3 ¹ Jođ nyâuh yâuf pez stăngc coouv Zâu phunz buz, phunz Zâu nyăngz woac zunx căn tuz munh pâu, năngđ nyâuh yâuf pez nâyx. ² Jođ Zâu Tênb-Hungh phunz buz gâyh đutb okx njangh ayx huđ nyăngz munh. wâyc zuc max zâyf muif lanh naih stymz zeen đêh. ³ Zâu six naih stymz stăngc pâu phunz nyâuh yâuf pez naih jab, leđ phunz nyâuh yâuf pez hayh tuz gâyh đutb okx njangh woax đomc munh. ⁴ Zâu ayx phunz buz hayh tuz pungx stymz zeen tingc, nyâuh yâuf pez ayx âyz buz bux nyâuh laiv hungđ. ⁵ Jođ Zâu yeenv phunz nyâuh yâuf pez naih Zâu Tênb-Hungh nyăngz Stăngz, yâuc naih stymz tanyđ tuz năngđ Njâuv Zâu. Êu munh max cuyb lâyc ⁶ Songx yâuf pez lex! buz tym Njâuv Zâu Yê-su nyăngz bux zăpx nyâuh yâuf pez. Laiv lanh yâuf pez lâyc, max oix ayx cumh pâuz, yâuc max ayx âyz buz nzaox nyăngz woac. nyâuh six zuc pyeenv goib woax hungđ munh. ⁷ Nyâuh yâuf pez cănh pâyz tuz nyâuh oix yămz âyz buz, buz cloon nyâuh yâuf pez yămz buz lauf max lâyc. ⁸ Buz nhlync laiv lanh nyăngz năngv buz yâuc clao nyanh, buz muif noib muif munf ayx cumh pâuz zâuđ, nzof buz lauf max ayx dlauc wâyb nyâuh laiv lanh yâuf pez. ⁹ Max cun buz naih gâyf coouv nyâuh yâuf pez stăngc buz, Six buz zoz taih nongc ayx caox gao phunz nyâuh yâuf pez hođ. ¹⁰ Buz năngx cloon nyâuh yâuf pez yămz buz njynh leox bux nyâuh, laiv lanh lâyc max oix ayx cumh pâuz, six max hopđ zuc phunz nănh nhlync. ¹¹ Buz numđ naih munh lănv coong, “yămz nyâuh woa naih ah phanx munh lâyc max oix ayx lungđ, max zâyf cungb lâyc cungv, njynh năngx zeenv tauv pitc lanh ayx nyăngz dlayc. ¹² Buz tym pănh Njâuv Zâu Yê-su nyăngz bux zăpx nâyx hungđ munh, six zuc vaic ayx cumh pâuz nongc yungf mengc. ¹³ Nyâuh yâuf pez max nongc nyâuđ nămx ayx gongx nyăngz dlayc. ¹⁴ Laiv lanh max ayx âyz buz ja nâyx đomc jeenx nyăngz woac, yâuc năngx gâyf cloon nănh stiz lănv woac, phunz stiz numđ nyayz. ¹⁵ Six năngx gâyf stunx nănh stiz săngh yônz zaz, songđ zuc bux nănh stiz năngđ zeen Zâu nyăngz munh nâyx. poou woac ¹⁶ Jođ sađ pengh oonz nyăngz Zâu yâuc muif dlih sađ muif hungđ pengh oonz phunz nyâuh yâuf pez ô stayx, Jođ Zâu cloon nyâuh songx munh yămz. ¹⁷ Yaz Phao-lô cănh nzauf pătx ja nâyx đomc woac, Yaz ja muif zây jeenx naih lănv tauv nâyx đomc woac. Yaz nyăngz puf ja nâyx đomc đăngc nongc ayx jix houđ. ¹⁸ Jođ pănh nyăngz Njâuv Zâu Yê-su sađ Pôz sađ pengh oonz phunz cloon nyâuh yâuf pez ô stayx yămz.