¹ Nton xéfi di saserdóti purgunta Stébu: Kes akuzason ki gentis faze é simé? Stébu fla: ² Nhas irmon i gentis grandi di povu Judeu, nhos skuta-M: Déus di glória parse pa nos pai Abraon, kantu ki e staba na pruvínsia di Mezopotâmia, antis di e bai mora na bila di Aran, ³ I E fla-l: Dexa bu téra i sai di meiu di bu parenti i ben pa kel téra ki N ta mostra-u. ⁴ Nton Abraon sai di se téra di se povu Kaldeu, i e bai mora na bila di Aran. Dipôs ki se pai móri, Déus traze-l pa kel téra li, undi ki nhos ta mora gosi. ⁵ Má Deus ka da Abron ninhum eransa na es téra, nen si ker un padás di txon ku medida pa poi un pé; má E prometi da-l es téra li, ki dipôs ta fikaba pa se jerason, má na kel altura, Abraon tenba ninhun fidju. ⁶ Inda más, Déus fla-l: Ses disidenti ta ba ser strajeru na otu téra, undi ki es ta podu na skrabatura, i es ta ser maltratadu duranti kuatuséntus anu. ⁷ Má Déus tanbe fla: N ta kastiga kel nason ki pô-s na skrabatura, i dipôs di kes kuza, es ta sai di la, i es ta ben adora-M li na es lugar. ⁸ I Déus da Abron sirimónia di sirkusison sima un sinal di se aliansa ku el. Nton, Abron jéra Izak i e faze sirimónia ku el, oito dia dipôs di se nasimentu, i izaki jéra jakó i Jakó jéra kes dozi patriarka di nos povo di Israel. ⁹ Na meiu di kes dozi patriarka,ónzi fika ku inveja di ses irmon Juzé. Nton es bende-l i es lebadu pa Ijitu. Má Déus staba ku el, ¹⁰ I libra-l di tudu se aflison. Déus da grasa ku sabedoria dianti di Faraó, rei di Ijitu, ki pô-l xéfi di Ijitu i di tudu kaza di rei tanbe. ¹¹ Un ténpu dipôs, ben fomi ku grandi sufrimentu riba tudu Ijitu i Kanaan, i nos patriarka ka ta atxaba nada pa kume na Kanaan. ¹² Má Jakó, obi má tenba kumida na Ijitu i e manda noas patriarka di Kanaan pa Ijitu, pa primeru bês. ¹³ Na sugundu bês, Juzé dexa ses irmons rakonhesi-l i Faraó bira ta konxi se família. ¹⁴ Nton Juzé manda txoma se pai Jakó, ku tudu se família, ki era setenta i sinku algen. ¹⁵ Jakó dixi pa Ijitu, i e fika la ti ki e móre; el ku tudu nos patriarka; ¹⁶ Dipôs ses korpu lebadu di volta pa bila di siken, i es podu na siputura ki Abron kunpraba aintis, pa un presu di prata, di fidjus di Emor na Siken. ¹⁷ Kantu txiga tenpu pa Déus kunpri kel promésa ki el tenba fetu pa Abron, nunbru di nos povo dja tenba biradu txeu na Ijitu. ¹⁸ Ti ki labanta un nobu rei na Ijitu ki ka konxeba nada di Juzé. ¹⁹ Kel rei li trata nos povu ku krueldadi, e maltrata nos antipasadu tantu ki e obriga-s larga ses minis nobu pa more. ²⁰ Na kel tenpu nasi Moizes, ki era un mininu rei di bunitu na odju di Déus, duranti três mês e kria na kaza di se mai ku se pai. ²¹ Kantu es larga Moizes, fidju fémia di faraó panha-l i el kria-l sima se própri fidju. ²² Asin moizés foi ixinadu na tudu sabedoria di Ijitu, i e bira ómi di puder na tudu ki e taflaba i fazeba. ²³ Kantu Moizes faze kotenta anu di idadi, da-l gana di bai djobe ses irmon di povu di Israel. ²⁴ Asin, kontisi ki e odja un di es ta se tratadu ku injustisa pa un ómi di Ijitu. Moizes ba difendi-l pa faze-l justisa, e da kel ómi di Ijitu pankada i e móre. ²⁵ Purtantu Moizes ta pensaba má ses irmon ta baba intende, má Déus kreba salva-s através di el, má es ka intendi. ²⁶ Na kel otu dia, el odja dôs di ses irmon di povu di Israel ki sa ta brigaba. E tenta pô-s sabi ku kupanheru i e fla-s: Ómis, anhos é irmons, pamodi ki nhos sa ta briga ku kupanheru? ²⁷ Má kel ki staba ta maltrata kel otu, e pintxa Moizes i e fla: Kenha ki pô-u nos xéfi ô nos juis? ²⁸ Bu krê mata-m sima bu mata kel ómi di Ijitu onti? ²⁹ Óra ki Moizes obi kel kuza ki kel ómi fla-l, e fuji pa téra di Midian, undi ki e vive sima strajeru, i foi la ki ses dôs fidju matxo nase. ³⁰ Dipôs di korenta anu, parse-l un anju na meiu di lumi, ki staba ta ardi na un pé di spinhu na dizértu di Monti Sinai. ³¹ Moizes fika dimiradu ku kel kuza ki e odja, i e txiga más pértu, pa el odja-l dretu. Má e obi voz di Sinhor ki fla-l: ³² Ami é Déus di bu