^{1 2} Paulu ku Sílas pasa pa kes sidadi di Anfípulis ku Apulônia, y es txiga na sidadi di Tisalônika, undi ki tenba un sinagóga di judeus. Y móda éra kustumu di Paulu, e bai pa sinagóga, y pa trés sabadu e fika ta pâpia ku es la. Na Palavra di Déus, ³ e ta splikaba y e ta daba próva pa mostra ma éra prisizu Misías sufri, y dipôs pa e rasusita di meiu di mortus. Y e ta flaba:" Kel Jezus ki N ta pruklama pa nhos, é El ki é Misías". ⁴ Alguns entri es fika konvensidu y es uni ku Paulu y Sílas, djuntu ku un monti di gregu, ki tinha setadu ralijion di judeus, y txeu mudjer importanti. ⁵ Má judeus fika ku invéja. Nton, es panha alguns ómi mau, entri kes malandru di rua, pa es kria un multidon pa labanta un rabóita na sidadi. Dipôs es ataka kaza di Jason pa buska Paulu ku Sílas, pa intrega-s na mon di kel multidon. ⁶ Má kómu es ka atxa Paulu ku Sílas la, es rasta Jason ku alguns irmon ti dianti di xéfis di sidadi, y es grita ta fla:" Kes ómi ki dja rabida réstu di mundu, kabésa baxu, gósi li es txiga ti nos sidadi tanbe, ⁷ y Jason sa ta da-s gazadju na se laza. Es tudu, es ta anda kóntra lei di Séza, pamodi es ta fla ma ten otu rei, ki ten nómi di Jezus". ⁸ Óra ki kes xéfi di sidadi obi kes kuza, djuntu ku kel multidon, es tudu, es labanta na un barafunda. ⁹ Nton, kes xéfi di sidadi obriga Jason, y kes otu, pa es paga un fiansa pa ser sóltu, y dipôs es dexa-s bai. ¹⁰ Na kel mézmu noti, kes irmon envia Paulu ku Sílas pa sidadi di Beréia. Sin ki es txiga na Beréia, es bai pa sinagóga di judeu. ¹¹ Konparadu ku kes judeu di la di Tisalônika, kes judeu di Beréia éra más dretu, y ku tudu obidu más abértu. Es rasebe mensaji di Paulu ku tudu interesi, y tudu dia es ta studaba Skrituras Sagradu pa es odja si éra simé. ¹² Purtantu, txeu di es kridita, djuntu ku txeu ómi gregu, y txeu mudjer gregu ki éra inportanti. ¹³ Má óra ki kes judeu di Tisalônika obi ma Paulu ta kontaba Palavra di Déus na Beréia tanbe, es bai ti la y es ajita povu, y es labanta un kunfuzon na multidon. ¹⁴ Asin, sen dimora, kes krenti di Beréia envia Paulu pa bai ti bera-mar, má Sílas ku Timótiu fika na Beréia. ¹⁵ Kes irmon ki sa ta kunpanhaba Paulu, es leba-l ti sidadi di Aténas. Dipôs es volta pa Beréia, y es leba un rekadu di Paulu, pa Sílas ku Timótiu, pa es ba atxa-l la na Aténas. más diprésa posível. ¹⁶ Timenti Paulu staba ta spéra Sílas ku Timótiu na Aténas, se spritu fika ardigadu, pamodi e odja ma kel sidaid staba xeiu di imaji. ¹⁷ Nton, e ta baba pa sinagóga, y e ta diskutiba ku judeus, y ku kes otu ki seta ralijion di judeus. Tanbe, tudu dia e ta baba pa prasa públiku, y e ta papiaba ku tudu algen ki e ta atxaba la. ¹⁸ Alguns filózofu epikureus ku stóikus sa ta papiaba ku el, y alguns fla: "Kuzé ki kel papiador disparaténtu sa ta tenta fla li?" Otus fla: "Ta parse ma el é un pregador di uns déus stranjeru". Es pâpia asin, purkauza di Paulu ku sa ta kontaba Notísia Sábi di Jezus, y di rasureson. ¹⁹ Nton, es leba Paulu pa kanbra di sidadi, txomadu Areópagu, y es fla-l: "Nu krê sabe más sobri es dotrina nobu ki bu sa ta inxina, ²⁰ pamodi bu sa ta traze-nu uns kuzas stranhu pa nos obidu, y nu meste sabe kuzé ki es ta siginifika". ²¹ (Na verdadi, tantu kes gentis di Aténas, kómu kes stranjeru ki ta moraba la, es ka ta priokupaba ku otu kuza alén di fla ô obi últimu nobidadi.) ²² Nton Paulu labanta, e fika sakédu na meiu di raunion di Areópagu, y e fla: "Povu di Aténas, N ta odja ma, di tudu manera, nhos é rei di ralijiozu. ²³ Kandu N staba ta anda na nhos sidadi, N staba ta spia dretu kes kuza ki nhos ta adora, y N atxa un altar undi ki staba skrebedu: "Pa déus ki ka é konxedu". Purtantu, kel Déus ki nhos ta adora, sen konxe-L, é El ki N ta pruklama pa nhos. ²⁴ Es Déus faze mundu, y tudu kuza ki sta na el. El é Sinhor di séu y di téra, y E ka ta mora na kes ténplu ku fazedu pa mon di ómi. ²⁵ Ka ten nada ki mon di ómi pode faze pa El, kómu si E ta meste di algun kuza. Pamodi, é El ki ta da bida, fólgu, y tudu otu kuza, pa tudu algen. ²⁶ E kria primeru óm, y E faze tudu povu ki sai di kel primeru ómi, pa es vive na tudu párti di mundu. Má ántis, E ditermina ses ténpu, y E marka frontera di kes lugar undi ki es podeba mora. ²⁷ Déus faze asin, pa kes povu pode ben buska-L, y talvês es ta atxa-L, si es ta stende ses mon pa El. Kontudu, E ka sta lonji di kada un di nos. ²⁸ Pamodi é na El ki nu ta vive, nu ta mexe y nu ta izisti. Y tanbe sima alguns di nhos puéta dja fla: "Anos tanbe, nu é se fidju". ²⁹ Kómu nos é fidju di Déus, nu ka debe pensa ma Déus é sima un imaji di oru, prata ô pédra, ki ómi ta faze di se imajinason, ku se jetu. ³⁰ Na pasadu, Déus staba ta dexa pasa es tipu di iginoránsia. Má agóra, E manda pa tudu algen, ki sta na tudu lugar, pa es rapende. ³¹ Pamodi, E marka un dia pa E julga mundu ku justisa, através di un ómu ki E skodje. Y E da próva di kel ómi, pa tudu algen, kandu E rasusita-L di meiu di mortu". ³² Óra ki es obi Paulu ta pâpia di rasureson di mortus, alguns faze-l trósa, má otus fla: "Nu ta torna obi-u ta pâpia di es asuntu li otu óra". ³³ Nton Paulu sai di Areópagu, má alguns pesoa bai di Areópagu, ³⁴ má alguns pesoa bai fika djuntu ku el y es kridita. Un di ses éra Dioníziu, ki éra ménbru di Areópagu, un mudjer ku nómi di Dâmaris, y más otus algen.