¹ Songx yâuf-pez lex! Yaz oix nongc nyâuh yâuf-pez pâyz tuz Tênb-Hungh nyăngz Pôz năngđ laix nâyx stăngc Ma-si-đoan, stâyz-phangz nyăngz Huyđ-toongh. ² Max cun nănh stiz pongh zuc đungx hungđ zâuđ nanc stâyv nănh stiz nyăngz nyâuđ, nănh stiz hănđ six tăng laiv zâuđ, six nănh stiz lauf numđ nyađ, songđ ayx nyâuđ Quăng nzăngđ naih stymz căpx nyanh. ³ Yaz stăngc nănh stiz lănv coong, “nănh stiz pungx stymz nzuf nyâuđ pungx hođ, max naih laiv lanh êu nănh stiz ayx tuz blătc hanf, six nănh stiz cănh naih nyâuđ ayx năngđ nâyx. ⁴ Six nănh stiz seetb jab jođ Yaz phunz nănh stiz naih phănc stăngc Zâu nyăngz pec stingx. ⁵ Nănh stiz songđ ayx quaix đangc Yaz max zengx nyâyh tauv nyăngz jau, nănh stiz pungx hođ phănc stynb phunz Yaz, Quaix đangz nănh stiz âyz Tênb-Hungh nyăngz âyx pungx hođ phunz Yaz. ⁶ Năngđ naz Yaz songđ couv Titv, Stăngc nyâuh yâuf-pez ayx tuz songf nâyx đomc cumh pâuz, wâyc zuc Titv, six hiđ pyây stăngc Munh ayx nâyx đomc cumh pâuz nyăngz Munh. ⁷ Nyâuh yâuf-pez yămz muif hungđ dlayc naih tuz dloih nzuf, yămz seenz stymz nzeetx maf naih bănh sangz, nyâuh yâuf-pez yôuc stăngz yaz đungx* wâyc năngđ nâyx Yaz songđ mungc nyâuh yâuf-pez seetb stymz ayx nyâuđ quăng stăngc yaz pungx hođ. ⁸ Yaz max zâyf bux êu nyâuh yâuf-pez pungx hođ, six Yaz oix stâyv mangc nyâuh yâuf-pez jađ, nyâuh yâuf-pez seenz joomz nyâuđ stăngz Munh, stăngc pitc tauh max? ⁹ Nyâuh yâuf-pez pâyz tuz pănh nyăngz Njâuv Zâu Yê-su nyăngz Pôz, max cun nănh tăng laiv puv quâyx, six nănh wâyc pănh songđ pênx Munh zâuđ Munh, wâyc phunz nyâuh yâuf-pez tuz puv quâyx. ¹⁰ Âyz Yaz nyâyh taih têx, nyâuh yâuf-pez pah nyăngv quef coonz pungx hođ nyăngz jau, nyâuh songđ joomz nyâuđ pênx pungx hođ nyăngz Munh. ¹¹ Nyâuh yâuf-pez quef coonz ayx woax đomc cumh pâuz, nâyx zanyf nyâuh bix âyz woa ayx năngx đotc gôh! ayx lungđ six ayx năngx dlanyh dlôuc, naih buc laiv pungx buc laiv. ¹² Six coong nyâuh yâuf-pez naih nyâuđ ayx têx, nyâuh pungx hođ nyăngz jau songđ tuz numđ nyađ stipx, âyz nyâuh yâuf-pez naih nyăngz, six max zâyf âyz nyâuh max naih. ¹³ Yaz max zâyf oix nongc nyâuh laiv lanh yâuf-pez yêmv, bix phunz pitc tauh yăngc, six Yaz oix nongc iz đomc naih tinyh năngđ. ¹⁴ Nâyx zanyf nyâuh yâuf-pez naih yăngc, songđ zuc stăngc yêmv woax đomc, tauv nyâuh max naih nyăngz săngx huđ, nănh stiz naih đungx songđ hayh stăngc nyâuh yâuf-pez, năngđ ha songđ tinyh bengc. ¹⁵ Năngđ Canyx-Stâub ja coong nâyx, “laiv lanh sâuđ đungx yâuc max yăngc, Laiv lanh sâuđ stoc yâuc max yêmv. ¹⁶ Yaz hâuđ Zâu Tênb-Hungh, wâyc zuc nănh phunz Titv, naih Stăngz Munh nyăngz jau, năngđ yaz njengx phunz nyâuh yâuf-pez woax đomc tinyh stăngz nâyx. ¹⁷ Nănh max zâyf cungb âyz Yaz jaoz nyăngz woac ayx, wâyc zuc Titv, nănh cănh naih nyâuđ oix ninyh tauv nyâuh yâuf-pez woa. ¹⁸ Yaz yâuc paiđ ah tauh yâuf-pez yămz Huyđ-toongh naih manyh tauh lănv cuđ jeenx nyăngz Munh lêpc Titv, Ninyh. ¹⁹ Blătc nzuf woax tauh tah, tuz Huyđ-toongh sên taih woax đomc Munh, paiđ cloon buz ninyh jaoz nâyx đomc nyanh tăngf phunz nyâuh yâuf-pez, bênc nâyx đomc cumh pâuz gongx wâyc phunz Munh zanyb Zâu nyăngz Gwăngz-eng, yâuc phunz buz cănh naih stymz nyâuđ oix stăngc nyâuh. ²⁰ Yaz cănh nzuf stymz nyâuđ quanz lix nâyx đomc căpx taih nyăngz nyanh lub nzongf, wâyc max phunz laiv lanh cuyx quaiz. ²¹ Yaz six nzuf stymz nyâuđ ayx phunz Zâu cloon bamh Munh phătc yaz ayx tuz hopđ. ²² Yaz zâyf năngx paiđ ah lanh yâuf-pez cloon Titv, ninyh nâyx tauh yâuf-pez buz stâyv quaix đungx hâyđ, buz phătc nănh muif dlih joomz nyâuđ stăngc nyâuh yâuf-pez, wâyc zuc nănh zeen nyâuh yâuf-pez, songđ oix stăngc nyâuh. ²³ Titv, six ayx yaz nyăngz toic, Nănh cloon yaz songc congz ayx nyăngz Munh, nâyx đomc yâuf-pez six tuz Huyđ toongh paiđ Ninyh nyăngz Munh yâuc phunz Munh pâuh Njâuv Zâu. ²⁴ Năngđ naz nyâuh yâuf-pez songđ zuc phunz nyâuh stăngz woax đomc Huyđ toongh Munh phătc yaz tanv nyâuh yâuf-pez nâyx đomc woac six seenz nyăngz.