mâyh nâyx đomc woac, Zâu six oix phunz mâyh pâyz tuz yox muif hungđ dlayc. ⁸ Six zuc săngx Đa-vitv Hungh nyăngz sây stunz, Njâuv Zâu Yê-su, tayc blătc năngx săngh phunb stengb taih, nâyx six yaz nzônh nyăngz cuđ jeenx, ⁹ Yaz wâyc nây cuđ jeenx zuc njab langb stayb dlaoc huđ năngđ stoif-munh, six Tênb-Hungh nyăngz woac max zuc njab langb stayb đêh. ¹⁰ Yaz wâyc Tênb-Hungh sên taih nyăngz munh zuc tanyđ muif hungđ dlauc wâyb, wâyc phunz nănh stiz coouv Njâuv Zâu Yê-su tuz Njâuv yâuc tuz stâyv quâyx nyăngz gwăngz-eng. ¹¹ Yaz coong nâyx zâux woac six seenz nyăngz, six coong pănh năngđ cloon nănh songc tayc, yâuc tuz cloon nănh songc mengc săngh. ¹² Six coong pănh năngđ tanyđ tuz tauv tauh, pănh songđ tuz cloon nănh cun, six coong pănh năngđ max nhlimc nănh, nănh lauf max nhlimc pănh. ¹³ Max cun pănh hănđ nyâuđ max zanyx, six nănh nyăngz zanyx, wâyc zuc nănh max cănh jaf nănh nyăngz stynb." ¹⁴ Six zuc bux songx munh săngx nâyx đomc dlayc, yâuc zuc yămz Tênb-Hungh nyăngz cah đangc zăpx nănh stiz năngx gâyf cloon munh tinyh nzengz, wâyc zuc nzengz nhlynh six max săngh nongc, cungb pênx ayx huđ nyăngz munh hoiđ cloon woax đomc mungv nyăngz munh. ¹⁵ Mâyh zuc seetb jab ayx muif hungđ cumh pâuz wâyc phunz Tênb-Hungh numđ nyađ, songđ ayx max zuc nyayz nyăngz congz munh, yâuc nongc dlăngc nyâuđ nzaox seenz gâyf. ¹⁶ Six zuc pyeenv gâyh woax đomc munh coong ưrx jeetx woac, wâyc zuc woax hungđ woac, six cungb ayx phunz munh cun gâyh Tênb-Hungh cun ayx cun côz. ¹⁷ Woax đomc woac huđ hayh quaix munh năngđ gumc huđ đunz pănh nyăngz stynb stayđ, nzaox nâyx đomc woac nyăngz munh naih iz lanh munh, bux six hipđ ayx Hi-mê-nê, cloon Phi-lêtv ¹⁸ Nănh stiz quanyf nzaox seen gâyf nyăngz jau, yâuc coong munh tayc săngh phunb stengb nyăngz noib quaix blătc nzof gôh naz, ayx bây ah phanx munh nyăngz seenz stymz lunc nzuf. ¹⁹ Six Tênb-Hungh njăpc taih nyăngz coonz tay wăn nzongf, yâuc naih yeenx tăpb coong, "Zâu pâyz tuz pănh zeen nănh nyăngz munh, yâuc coong, "laiv lanh nhlimc Zâu nyăngz bux, woax tauh six zuc quanyf pamf stoif nyăngz jau." ²⁰ zoongz ah sênz pyau lub six naih đungx hungđ, max zâyf cungb nongc sămz nongc nyah zâyv cungv, yâuc năngx naih nongc njăngx nongc nib, naih ah phanx nongc tuz saix nzongf nyăngz tax hungđ, naih ah nongc tongh hangh nyăngz tax hungđ zâyv taih. ²¹ Laiv lanh tâyv nzuf ayx huđ dlayc gâyh nănh nyăngz stynb, woax tauh six năngđ saix nzongf nyăngz jax dlaih đăngb zengh, yâuc payh tuz nănh nyăngz Zâu nongc ayx ah hungđ gongx nyăngz dlayc. ²² Năngđ naz six zuc pyeenv goib munh gunx oix ayx nyăngz dlayc, six zuc nongc dlăngc nyâuđ stăngc munh vaic ayx gongx nyăngz jau, stăngz munh songđ naih pengh oonz. ²³ Six zuc pyeenv gâyh cloon munh tinyh nzengz oongx nyăngz dlayc, wâyc zuc mâyh pâyz tuz woax đomc dlayc, six cungb ayx coonz phunz munh tinyh nzengz. ²⁴ Ayx Zâu nyăngz cumh pâuz munh, max hopđ zuc cloon munh tinyh panx, cungb zuc ayx gongx phunz songx munh, yâuc naih noic yoiz nzaox munh. ²⁵ Yâuc zuc nongc dlênc nyâuđ nênf nzaox cloon tinyh nzengz nyăngz munh, stăngc nănh stiz jođ Tênb-Hungh phunz nănh stiz naih congv coi nyâuđ pâyz tuz seenz gâyf. ²⁶ Phunz nănh stiz đyub taih tyuv tuz đutb manđ hungh stiv nyăngz ploz, max zuc stayb nănh stiz, epx stiz ayx âyz manđ nyăngz zux ix.