¹ "Nhas irmons ku nhas gentis grandi di povu judeu, gósi li nhos sukuta nha difésa na nhos dianti". ² Óra ki es obi-l ta pâpia na lingua di judeus, es fika inda más kétu. Nton Paulu fla: ³ "Ami é judeu, ki nase na sidadi di tarsu di Silísia, má N kria li na es sidadi di Jeruzalen. Ami idukadu na pé di Gamaliel, ku txeu rigor, di akordu ku lei di nos antipasadu, Ami éra fórti kuidadozu pa Déus, móda tudu nhos ki sta li oji. ⁴ Ami, N ta pirsigiba sigidoris di Kel Kaminhu ti mórti. N ta maraba tantu ómi kómu mudjer, pa leba-s pa kadiâ. ⁵ Ti xéfi di saserdótis, ku asenbleia di gentis granti di povu judeu, pode korfirma ma é simé. Es da-m uns karta pa N leba pa irmons na Damasku, pa N ba mara kes sigidor di Kaminhu la. pa N traze-s pa Jeruzalen, pa es ser kastigadu". ⁶ Paulu kontínua ta fla: "Kontise ku mi, na viaji, sin di txiga na Damasku, pa vólta di meiu-dia, dirapenti un lus fórti di séu límia na nha volta. ⁷ N kai na txon y N obi un vós ta fla-m: "Saulu, Saulu, pamô ki bu sa ta pirsigi-m?" ⁸ Y N pasponde: "Anho é kenha, Sinhor?" Nton E fla-m: "Mi é Jezus di Nazaré, kel ki bu sa ta pirsigi". ⁹ Nhas kunpanheru na viaji odja kel lus, má es ka persebe kel vós ki staba ta pâpia ku mi. ¹⁰ Nton, N purgunta-L: "Kuzé ki N debe faze, Sinhor?" Y Sinhor fla-m: "Labanta y bu bai pa Damasku. La bu ta rasebe informason sobri tudu kuza ki dja dizignadu pa bu faze". ¹¹ Má N ka podeba odja, purkausza di intensidadi di kel lus. Nton, nhas kunpanheru di viaji gia-m ti Damasku, pegadu na mon. ¹³ La na Damasku, tenba un sértu ómi ku nómi di Ananias. E ta ruspetaba lei di Moizes, y tudu judeu ki ta moraba la ta ruspetaba el. ¹² Es ómi ben vizita-m. E fika di pé bera mi, y e fla: "Nha irmon Saulu, torna odja!" Na kel óra mê, N labanta odju pa el, y N odja-l. ¹⁴ Nton e fla: "Déus di nos antipasadu dja distina pa bu konxe se vontadi, pa bu odja Kel-ki-é-Justu, y pa bu obi palavra di se bóka. ¹⁵ Pamodi, bu ta ser se tistimunha dianti di tudu algen, sobri kes kuza ki bu ten odjadu, y ki bu ten obidu. ¹⁶ Y gósi li, kuzé ki bu sa ta spéra? Labanta, resebe batizmu, txoma na nómi di Sinhor, y bus pekadu ta ser perduadu". ¹⁷ "Kontisi ku mi, dipôs ki N volta pa Jeruzalen, kandu N staba ta ora na Ténplu, un vizon kai riba di mi. ¹⁸ N odja Sinhor, y E fla-m: "Anda! Sai faxi di Jeruzalen, pamodi es ka ta ben rasebe bu tistimunhu sobri mi". ¹⁹ N rasponde-L: "Sinhor, es mê, es sabe ki N ta prendeba y N ta sotaba kes ki ta kriditaba na Nho, na tudu sinagóga. ²⁰ Y kantu es staba ta mata bu tistimunha, Stévon, ami própi, N staba ta guarda kes kapa di kes ki mata-l". ²¹ Nton, E fla-m:" Bai, pamô N ta ben manda-u pa téra lonji, pa kes ki ka é judeu". ²² Multidon staba ta obi Paulu ti ki e fla kel últimu kuza. Má dipôs, es kumesa ta grita y es fla:" Kaba ku es tal ómi di fasi di téra, pamodi ka é dretu pa e sta bibu". ²³ Timenti es ta gritaba, es ta sakudiba ses kapa na ar, y es ta fulhaba téra pa riba. ²⁴ Nton, xéfi di trópa manda ses soldadu kanba déntu kuartel ku Paulu. Dipôs, e manda-s xikótia Paulu pa pô-l fla kal ki éra razon ki kel multidon staba ta grita kóntra el di kel manera. ²⁵ TImenti es staba ta mara-l stikadu, pa es podeba xikotia-l, Paulu fla pa kel komandanti romanu ki staba la paradu:" É ka kóntra lei xikótia un sidadon romanu, sen kondenason di un julgamentu?" ²⁶ Óra ki kel komandanti romanu obi kel-li, e ba konta xéfi di trópa y e fla-l:" Da kudadu ku kuza ki bu sa ta faze li, pamodi es ómi é sidadon romanu". ²⁷ Nton xéfi di trópa txiga na Paulu y e purgunta-l: "Konta-m, abo é sidadon romanu?" Y Paulu rasponde-l: "Sin". ²⁸ Xéfi di trópa rabida fla-l: "N paga txeu dinheru pa N konsigi ganha sidadania romanu". ²⁹ Kel óra mê, kes soldadu ki staba prontu pa xikotia-l, pa pô-l ta rasponde ses purgunta, es râkua di Paulu. Tanbe, xéfi di trópa fika ku medu óra ki e kónta ma Paulu éra sidadon romanu, pamodi e tinha mandadu pa es mara Paulu. ³⁰ Na kel otu dia, xéfi di trópa kreba sabe, ku sertéza, kal ki éra razon ki kes judeu staba ta akuza Paulu. E larga Paulu, y e konvoka raunion ku kes saserdóti prinsipal, djuntu ki tudu tribunal más altu di judeus. Dipôs, e dixi ku Paulu y e pô-l ses dianti.