¹ Dipôs di kes kuza li, Paulu dexa sidadi di Aténas y e bai pa sidadi di Kurintu. ² Na Kurintu e inkontra ku un judeu ku nómi di Ákila, ki nase na pruvínsia di Pontu. Inda ka fazeba txeu ténpu ki Ákila tinha txigadu di Itália, djutu ku se mudjer, Prisila, pamodi Inperador Kláudiu tinha dadu órdi pa tudu judeu sai di sidadi di Roma. Paulu djunta ku es, ³ pamodi e tenba konhisimentu di mézmu trabadju ki es, ki éra profison di faze ténda. Notn, e fika ku es, y e ta trabadjaba ku es. ⁴ Tudu sabadu Paulu staba ta diskuti na sinagóga. E ta tentaba konvense tantu kes judeu kómu kes ki ka éra judeu. ⁵ Kandu Sílas ku Timótiu txiga di pruvínsia di Masedônia, Paulu konsentra sô na konta Palavra di Déus, ta da tistimunhu pa judeus ki Jezus é Misías. ⁶ Má kes judes poi kóntra el y es koba-l. Nton Paulu sakudi puera di se ropa y e fla-s: "Nho sangi ta ser riba nhos kabésa. Ami, N sta linpu. Gósi li, N ta bai pa pa kes ki ka é judeu ". ⁷ Nton, Paulu sai di kel sinagóga y e kanba pa un kaza ki ta fikaba djuntu di kel sinagóga, ki ta pertenseba un ómi ku nómi di Tísiu Justu, ki éra un ómi ki ta ruspetaba Déus. ⁸ Krispu, xéfi di sinagóga, e kridita na SInhor, djuntu ku tudu algen di se kaza. Tanbe, txeu otus algen ki obi mensaji na Kurintu, es kridita y es staba ta ser batizadu. ⁹ Na un vizon di noti, Sinhor fla Paulu: "Ka bu kala, má kontínua ta pâpia sen medu, ¹⁰ pamodi N sta ku bo, y ningen ka ta ataka-u pa faze-u mal. Ten txeu algen, pa Mi, li na es sidadi". ¹¹ Nton, Paulu fika un anu y meiu ku es, ta inxina Palavra di Déus na ses meiu. ¹² Na ténpu ki Gáliu ben fika governador di pruvínsia di Akaia, kes judeu labanta djuntu kóntra Paulu y es leba-l pa tribunal. ¹³ Es akuza-l y es fla: "Es ómi li sta ta tenta poi gentis adora Déus di manera kóntra lei". ¹⁴ Má sin ki Paulu abri se bóka pa pâpia, Gáliu volta pa kes judeu y e fla: "Nhos judeu, nhos obi li, si tenba mê algun kazu di injustisa, ô krimi gravi, N ta ten razon pa N obi-nhos ku paxénxa. ¹⁵ Má kómu nhos kriston é sô sobri uns palavra ku nómi, y di nhos lei, nhos trata es kuza nhos mê. N ka krê ser juís di kes kuza li". ¹⁶ Dipôs, e kóre ku es di tribunal. ¹⁷ Nton, tudu kes judeu pega Sóstenis, ki éra xéfi di sinagóga, y es dadji na el na frénti di tribunal. Má Gáliu ka liga nada di kes kuza. ¹⁸ Kontudu, Paulu fika na Kurintu pa txeu dia. Dipôs e dispidi di irmons, y e nbarka pa pruvínsia di Síria. Prisila ku Ákalia viaja djuntu ku el. Má ántis, na sidaid di Senkréia, Paulu rapa kabésa kómu sinal di promésa ki e fase. ¹⁹ Kandu barku traka na kais di sidadi di Éfesu, Paulu dispidi di Prisil ku Ákila, ki fika la. Má ántis di Paulu kontínua se viaji, e bai pa sinagóga na Éfesu, y e diskuti ku kes judeu. ²⁰ Kes gentis la pidi-l pa e fika ku es más un ténpu, má e ka seta. ²¹ Nton, e dispidi di es y e fla: "N ta torna ben vizita-nhos, si Déus ta kré". Dipôs, e volta pa kais di Éfesu, y e nbarka pa kontínua se viaji. ²² Sin ki e txiga na sidadi si Sezaréia, e subi pa fla mantenha pa igreja di Jeruzalen y dipôs e dixi pa Antiokia. ²³ Nton, Paulu fika un ténpu na Antiokia. Dipôs, e viaja otu bés. E pasa pa kes pruvínsia di Galásia ku Fríjia, undi ki e ta daba ánimu pa tudu disiplu. ²⁴ Na kes dia, txiga na Éfesu un judeu ku nómi di Apolu, ki nase na sidadi di Alixandria. El éra un ómiki ta sabeba pâpia sabi y e ta konxeba Skrituras Sagradu dretu. ²⁵ E foi inxinadu dretu na kaminhu di Sinhor, y ku fórti ánimu, e ta pruklamaba y e ta inxinaba dretu kes verdadi sobri Jezus, sen disviu. Má e konxeba sô batizmu di Djon. ²⁶ E kumesa ta pâpia na sinagóga ku kunfiansa. Kandu Prisila ku Ákila obi-l, es txoma-l pa ses kaza, y es splika-l Kaminhu di Déus más midjór. ²⁷ Dipôs, kandu Apolu disidi bai pa Akaia, irmons da-l forsa y es skrebe un karta pa disiplus la, pa es rasebe-l dretu. Kandu e txiga, e da txeu ajuda pa kes di la ki ta kriditaba através di grasa. ²⁸ Pamodi, ku txeu forsa e ta dirotaba argumentason di kes judeu na dibati públiku, y ku grandi puder e ta mostraba na Skrituras Sagradu ma Jezus é Misías.