¹ Yaz cloon Tênb-Hungh songc congz ayx, songđ bux nyâuh yânf-pez năngx gâyf ayx huđ Tênb-Hungh Sađ phunz nyăngz Pôz. ² Tênb-Hungh coong, “Toix săngx huđ yaz songđ mungv nyâuh clo-Zâu nyăngz woac, “Yaz six stăngc nyâuh tuz Njâuv nyăngz noib, Yaz jođ bux nyâuh yâuf-pez, nâyx zanyf six toix tuz Njâuv săngx huđ. ³ Yaz max oix laiv lanh pib Yaz ayx nyăngz cumh pâuz, nzof yaz yâuc max oix ayx laiv hungđ phunz Munh nzêmh yaz. ⁴ Yaz ayx muif hungđ dlayc wâyc phunz Munh saz tuz Yaz ayx Zâu Tênb-Hungh nyăngz cumh pâuz, Yaz nongc noic tanyđ muif hungđ zâuđ nanc, Cloon stâyv nyâuđ nyăngz dlayc. ⁵ Yaz songđ zuc Munh bopc, zuc yămz nzauh, zuc Munh sêu lunc, ayx congz zâuđ, tanyđ Mâyc njoomh, tanyđ nyâuđ sab. ⁶ Yaz ayx đăngb zengh nyăngz dlayc phunz Munh saz tuz yaz six ayx Tênb-Hungh nyăngz cumh pâuz Munh, Yaz nongc noic tanyđ tuz, yâuc nongc bănh sangz ayx gongx phunz Munh, naih Singx-lingh yâuc naih seenz stymz Stăngz Munh. ⁷ Yaz cungb coong seenz woac, yâuc naih Tênb-Hungh nyăngz quyênh. Yâuc Naih gongx dlayc nongc ayx bopc zax tungh zangc nongc leđ Yaz.* ⁸ Yaz tuz Munh nênf yâuc zuc Munh mangc stam, zuc Munh pib yâuc tuz Munh Tanv, Yaz muif dlih coong seenz Gâyf, six naih Munh coong yaz puv maoh. ⁹ Yaz cayx năngđ max naih Munh pâyz tuz yaz, six lauf năngx naih Munh đungx pâyz tuz Yaz, Yaz dluyh tongh cayx năngđmunh tayc, six yaz lauf năngx Săngh, Yaz zuc bopc, six max zengx tayc. ¹⁰ Pongh zuc muif hungđ wănh Canyz stauh six yaz stymz nyâuđ numđ hônb-hiđ, Yaz hănđ zâuđ six phunz Munh đungx tuz puv quâyx naih seenz stymz, Yaz zâuđ dluyh tongh max naih lungđ, six lauf naih muif hungđ dloih. ¹¹ Yaz bêc cloon nyâuh yâuf-pez lănv zac max pinyx laiv hungđ yămz Cô-lin-tô, Yaz coib goib quăng yaz nyăngz stymz nyâuđ phunz nyâuh yâuf-pez ô stayx. ¹² Yaz nyăngz stymz Stăngz njengx phunz nyâuh yâuf-pez max hayh toiv, six nyâuh yâuf-pez yâuc njâuh phunz Yaz. ¹³ Yaz cloon nyâuh yâuf-pez coong năngđ Pha cloon nănh nyăngz sây coong nâyx, jođ nyâuh yâuf-pez coib quăng stymz nyâuđ clao Yaz. ¹⁴ Zeen cloon max zeen nyăngz Munh max hayh tinyh songc toic, gongx cloon huđ max hayh tinyh lêpc ninyh Gwăngz cloon nzămc ayx laix hayh songc yămz? ¹⁵ Njâuv Zâu ayx laix hayh cloon Bê-li-an dlănh tinyh songc? Zeen nyăngz Munh cloon max zeen nyăngz Munh naih laiv hungđ phănc tinyh songc? ¹⁶ Tênb-Hungh nyăngz miuc, Cloon manđ miuc, ayx laix hayh sitx toix? Wâyc zuc pănh six ayx Tênb-Hungh nyăngz miuc, Năngđ Tênb-Hungh coong nâyx, “Yaz six cloon yaz nyăngz pec stingx yămz, “Yaz six ninyh lauf yămz nănh stiz mungh tongx congv, “Yaz songđ ayx nănh stiz nyăngz Tênb-Hungh, “nzof nănh stiz yâuc ayx Yaz nyăngz pec stingx. (Lê-Vi 26:11-12) ¹⁷ Zâu coong, “nyâuh yămz nănh stiz mungh tongx congv, “six zuc pyeenv lanyc seetb taih, “Cloon nănh stiz phunz goib, “nongx gâyf lumz tauv naih wâyx nyăngz tax’ hungđ, “Yaz songđ stipx nyâuh. ( ê-sai 52:11) ¹⁸ Yaz ayx nyâuh nyăngz Pha, nyâuh songđ ayx Yaz nyăngz Namh-nyâuf. lemđ quaix nyăngz Zâu năngđ nâyx Coong.”* (1 Sa-Mu-Ên 7:8-14)