6 ¹ Six woax đomc yămz ayx nâuh nyăngz vănx tanz cah đi, six zuc mungv nyâuh nyăngz Zâu bux muif hungđ, năngx gâyf bây laiv lanh ayx peo Zâu nyăngz bux, cloon buz nzaox nyăngz gâyf. ² Nyâuh laiv lanh ayx nâuh nyăngz munh, naih nyâuh nyăngz Zâu six zeen Zâu nyăngz munh năngx gâyf mangc nănh stam, six zuc ongx huđ nănh năngx gongx, wâyc zuc nyâuh bokc dlib woax tauh six zeen Zâu nyăngz munh, yâuc ayx nănh stăngz nyăngz yâuf pez. Mâyh six nzaox nâyx đomc dlayc phunz munh, êu nănh stiz ayx âyz. ³ Sây lex mâyh six zuc nzaox nâyx đomc gâyf phunz nănh stiz, laiv lanh nzaox max toix nâyx đomc gâyf, six ninyh longđ jau, nzaox max toix êu munh ninyh lêpc Zâu Tênb-Hungh, Cloon Njâuv Zâu Yê-su nyăngz seenz gâyf, ⁴ Woax lanh cungb zanyđ ayx lub, max pâyz laiv lungđ, cungb nzengz nhlênh nyuic, năngđ munh vutx, songđ naih stâyx munz, coong woac peo munh, nyâyh okx nyăngz dlayc. ⁵ Woax hungđ munh muif dlih nzengz nhlynh đayc wenyđ, seenz gâyf max yămz nănh stiz nyăngz nyâuđ, nănh stiz laic stăngz six lêpc Tênb-Hungh bix phunz munh tuz puv quâyx. Seenz puv quâyx munh ⁶ Laiv lanh lêpc gongx Tênb-Hungh, yâuc pong nyâuđ nănh naih nyăngz muif hungđ seenz puv quâyx. ⁷ Pănh stengb stâyv nzac bamh canz max nzâyz laiv hungđ lêpc pănh taih, tauv pănh quaix stâyv gâyh bamh canz lauf max hayh nzâyz laiv hungđ ninyh. ⁸ Tinyh phanv naih caux nhlync caux zuz bix pong nyâuđ gôh! ⁹ Six mauh oix tuz puv quâyx woax đomc munh zuc stoif nyăngz jau taih pênx ploz lopb nănh stiz, nănh stiz nyăngz nyâuđ zuc woax đomc oongx nyăngz dlayc taih jaf nănh stiz nyâyh hayh hoiđ munh nyăngz zux ix, nănh stiz songđ zuc mêtc nzuf, yâuc zuc platb nzuf. ¹⁰ Wâyc zuc mauh nyanh stynh nyăngz jau six ah hungđ okx nzongf nyăngz coonz tay, wâyc mauh nyanh stynh nyăngz jau songđ naih ah phanx munh songđ zuc quanyf nănh stiz seenz stymz nyăngz gâyf, songđ lumz zoz munz stymz nyăngz jau. Phao-lô bux Ti-mô-thê ¹¹ Six coong sây năngđ seenz zâyf zeen Zâu Tênb-Hungh nyăngz munh, six zuc pyeenv gâyh nâyx đomc dlayc, yâuc hungv ninyh lov ayx hopđ nyăngz jau, stăngz munh yâuc naih stymz tanyđ, ayx stymz nyâuđ dlênc. ¹² Six zuc nzac jab wâyc pănh zeen nyăngz jau bopc tuz hingh gongx nyăngz zax, zab zoz tuz stâyv quâyx nyăngz mengc, wâyc zuc mâyh toongx munh đungx ayx zanyx manyf nhlimc Zâu woax zanyf, mâyh tuz êu taih stipx stâyv Quâyx nyăngz mengc nzof gôh. ¹³ Yaz toongx Tênb-Hungh zâyx phunz muif hungđ săngh woax tauh, yâuc toongx Njâuv Zâu Yê-su. yămz Bơn-sơ-phi-latv, cah đangc ayx zanyx manyf woax tauh zăpx mâyh. ¹⁴ Mâyh six zuc naih stymz âyz nâyx tyuh lanyf ayx, max bây laiv lanh naih tync nzêmh mâyh. Ayx nyâuđ pengh zu tauv pănh nyăngz Njâuv Zâu Yê-su năngx taih woax noib. ¹⁵ Tênb-Hungh âyz nănh bênc taih nyăngz săngx huđ, oix phunz Njâuv Zâu Yê-su năngx huyđ seetb taih, Nănh six payh tuz nyeenh mănh stâyv quâyx tanv nănh ah tauh, nănh six ayx muif hungđ zâu nyăngz Zâu, muif hungđ hungh nyăngz Hungh. ¹⁶ Nănh six stâyv quâyx săngh woax tauh, nănh yâuc săngh yămz gwăngz-eng cah njaf, max naih laiv lanh hayh ninyh tuz tauv stătx nănh, yâuc max naih mănv phătc nănh quaix, muif hungđ lanyf yămz nănh nzuf, yâuc tuz munh tanv nănh stâyv quâyx A-Men. ¹⁷ Six zuc zăpx yămz nây bamh canz nyăngz puv quâyx munh, bux nănh stiz năngx gâyf mauh stynh nyanh, wâyc zuc nyanh stynh six caob max wăn, six zuc coouv Zâu Tênb-Hungh, seenz hayh sađ muif hungđ pôz đungx phunz munh woax tauh, yâuc hayh phunz munh tuz gwoanb loc. ¹⁸ Six zuc zăpx nănh stiz muif dlih ayx gongx dlayc, yâuc ayx nyâuđ quăng tanb jax dlaih stăngc munh. ¹⁹ Năngđ nâyx ayx six sâub saix nyăngz muif hungđ nongc ayx coonz, wâyc đangz phanx songđ hayh tuz seenz nyăngz săngh mengc. ²⁰ Ti-mô-thê lex! six zuc năngđ cayb lif năngx gongx Zâu jaoz phunz mâyh laiv lungđ, yâuc zuc pyeenv goib max zeen Tênb-Hungh woax đomc munh ayx ưrx jeetx zongx lănv câu woac, six max zâyf seenz nyăngz. ²¹ Naih đomc munh cănh zanyb coong nănh stiz naih nâyx hungđ bănh sangz, songđ quanyf max lêpc seenz gâyf. Jođ Zâu sađ Pôz phunz cloon mâyh yămz.