¹ Apótulus, ku sigidoris di Jizus ditudu banda di Judéia, es obi ma pesoas, ki ka éra judeu, dja es rasebeba palabra di Déus tanbe. ² Kuandu Pedru subi pa Jeruzalen, kes ktenti judeu, ki ta defendeba sirkunsinzon, es kritika-l. I es fla: ³ Bu entra na kaza di ómis ki ka éra sirkunsidadu i bu fika osprndu ta kume ku es. ⁴ Nton, Pedru kumesa ta da-s un relatóriu di kuza ki kontise, tintin-pa tintin, dédi kumésu, i e fla: ⁵ N staba ta ora na bila di Jopi kandu N tevi un vizon. N vizon, N odja un kuza sima un lensól grandi ki staba ta ser dixidu di séu, pegadu pa se kuatu pónta, i e txiga ti mi. ⁶ N odja déntu di el dretu, i la N odja txeu animal di téra: kes ki ten kuatu é, doméstiku ku brabu, kes ki ta rasta na txon i pasu ki ta bua na séu. ⁷ N obi tanbe un vós ta fla-m: Pedru, labanta! Mata i bu kume. ⁸ Má N fla: Di ninhun manera, Sinhor, pamodi kes kuza suju, ô inpuru, nunka podu na nha bóka. ⁹ Nton, kel vós rasponde-m di séu, pa sugundu bês: Kes kuza ki Déus poi linpu, ka bu fla ma es é suju. ¹⁰ Kel-li kontise três bês, i dipôs kel kuza lebadu di volta pa séu. ¹¹ I na kel óra mê, três ómi ki mandadu di Sezaréia pa buska-m, es para na frénti di kaza undi N staba ospradu. ¹² Spritu Santu fla-m pa N bai djuntu ku es, sen tuntunhi. Kes sais irmon di Jopi li, es bai djuntu ku mim pa Sezaréia i nu entra na kaza di Kornéliu. ¹³ Kornéliu konta-nu modi ki e odja un anju sakédu na se kaza ki fla-l: Manda uns ómi ti Jopi pa ba txoma Simon, ki tanbe ta txomadu Pedru. ¹⁴ Abo, ku tudu algen di bu kaza, nhos ta ser salvu através di kes palabra ki e ta ben fla-nhos. ¹⁵ Óra ki N kumesa ta pâpia, Spritu Santu dixi riba di es, sima ki e dixiba riba nos na kumésu. ¹⁶ Na kel óra, N lenba di kes palabra ki Sinhor ta flaba: Djon batiza ku agu, má nhos ta brn ser batizadu ku Spritu Santu. ¹⁷ Purtantu, si Déus dja da-s kel mézmu don ki E da-nu tanbe, ora ki nu kridita na Sinhor Jizus Kristu, ami é kenha pa N stronba Déus? ¹⁸ Dipôs ki es obi kes kuza, es larga ses kritika, es da Déus glória i es fla: Nton, mézmu pa kes ki ka é judeu, Déus tanbe da-s es rapendimentu ki ta da bida. ¹⁹ Agóra, kes sigidor ki spadjadu purkauza di pirsigison, ki ben dipôs di móti di Stébu, es bai ti prunvínsia di Finísia, ilha di Xiprie i sidadi di Antiokia. Es tava papiaba Palabra di Déus na kes kau. má sô pa kes ki éra judeu. ²⁰ Má tenba otus sigidor di Xipri i di sidadi di Sirene, i kandu kes ómi bai pa sidadi di Antiokia, es konta Notísia Sábi di Sinhor Jizus pa kes ki ka éra judeu. ²¹ I mon di Déus staba ku kes ómi i un monti di kes ki ka éra judeu kridita i es konvete pa Sinhor. ²² Nobidadi di kes kuza li txiga na obidu di gentis di igreja di Jruzalen, nton es manda Barnabé pa Antiokia. ²³ Kandu e txiga e odja ma gras di Déus staba ku es i fika kontenti. E apoia-s tudu pa es mante fiel, ku ses kurason firmi na Sinhor. ²⁴ Barnabé éra un bon ómi, xeiu di Spritu Santu i di fé: Asin, un monti di algen ben djuntu na kaminhu di Sinhor. ²⁵ Kontise ki Brnabé bai pa sidai di Tarsu pa e ba djobe Sulu; I kandu e atxa-l, e leba-l pa Antiokia. ²⁶ Asin pa un anu interu, Barnabé ku Saulu fika djuntadu ku kel igreja, i inxina un minti di algen; Foi la na Antiokia ki sigidoris di Jizus kumesa ta ser txomadu ktiston. ²⁷ Gosi, na kes dia, dixi uns pruféta di Jeruzalen pa Antiokia. ²⁸ Un di es, txomadu Ágabu, e labanta, i através di Spritu Santu e dexa klaru ma un grandi fómi staba pa ben riba di mundu interu. Kel-li kontise na ténpu kandu Kláudiu éra Inperador romanu. ²⁹ Nton, kes sigidor na Antiokia, es konkorda pa manda un ajuda, konfórmi posibilidadi di kada un, pa irmons ki ta moraba na Judéa. ³⁰ Purtantu, é si ki es faze, i es manda oférta pa xéfis di igreja na Jeruzalen, pa mon di Barnabé ku Saulu.