2 ¹ Sây lex yaz zăpx mâyh đangc, mâyh six zuc Coouv Zâu phunz muif lanh munh, Jođ Tênb-Hungh sađ phunz nănh stiz yêmv nongc nyăngz laiv hungđ, muif dlih coouv Zâu tayv nănh stiz. ² Yâuc zuc wâyc Hungh stix, coouv Zâu phunz cloon ayx quanz nyăngz munh, phunz pănh yămz benyh-banyh max naih dlayc, coouv Tênb-Hungh bix Canyx bongc nănh. ³ Nây six hopđ pănh Njâuv Zâu Tênb-Hungh nyăngz stymz nyâuđ. ⁴ Nănh oix nongc muif lanh munh tuz Njâuv, yâuc pâyz tuz seenz Gâyf. ⁵ Cungb naih ah tauh Zâu Tênb-Hungh, nzăngđ hayh ênz bamh munh ninyh cloon nănh yămz, six Njâuv Zâu Yê-su taih pênx bamh munh woax tauh. ⁶ Nănh sez tuz tayc nănh nyăngz mengc wâyc suc nyeenh mănh gâyh đutb stoif, Clao muif lanh munh nyăngz stoif zaix, Njâuv Zâu Yê-su nzac taih toix săngx huđ ayx zanyx manyf phunz munh phătc Tênb-Hungh hayh Njâuv tuz pănh. ⁷ Wâyc nâyx hungđ (liv do) Yaz tuz sên ayx nzônh cuđ jeenx nyăngz munh, yâuc ayx cumh pâuz munh, Yaz coong seenz, max zâyf jaf, Yaz tuz sên taih ayx stênx stengb nzaox phunz max zâyf Yiu-thai munh, bây nănh stiz pâyz tuz seenz gâyf. ⁸ Yaz oix nongc yămz muif nomz tync nyăngz munh toonz stungb puf staox gungh đăngb zengh Coouv-Zâu, nzangh dlih max siv nhleenx yâuc max tinyh panx. ⁹ Yaz oix nongc munh nzif munh sab zoongz zuz năngx tongh yangc, max bynf đongz đyux zanb sămz nyanh pou zâuz, max zoongz zuz gwuyz quav nyanh saix. ¹⁰ Munh nzif six zuc ayx gongx dlayc, nzăngđ payh tuz Canyx Zâu Tênb-Hungh nyăngz munh. ¹¹ Hođ gâyf nyăngz săngx huđ, munh nzif six zuc stingb njâuh mungv. ¹² Yaz max phunz munh nzif nzaox gâyf, mah six nzauf quênh cun munh Pha, munh nzif six zuc payx nzeetx mungv. ¹³ Wâyc zuc A-đam, tuz zâyx taih đangc nzăngđ tauv Ê-wa. ¹⁴ Yâuc max zâyf A-đam, zuc jaf pamc stoif, six Ê-wa, zuc jaf pamf stoif. ¹⁵ Munh nzif tuz Njâuv six wâyc nănh stiz zuc yungf sây, six coong muif dlih naih seenz stymz zeen gongx yâuc stăngz munh songđ năngx tuz mengc săngh. Huyđ đăngb munh côx six ayx laix