antipasadu, Déus di aAbraon, di Isak , i di Jakó. Moizes fika ta tremi di medu, i e ka tenba koraji di odja pa kel kuza. ³³ Déus fla-l: Tra sandália di bu pé, pamó lugar undi ki bu sta sakedu é txon santu. ³⁴ Podi ter serteza ki dja N odja afrónta di nha povu na Ijitu, dja N obi ses gritu di dór i N dixi pa liberta-s; agó, ben á N manda-u pa Ijitu. ³⁵ Stébu kontínua ta fla: Nton Déus manda kel mésmu Moizes li, ki povu di Israel nega kandu es fla: Kenha ki pô-u nos xéfi i nos juis? Através di kel anju ki parse pa el, na meiu di un pé di spinhu. Déus manda Moizes pa ser xéfi i libertador di povu di Israel. ³⁶ É el ki tras di Ijitu i e faze maravilhas i grandi sinal na Ijitu, na mar brumedju i na dizértu, duranti korenta anu. ³⁷ Kel-li é kel Moizes ki fla povu di Israel: Na meiu di nhos, Déus ta labanta un prufeta sima min. ³⁸ É kel Moizes li ki staba raunidu ku povu di Israel na dizértu, e staba la ku nos antipasadu, i ku kel anju ki papiaba ku el, na Monti Sinai, undi ki el rasebe kes palavra di Déus, ki ta da bida, pa e pasa-s pa nos; ³⁹ má nos antipasadu ka obi ku Moizes, es nega-l i na ses kurason, es kreba volta pa Ijitu; ⁴⁰ es fla Aron: Faze-nu un Déus ki ta bai adianti, pamodi kel Moizes ki tra-nu di téra di Ijitu, nu ka sabe kuze ki kontise ku el. ⁴¹ Asin, es faze un imagi na forma di un bizeru, i es oferesi sacrifisiu pa kel ídolu. Nton foi na kes dia ki nos antipasadu kumesa ta da ónra pa kes kuza ki es faze ku ses mon. ⁴² Déus afasta di es i E intrega-s pa es adora astrus di séu, sima sta skritu la livru di prufétas: I nhos, povu di Israel, éra pa mi ki nhos traze limária pa oferesi sakrifísiu duranti korénta anu na dizértu? ⁴³ Nau, nhos karega ténda di nhos déus Maloki i strela di nhos déus Refan, imaji ki nhos faze pa nhos adora; purisu, N ta pôi-nhos ser disportadu pa la di Babilónia. ⁴⁴ Nos antipasadu na dizertu tenba ténda di prizénsa di Déus na ses meiu, ki Déus manda pa Moizes faze, konfórmi kel planta ki Moizes mostradu. ⁴⁵ Dipôs, nos antipasadu toma kel ténda di mon di ses antipasadu, i es leba-l kantu es bai ku Juzué pa toma posi di téra di kes nason undi ki Déus kóre ku ses gentis dianti di nos antipasadu. I kel ténpu fika la ti ténpu di rei Davidi. ⁴⁶ Davidi atxa favor dianti di Déus, i Davidi pedi-L pa-L dexa-l faze un kaza pa Déus di jakó. ⁴⁷ Kontudu, era salomon ki ben feze kel kaza pa El. ⁴⁸ Má Déus ki sta di riba tudu, ka ta mora na kaza ki fazedu pa mon di ómi, sima pruféta fla: ⁴⁹ Sinhor fla: Séu é nha tronu i mundu é banku undi ki N ta diskansa nhas pé. Ki tipu di kaza nhos ta faze pa Mi? ô undi ki é nha lugar di diskansu? ⁵⁰ É ka nha mon ki faze tudu kes kuza li? ⁵¹ Stébu ta fla-s: Nhos ten kabesa rixu i kurason pagon, ku obidu ki ka ta obi! Anhos ta nega Spritu Santu tudu óra i asin nhos é talikual nhos antipasadu. ⁵² Ten algun pruféta ki nhos antipasad ka pirsigi? es mata ki kes ki prufetiza, na ténpu antigu, má kel-ki-é-justu te benba. I gó si li, nhos bira se traidor i asasinu. ⁵³ Anhos ka obidesi lei di Déus, mesmu ki nhos racebe-l pa mon di ke-l anju. ⁵⁴ Sin ki kel tribunal más altu di Judeus, kaba di obi kes kuza ki Stébu fla, es fika ku tantu raiba ki es kumesa ta nhemi denti kóntra el. ⁵⁵ Má Stebu, staba xeiu di Spritu Santu, i e poi ses odju fikisu na séu, e odja glória di Déus i Jizus sakedu na ladu diretu di Déus. ⁵⁶ Nton Stébu fla: N sa ta odja séu abertu i fidju di ómi sakedu na ladu diretu di Déus! ⁵⁷ Kes gentis di tribunal tapa obidu, es grita rixu i es avansa tudu djuntu kóntra Stébu. ⁵⁸ Es bota-l fora di sidadi pa da-l ku pédra. Antis di da-l ku pédra, kes tistimunha tras ses kapa i es pô-s djuntu na kudadu di un rapaz ku nomi di Saulu. ⁵⁹ Es kontínua ta da Stébu ku pédra, mésmu kantu Stébu staba ta ora pa Déus ta fla: Sinhor Jizus, rasebi nha spritu. ⁶⁰ Dipôs, e kai di djuedju na txon i e fla ku vós altu: Sinhor, ka nhu kondena-s pa es pekadu li. Asin ki es fla kes palavra, e móre.