¹ Nây nyâuh yâuf-pez max zâyf numđ yaz nzeetx blangc cănh tanv yaz mah? nyâuh phătc yaz năngđ naih đomc Munh sămv zuc nyâuh yâuf-pez ja jeenx phunz yaz nzâyz ninyh lănv phunz Munh pâyz yaz max? ² Nyâuh cănh ayx Yaz nyăngz jeenx, ja ănz yaz nyăngz nyâuđ, phunz songx munh pâyz. ³ Nyâuh yâuf-pez goib yangh lănv coong nyâuh six Njâuv Zâu nyăngz jeenx jaoz phunz yaz nzâyz ninyh, six max zâyf nongc mac ja ănz woa njauz payh. Six Săngh Mengc nyăngz Zâu Tênb-Hungh nongc Singx-lingh ja ănz Munh nyăngz nyâuđ njaf. ⁴ Wâyc zuc năngđ nâyx, Yaz songđ nzađ coong, “Yaz zeen Njâuv Zâu songđ pâyz tuz Tênb-Hungh six zeen wăn nyăngz Zâu. ⁵ Yaz max nzađ coong Yaz cănh hayh ayx tuz seetb laiv hungđ dlayc, six Tênb-Hungh stăngc yaz ayx tuz muif hungđ dlayc. ⁶ Phunz Yaz hayh âyz săngb nyunc woac canyx bongc nănh. nây săngb nyunc woac six max zâyf Singx-lingh njăpf taih yămz songx Munh mungh tongx congv, Yaz max zâyf âyz nongc đăngc ja taih nyăngz Đoouc-lif Gâyf ayx, nongc đăngc ja taih nyăngz Đoouc-lif Gâyf six phunz Munh zuc tayc, Singx-lingh six phunz Munh naih Mengc Săngh. ⁷ Phunz Munh zuc tayc nyăngz Đoouc-lif Gâyf nongc đăngc ja ănz njauz payh, Tênb-Hungh nyăngz Gwăngz-eng syux phunz Mô-sê nyăngz mynb Gwăngz-eng ayx phunz I-sa-la-ên Munh mangc nănh max tuz, six blătc woa woax hungđ Gwăngz-eng hayh jac. ⁸ Ha max zâyf Singx-lingh ayx nyăngz cumh pâuz năngx Gwăngz-eng têx mah? ⁹ Six coong ayx phunz Munh zuc tayc woax tyuh jau năngx tuz naih Gwăngz-eng têx, Njâuv Munh woax stynz jau năngx tuz Gwăngz-eng têx tymb. ¹⁰ Lôx noib nyăngz Gwăngz-eng nâyx zanyf jac platb nzof gôh, wâyc zuc nâyx zanyf săngb nyăngz Gwăngz-eng syux tingc năngx Gwăngz têx. ¹¹ Six coong cungb yămz ah dlapc nyăngz Gwăngz-eng năngx tuz yămz têx, Stâyv quâyx yămz nyăngz Gwăngz-eng năngx naih phănc têx tymb. ¹² Wâyc năngđ nâyx Yaz songđ pungx stymz lănv naih tync mungc nyăngz Gâyf. ¹³ Yaz max năngđ Mô-sê, năngx zuc nongc buyx pongz mynb, wâyc max oix phunz I-sa-la-ên Munh phătc nănh nyăngz Gwăngz-eng jac. ¹⁴ Six nănh stiz nyăngz nyâuđ nhlengc nzongf, tauv nâyx zanyf, nănh stiz toc lôx nhlengc Stâub, nănh stiz nyăngz nyâuđ songđ năngđ naih ah lepz buyx pongz đipc mungh, cungb zeen Njâuv Zâu nzăngđ tuz zoz woax lepz buyx seetb gâyh nănh stiz. ¹⁵ Tauv nâyx zanyf, nănh stiz laiv zanyf toc Mô-sê nyăngz Đoouc-lif Gâyf Stâub, songđ năngx naih woax lepz buyx tăng nănh stiz. ¹⁶ Six nănh stiz laiv lanh coi nyâuđ taih lêpc Zâu, nzăngđ tuz woax lepz buyx gâyh nănh stiz. ¹⁷ Zâu six Singx-lingh, Zâu nyăngz Singx-lingh yămz laiv, yămz woa Munh songđ tuz pungx goib. ¹⁸ Pănh max zuc tăng mynb, pănh yâuc tuz phătc Zâu nyăngz Gwăngz-eng, nzof pănh yâuc năngx tuz pyênv wav cayx năngđ nănh. nâyx hungđ pyênv wav cun ayx cun Gwăngz-eng, wâyc zuc nâyx hungđ Gwăngz-eng six tăng Zâu nyăngz Singx-lingh taih.