¹ Six woax đomc yămz ayx nâuh nyăngz vănx tanz cah đi, six zuc mungv nyâuh nyăngz Zâu bux muif hungđ dlayc, nongx gâyf bây laiv lanh coong peo Zâu nyăngz bux, cloon yaz nzaox nyăngz gâyf. ² Nyâuh laiv lanh ayx nâuh nyăngz Munh, naih nyâuh nyăngz Zâu six zeen Zâu nyăngz Munh nongx gâyf mangc nănh stam, six zuc ongx huđ nănh năngx gongx, wâyc zuc nyâuh bokc dlib woax tauh six zeen Zâu nyăngz Munh, yâuc ayx nănh stăngz nyăngz yâuf pez. ³ Sây lex mâyh six zuc nzaox nâyx đomc gâyf phunz nănh stiz, laiv lanh nzaox max toix nâyx đomc gâyf, six ninyh longđ jau, nzaox max toix êu Munh ninyh lêpc Zâu Tênb-Hungh, Cloon Njâuv Zâu Yê-su nyăngz seenz gâyf, ⁴ Woax tauh cungb zanyđ ayx lub, max pâyz laiv lungđ, cungb nzengz nhlynh nzengz gâyf, năngđ Munh vutx, songđ naih stâyx munz, Coong woac peo Munh, nyâyh okx nyăngz dlayc. ⁵ Woax hungđ ya Munh muif dlih nzengz nhlynh đayc wenyđ, seenz gâyf max yămz nănh stiz nyăngz nyâuđ, nănh stiz laic stăngz six lêpc Tênb-Hungh bix phunz Munh tuz puv Quâyx. ⁶ Laiv lanh lêpc gongx Tênb-Hungh, yâuc pong nyâuđ nănh naih nyăngz tax hungđ seenz puv Quâyx. ⁷ Pănh nzac bamh canz max nzâyz laiv hungđ taih, tauv pănh gâyh bamh canz lauf max hayh nzâyz laiv hungđ ninyh. ⁸ Tinyh phanv naih caux nhlync caux zuz bix pong nyâuđ gôh bef! ⁹ Six mauh oix tuz puv quâyx woax đomc Munh zuc stoif nyăngz jau taih pênx ploz lopb nănh stiz, nănh stiz nyăngz nyâuđ zuc woax đomc oongx nzongf nyăngz dlayc taih jaf nănh stiz nyâyh hayh hoiđ Munh nyăngz zux ix, nănh stiz songđ zuc mêtc nzuf, zuc platb nzuf. ¹⁰ Wâyc zuc mauh nyanh stynh nyăngz jau six ah hungđ okx nzongf nyăngz coonz tay, wâyc mauh nyanh stynh nyăngz jau songđ naih ah phanx songđ Quanyf nănh stiz seenz stymz zeen nyăngz jau, songđ lumz zoz munz stymz nyăngz jau. ¹¹ Six coong sây năngđ zâyf Zâu Tênb-Hungh nyăngz Munh, six zuc pyeenv gâyh nâyx đomc dlayc, yâuc zuc hungv ninyh lov ayx hopđ nyăngz jau, stăngz Munh yâuc nongc noic tanyđ, dlênc stymz dlênc âyx. ¹² Six zuc nzac jab wâyc pănh zeen nyăngz jau bopc tuz hingh gongx nyăngz zax, zab zoz tuz stâyv quâyx nyăngz Mengc, wâyc zuc mâyh toongx songx Munh đungx ayx zanyx manyf nhlimc Zâu woax zanyf, mâyh tuz êu taih stipx stâyv Quâyx nyăngz Mengc nzof gôh. ¹³ Yaz toongx Tênb-Hungh six phunz muif hungđ săngh woax tauh, yâuc toongx Njâuv Zâu Yê-su. Six yămz Bơn-sơ-phi-latv, cah đangc ayx zanyx manyf woax tauh zăpx mâyh. ¹⁴ Mâyh six zuc naih stymz âyz nâyx tyuh lanyf ayx, max bây laiv lanh naih tync nzêmh mâyh. Ayx nyâuđ zanyx zu tauv pănh nyăngz Njâuv Zâu Yê-su năngx taih woax noib. ¹⁵ Tênb-Hungh âyz nănh tingc taih nyăngz săngx huđ, oix phunz Njâuv Zâu Yê-su năngx taih, Nănh six payh tuz nyeenh mănh stâyv quâyx tanv nănh ah tauh, nănh six ayx muif hungđ nyăngz Zâu, muif hungđ nyăngz Hungh. ¹⁶ Nănh six stâyv quâyx săngh woax tauh, nănh yâuc săngh yămz Gwăngz-eng cah njaf, max naih laiv lanh hayh ninyh tuz tauv stătx nănh, yâuc max naih mănv phătc nănh quaix, muif hungđ lanyf yămz nănh nzuf, yâuc tuz Munh zanyb nănh A-Men. ¹⁷ Six zuc zăpx yămz nây bamh canz nyăngz puv quâyx Munh, bux nănh stiz nongx gâyf mauh stynh nyanh, wâyc zuc nyanh stynh six caob max wăn, six zuc coouv Zâu Tênb-Hungh, six hayh sađ muif hungđ pôz đungx phunz Munh woax tauh, yâuc hayh phunz Munh tuz hônb-hiđ. ¹⁸ Six zuc zăpx nănh stiz muif dlih ayx gongx dlayc, yâuc ayx nyâuđ quăng tanđ jax dlaih stăngc Munh. ¹⁹ Năngđ nâyx ayx six sâub saix nyăngz tax’ hungđ nongc ayx coonz, wâyc đangz phanx songđ hayh tuz seenz nyăngz săngh Mengc. ²⁰ Ti-mô-thê lex! six zuc năngđ cayđ lif năngx gongx Zâu jaoz phunz mâyh toix laiv lungđ, yâuc zuc pyeenv goib max zeen Tênb-Hungh woax đomc Munh ayx ưrx jeetx woac, six Munh hipđ ayx bănh sangz, six max zâyf seenz nyăngz. ²¹ Naih ah phanx Munh coong nănh stiz naih nâyx hungđ bănh sangz, songđ quanyf max lêpc seenz gâyf. Jođ Zâu sađ Pôz phunz cloon nyâuh tinyh đoih yămz.