¹ Nagpunta si Jesus sa Bundok ng Olibo. ² Maaga pa lang sa umaga, nagpunta uli siya sa templo at lumapit ang lahat ng tao sa kaniya. Umupo siya at tinuruan niya sila. ³ Dinala sa kaniya ng mga eskriba at mga Pariseo ang isang babaeng nahuli nilang nakikiapid. Inilagay nila siya sa gitna nila. ⁴ Sinabi nila sa kaniya, "Guro, huling-huli namin ang babaeng ito na nakikiapid. ⁵ Ayon sa Kautusan, iniuutos ni Moises na batuhin ang mga taong tulad niya. Ano namang masasabi niyo tungkol sa kaniya?" ⁶ Sinabi nila ito para magkaroon sila ng dahilan para hulihin nila siya at may ibintang laban sa kaniya. Pero yumuko lang si Jesus at nagsulat sa lupa gamit ang kaniyang daliri. ⁷ Marami pa silang tinanong sa kaniya kaya tumayo si Jesus at sinabi sa kanila, "Kung mayroon isa sa inyong walang kasalanan, siya ang dapat na unang bumato sa kaniya." ⁸ Muling yumuko si Jesus at nagsulat uli sa lupa gamit ang kaniyang daliri. ⁹ Nung marinig nila ito, isa-isa silang umalis, nauna muna ang pinakamatatanda sa kanila. Sa huli, naiwan si Jesus na kasama ang babaeng nasa gitna. ¹⁰ Tumayo si Jesus at tinanong siya, "Babae, nasaan na ang mga humuhusga sa iyo?" ¹¹ Sumagot siya, "Wala po, Panginoon." Sinabi ni Jesus, "Hindi rin kita huhusgahan. Sige tumuloy ka at huwag ka nang magkakasala pa uli."] ¹² Muling nagsalita si Jesus sa kanila, "Ako ang ilaw ng sanlibutan. Ang sinumang susunod sa akin ay hindi na lalakad sa kadiliman kundi magkakaroon ng liwanag ng buhay." ¹³ Sinabi sa kaniya ng mga Pariseo, "Nagpapatotoo ka para lang sa iyong sarili. Walang katotohanan ang iyong patotoo." ¹⁴ Sinagot sila ni Jesus, "Kahit na nagpapatotoo ako tungkol sa aking sarili, nagsasabi ako ng totoo. Alam ko kung saan ako nanggaling at kung saan ako patungo, pero hindi ninyo alam kung saan ako nanggaling at saan ako patungo. ¹⁵ Humuhusga kayo ayon sa laman. Wala akong hinuhusgahan. ¹⁶ Pero pag humusga ako, totoo ang aking paghusga dahil hindi ako nag-iisa dahil kasama ko ang aking Amang nagsugo sa akin. ¹⁷ Tunay ang nakasulat sa inyong Kautusan na tunay ang patotoo ng dalawang tao. ¹⁸ Narito akong nagpapatotoo sa aking sarili at kasama ko ang aking Amang nagpapatotoo tungkol sa akin." ¹⁹ Sinabi nila sa kaniya, "Nasaan ang iyong ama?" Sumagot si Jesus, "Hindi niyo ako kilala o kahit ang aking Ama. Kung kilala niyo ako, makikilala niyo rin ang aking Ama." ²⁰ Sinabi niya ang mga salitang ito habang nagtuturo siya sa harapan ng pinag-iipunan ng yaman ng templo. Pero walang humuli sa kaniya dahil hindi pa dumarating ang kaniyang oras. ²¹ Muling sinabi niya sa kanila, "Aalis ako at hahanapin ninyo ako pero mamamatay kayo sa inyong kasalanan. Kung saan ako pupunta, hindi kayo makakasunod." ²² Sinabi ng mga Judio, "Papatayin niya ba ang kaniyang sarili? Iyon ba ang dahilan kaya niya nasabing, "Kung saan ako pupunta, hindi kayo makakasunod?" ²³ SInabi ni Jesus sa kanila, "Kayo ay nanggaling sa ilalim. Nanggaling ako sa itaas. Kabilang kayo sa mundong ito. Hindi ako kabilang sa mundong ito. ²⁴ Kaya nga sinasabi ko sa inyo, mamamatay kayo sa inyong kasalanan. Maliban na maniwala kayo na AKO NGA, mamamatay kayo sa inyong kasalanan. ²⁵ Sinabi nila sa kaniya, "Sino ka ba?" Sumagot si Jesus, "Sinabi ko na sa inyo sa simula pa lang. ²⁶ Marami pa akong gustong sabihin at husgahan tungkol sa inyo. Pero totoo ang nagsugo sa akin. Sinasabi ko sa mundo ang mga napakinggan ko mula sa kaniya." ²⁷ Pero hindi nila naintindihan na ang Ama ang tinutukoy