¹ Palu kontínua na se viaji pa sidadi di Derbi y dipôs pa sidadi di Listra. La na Listra, staba un krenti ku nómi di Timótiu, fidju di un mudjer krenti ki éra judeu, má di pai ki éra gregu. ² Tudu irmon na sidadis di Listra ku Ikôniu ta papiaba ben di Timótiu. ³ Nton, Palu kreba leba Timótiu djuntu ku es na viaji. Má ántis, e leba Timótiu pa e ser sirkunsidadu, pamodi tudu judeu na kes banda ta sabeba ma pai di Timótiu éra gregu. ⁴ Y na tudu sidadi pa undi ki es ta pasaba, es ta intregaba kes razoluson ki diterminadu pa apóstlus, ku kes grandi ómi di igreja di Jeruzalen, ki debe ser ruspetadu pa krentis ki ka é judeu. ⁵ Asin, igreja ba ta fika más fórti na fé, y nunbru di krentis sa ta omentaba tudu dia. ⁶ Spritu Santu stroba Palu di ba pâpia palavra di Déus na pruvínsia di Ásia. Nton es pasa pa kel párti di téra di Fríjia, ki sta djuntadu na pruvínsia di Galásia. ⁷ Dipôs, óra ki es txiga na frontera di pruvínsia di Mísia, es tenta bai pa pruvínsia di Bitínia, má Spritu di Jezus ka dexa-s. ⁸ Nton, es pasa pa pruvínsia di Mísia, y es dixi pa sidadi di Trôadi. ⁹ Palu tevi un vizon duranti noti. Na kel vizon, un tal ómi di pruvínsia di Masedônia parse sakédu la ta pidi-l, y e fla: "Kanba pa Masedônia. Ben djuda-nu". ¹⁰ Sin ki Palu tevi kel vizon, nu kumesa ta djobe manera di nbarka pa Masedôdia, pamodi nu fika konvensidu ma Déus staba ta txoma-nu pa nu leba Notísia Sábi pa kes gentis la. ¹¹ Nu panha barku na sidadi di Trôadi, y nu navega diretamenti pa ilha di Samotrásia y na kel otu dia nu kontínua pa sidadi di Neápolis. ¹² Di la, nu kaminha pa Filipus, ki é un sidadi kolonial inportanti di ROma, na primeru distritu di pruvínsia di Masedônia. Nu fika na kel sidadi pa ulguns dia. ¹³ Na sabadu, nu sai pa fóra di porton di sidadi, y nu sai pa fóra di porton di sidadi, y nu ba pa bórda di riu. Nu ta pensaba ma debe ten un kau di orason la. Asin, nu xinta la, y nu konbersa ku un grupu di mudjer ki staba djuntadu. ¹⁴ Un mudjer di sidadi di Tiatira, ku nómi di Lídia, staba la ta sukuta-nu. El éra un kumersianti di fazénda púrpura. El ta adoraba Déus y Sinhor abri-l se kurason pa e obi dretu kes kuza ki Palu staba ta fla. ¹⁵ Nton, Lídia batizadu, el djuntu ku tudu algen di se kaza. Dipôs, e pidi-nu y e fla: "Si nhos ta julga ma mi é krenti fiel na Sinhor, nhos ben y nhos fika na nha kaza". Nton e kaba pa konvense-nu. ¹⁶ Un dia, kantu nu staba ta bai pa kau di orason, txiga na nos un mininaskrabu ki tenba un spritu di dibinhason. E ta ganhaba txeu dinheru pa ses donu através di se dibinhason. ¹⁷ Kel minina fika ta sigi tras di Palu, ku nos tanbe, y e fikaba ta grita ta fla:" Kes ómi li es é sérvus di Déus ki sta di riba tudu, y es sa ta konta-nhos kaminhu di salvason". ¹⁸ E kontinua ta fase es kuza duranti txeu dia. Nton, Palu ben fika xatiadu y e volta pa kel spritu y e fla-l:" Na nómi di Jezus Kristu, N ta manda-u pa bu sai di kel minina li". Na kel óra mê, kel spritu sai. ¹⁹ Asin, ses donu da kónta ma es kaba di perde speransa di ganha más lukrunna kel