¹ Ndipo tewelela noyambapo ulwendo wasu kupitila mcipululu kunjila yaku nyanja yamatete monga mwelabilila Yehova kwa neo; tezweta lupili la Seira kwa masiku anyunji. ² Yehova elabila nane kuti, ³ 'wazuluguluka lupili ili kwa nthawi itali; cungulukila ku m'mpoto. ⁴ Lamulila banthu, kuti, "mupitile mu malile ya azinekwanu, bana ba Esau, onkhala ku Seira; bankhale na mantha na mweo. Moteto nkhalani na chelu kuti ⁵ musayambane nao, pakuti nikupeni lini malo yao yaliyonse, yai, Osakwanila loko nsonga ya kwendo kudyakamo; ndaba nepaa lupili ya Seira kwa Esau ngati coloba cake. ⁶ Mukagule cakulya kwao na ndalama, kuti mukaluye; mukagule soti manzikwa beve na ndalama, kuti mukamwe. ⁷ Pakuti Yehova Mulungu wanu wakudalisani mu nchito zanu zilizonse za manja banu; waziba mayendedwe banu onse mcipululu cino cikulu. Pa zaka fote Yehova Mulunguwanu wankhala na mweo, ndipo muliyesopo kanthu.'" ⁸ Teto tepitilako kwa anekwasu , akubanja ya Esau onkhala ku Seira, kutali na mseu waku Araba, kufuma ku Elati nakufuma Ezioni Gebera. Ndipo tewelela nakupitila njira yaku cipululu ca Moabu. ⁹ Yehova elabila nane, "usavutishe Moabu, ndipo usanyatane nao ku nkhondo. Pakuti nukupe lini nthaka yake kuti ibe yako, cifukwa napasa Ari kwa bana obadwa kuvuli ba Loti, monga coloba cao.' ¹⁰ (Ba Emiti bezonkhalako kale, banthu bamphamvu, banyinji, ndipo batali ngati ba Anaki; ¹¹ aba soti otolewa kuba a Refaimu, monga ba Anaki; koma a Moanu obaita kuti ba Emiti. ¹² Ba Hori benkhalako ku Seiri kuvuli, koma bana ba Esau ebagonjesa. Ebaononga kale kale nakuyonkhala mu malo bao, Monga mwecitila Israeli nthaka ya coloba cake yebapa Yehova.) ¹³ '"Lomba nyamuka nukuya kutaukila ku doko ya Zeredi.' Teto tetauka doko la Zeredi. ¹⁴ Lomba masiku yatefuma ku Kedesi baniya kufwika petetauka doko la Zeredi, yenze zaka sate eiti. Yenze nthawi yala kauti mbadwo wonse wa analume ofwikapo kunyata nkhondo wetisiya, monga mwelumbilila Yehova kwa beve. ¹⁵ Moonjela, kwanja la Yehova kwenzoshuna na mbadwo uyu kuti abaononge kufuma pa banthu mpaka usile. ¹⁶ Teto zecitika, pesila onse analume bakuti banganyate nkhondo besila nakufwa pakati pa banthu, ¹⁷ teto Yehova elabila naneo, kuti, ¹⁸ 'ufunika kupitilila Ari, malile ya Moabu. ¹⁹ Mukayofwika pafupi molangana na banthu ba Amoni, musabavute olo kunyatana nao; pakuti nikakupe lini malo aliyonse pkati pa banthu ba Amoni ngati coloba, cifukwa nipasa mbadwo wa Loti kuba coloba cao.'" ²⁰ (Yala soti yotolewa kuba malo ya Refaimu. Ba rafaimu benzonkhala kula masiku ya kuvuli- koma ba Amoni enzobaita kuti ba Zamzumimu- ²¹ banthu bamphamvu, manyinji, ndipo batali monga ni ba Anaki. Koma Yehova ebaononga pamenso pa Amoni, ndipo bekwanisha kubagonjesa na kunkhala mu malo bao. ²² Uyu Yehova ecita soti ku banthu ba Esau, benzonkhla ku Seiri, peciononga a hariti kufuma pakati pao, ndipo mbadwo wa Esau webagonjesa na kunkhala m'malo bao mpaka kufwika lero. ²³ Kwa Aviti benzonkhala m'minzi kutali na Gaza, ba Kafitorimu, befumila ku Kafitori, ebaononga nonkhala m'malo bao.) ²⁴ '"Lomba nyamukani, nkhoyani pa ulwendo wanu, ndipo mupitile mcigwa ca Anoni; langani, napeleka m'manja mwanu Sihoni mu Amori, mfumu ya Heziboni, na malo yake. Yambani kubatola ndipo unyatane naye nkhondo. ²⁵ Lero nuyamba kuika mantha na ciophyezo cako kwa banthu bali pansi pa mkumbi; babamvwe mbili yako nakukutumila nakumvwa mantha cifukwa ca mweo.' ²⁶ Natuma onyamula uthenga kufuma ku Kademati kufwika ku Sihoni mfumu ya Hesiboni, na mau ya mtendele, kuti, ²⁷ 'lekani tipile mu malo yanu; nupitilila mu mseu ukulene; nipatukile lini ku kwanja la kwendi olo ku kwanja la manjele. ²⁸ Munigulise vakulya na ndalama, kuti nilye; nipaseni manzi ya ndala kuti nimwe; mulole tyala kuti nipite na mendo yangu; ²⁹ monga mbadwo wa Esau wenkhala mu Seiri na Moabu enkhala mu Ari ecitila; mpaka nikapite kutauka Yorodani mu malo yamene Yehova Mulungu wasu etipasa.' ³⁰ Koma Sihoni mfumu ya Hesiboni, aliye tilole kupitila m'malo mwake, ndipo Yehova Mulungu wanu ekosesha maganizo yake nakulimbikisha mtima wake mopitilila, kuti amgonjese kusebenzesha mphamvu zanu, zawacita siku la lero. ³¹ Yehova elabila na neo, 'langa, nayamba kupeleka Sihoni na malo yake kwa weo; yamba kubatola, kuti unkhale mu malo bake.' ³² Teto Sihoni ewela notinkila seo, eve na banthu bake onse kunyatana pa Yahazi. ³³ Yehova Mulungu wassu emupeleka kwa seo ndipo tegonjesa eve na bana bake na banthu bake onse. ³⁴ Tetola maboma bake onse pa nthawi iyo na kusilizyilatu kuononga boma iliyonse- analume a anakazi na bana atontho; tiliye siye wamoyo. ³⁵ Nyama tyala tetol kuba cioneshela casu, pamozi na zooneshela vamboma vetetola. ³⁶ Kufuma ku Aroeri, ili kosilizyila kwa cigwa ca Arinoni; na kufuma ku boma ili mcigwa, mpaka kufwika ku Giliyadi kwenzevye boma litali kwa seo, Yehova Mulungu wasu eyapeleka m'manja mwasu. ³⁷ Kwenze tyala malo yambadwo wa Amoni yamulie luteko, na mabli yamkolo wa Yaboki, na boma ya calo ca lupili- kulikonse Yehova Mulungu kwetililesha kulutako.