minina. Nton, es pega Paulu ku Sílas, y es rasta-s ti dianti di otoridadis na prasapúbliku. ²⁰ Kantu es laba-s pa kes majistradu romanu es fla: " Kes ómi li, es é judeu, y es sa ta purtuba nos sidadi. ²¹ Es ta inxina ses kustumu, ki nos lei romanu ta fla ma nu ka pode seta nen faze". ²² Nton, un multidon labanta kóntra Paulu ku Sílas, y kes majistradu manda ranka ropa di Paulu ku Sílas pa da-s ku manduku. ²³ Dipôs ki es leba txeu pankada, kes majistradu manda fitxa-s na kadiâ, y es fla karsereru pa e guarda-s ku másimu siguransa. ²⁴ Sin ki guarda kaba di obi kel órdi, e fitxa Paulu ku Sílas na kel séla na fundu di kadiâ. Inda más, e prende ses pé na tronku. ²⁵ La pa mea-noti, Paulu ku Sílas staba ta ora y kanta kantigas di lovor pa Déus, y tudu kes otu prizioneru staba ta sukuta-s. ²⁶ Dirapenti, txon bira ta treme ku txeu forsa, y kadiâ fika ta sakudi, ti na fundu di se alisérsi. Kel óra, tudu pórta di kadiâ abri y tudu korenti kai di tudu prizioneru. ²⁷ Lógu kandu kel karsereru korda, e odja ma tudu pórta di kadiâ staba abértu. Nton, e puxa se spada pa e mata se kabésa, pamodi e sa ta pensaba ma tudu prizioneru dja tinha fujidu. ²⁸ Má Paulu grita rixu y e fla-l: "Ka bu faze nada di mal kóntra bu kabésa. Nu sta tudu li". ²⁹ Nton, karsereru txoma ses gentis pa es ben ku lus, y asin e kanba déntu kel séla di fundu ku txeu présa. E finka se duedju na txon, na pé di Paulu ku Sílas, y e fika ta treme. ³⁰ Dipôs, e leba-s pa fóra di kadiâ y e purgunta-s: "Nhas sinhor, kuzé ki N meste faze pa N ser salvu?" ³¹ Es rasponde-l: "Kritida na SInhor Jezus y bu ta ser salvu, abo ku tudu algen di bu kaza". ³² Nton, Paulu ku Sílas konta palavra di Sinhor pa kel karsereru, y pa tudu algen na se kaza. ³³ Mésmu na kel óra di noti, karsereru leba Paulu ku Sílas pa e laba-s ses frida. Dipôs, sen dimora, e batizadu, el ku tudu algen di se kaza. ³⁴ Nton, e leba Paulu ku Sílas pa se kaza y pripara un méza di kumida pa es. Kel karsereru fika rei di konténti, pamodi e sa ta kriditaba na Déus, y tudu algen di se kaza sa ta kriditaba tanbe. ³⁵ Kandu manxe, kes majistradu manda uns di ses guardas pa kel karsereru pa fla: "Larga kes ómi". ³⁶ Nton, kel karsereru konta kes órdi pa Paulu, y e fla-l: "Kes majistradu manda pa larga-nhos. Gósi li, nhos pode sai, y nhos pode bai na pas". ³⁷ Má Paulu bira pa kes guardas y e fla-s: "Sen prusésu di julgamentu, es manda sota-nu na prasa públiku, y es manda fitxa-nu na kadiâ. Gósi li es krê manda-nu sai sukundidu? Ka pode ser, pamodi nos é sidadon romanu. Nton, kes majistradu meste ben, es mê, pa es kunpanha-nu na nos saída". ³⁸ Kes guardas bai konta kes majistradu tudu kuza ki Paulu fla. Kantu es obi ma Paulu ku Sílas éra sidadon romanu, es fika ku medu. ³⁹ Nton, es bai pidi diskulpa dianti di Paulu ku Sílas, y es kunpanha-s na ses saída di kadiâ. Dipôs es fika ta pidi Paulu ku Sílas pa es sai fóra di sidadi. ⁴⁰ Dipôs ki Paulu ku Sílas sai di kadiâ, es bai pa kaza di Lídia. Es inkontra ku irmons la y es pâpia palavras ki da-s ánimu. Dipôs es bai.