niya. ²⁸ Sinabi ni Jesus, "Hanggang sa maitaas ninyo ang Anak ng Tao, saka niyo pa lang malalaman na AKO NGA, at wala akong ginagawa para sa sarili ko lang. ²⁹ Pinapahayag ko ang mga salitang ito ayon sa tinuro ng Ama sa akin. Kasama ko ang nagsugo sa akin at hindi niya ako pinabayaang mag-isa dahil lagi kong ginagawa ang nakakalugod sa kaniya." ³⁰ Marami ang naniwala kay Jesus dahil sa sinabi niyang ito. ³¹ Sinabi ni Jesus sa mga Judio na naniwala sa kaniya, "Kung mananatili kayo sa aking salita, pinapatunayan nito na kayo nga ang mga alagad ko. ³² Malalaman ninyo ang katotohanan at ang katotohanan ang magpapalaya sa inyo." ³³ Sumagot sila, "Kami ang mga inapo ni Abraham at hindi kami naging alipin ninuman. Bakit mo sinasabing, 'Palalayain kayo'?" ³⁴ Sumagot si Jesus sa kanila, "Sinasabi ko sa inyo ng totoo, ang sinumang nagkakasala ay alipin ng kasalanan. ³⁵ Hindi nananatili ang alipin sa isang tahanan ngunit nananatili ang anak magpakailanman. ³⁶ Kaya kung pinalaya kayo ng Anak, tuluyan niya kayong pinalaya. ³⁷ Alam kong mga inapo nga kayo ni Abraham. Gusto niyo akong patayin dahil walang bahagi ang salita ko sa inyo. ³⁸ Sinasabi ko kung anong nakikita ko mula sa aking Ama pero ginagawa niyo rin kung anong narinig ninyo mula sa inyong ama." ³⁹ Sinagot nila siya, "Si Abraham ang ama namin." Sinabi ni Jesus sa kanila, "Kung talaga ngang mga anak kayo nia Abraham, dapat ginagawa niyo rin ang ginawa ni Abraham. ⁴⁰ Pero gusto niyo akong patayin gayong isa akong taong nagsabi ng katotohanang narinig ko mula sa Diyos. Hindi ito ang gawain ni Abraham. ⁴¹ Ginagawa ninyo kung ang gawain ng inyong ama." Sinabi nila sa kaniya, "Hindi kami ipinanganak ayon sa karumihan. Iisa lang ang aming Ama. Siya ang Diyos." ⁴² Sinabi ni Jesus sa kanila, "Kung ang Diyos nga ang inyong Ama, minahal niyo sana ako dahil ako ay nanggaling sa Diyos at narito ngayon. Hindi ako naparito para lang sa aking kagustuhan kundi para sa kaniyang nagsugo sa akin. ⁴³ Bakit hindi niyo maintindihan ang aking sinasabi? Ito ay dahil sa araw niyong makinig sa aking mga salita. ⁴⁴ Kayo ay mula sa inyong ama, ang diyablo at ginagawa ninyo ang kagustuhan ng inyong ama. Mamamatay-tao siya sa simula pa lang at hindi niya tinatayuan ang katotohanan dahil walang katotohanan sa kaniya. Sa tuwing nagsasalita siya, nagsisinungaling siya dahil iyon ang kaniyang kalikasan dahil siya ang ama ng mga sinungaling. ⁴⁵ Pero hindi kayo naniniwala sa akin dahil nagsasabi ako ng totoo. ⁴⁶ Alin sa mga sinabi ko ang ituturing niyong kasalanan? Kung nagsasabi ako ng totoo, bakita ayaw niyong maniwala sa akin? ⁴⁷ Ang taong nagmula sa Diyos ay makikinig sa mga salita ng Diyos. Hindi niyo naririnig ito dahil hindi kayo galing sa Diyos." ⁴⁸ Sinagot siya ng mga Judio, "Diba tama lang na tawagin ka naming isang Samaritano at sinasapian ka ng demonyo?" ⁴⁹ Sinabi ni Jesus, "Hindi ako sinasapian ng demonyo. Pinaparangalan ko ang Ama pero hindi niyo ako ginagalang. ⁵⁰ Hindi ko hinahangad ang sarili kong parangal. May isang nagmamasid at humuhusga. ⁵¹ Sinasabi ko sa inyo ang totoo, kung panghahawakan ninyo ang aking salita, hindi siya mamamatay." ⁵² Sinabi ng mga Judio sa kaniya, "Sinasapian ka nga ng demonyo. Namatay na sina Abraham at ang mga propeta pero sinasabi mo, 'kung panghahawakan ninyo ang aking salita, hindi siya mamamatay.' ⁵³ Higit ka pa ba kaysa sa aming amang si Abraham na namatay na? Namatay rin pati ang mga propeta. Anong gusto mong patunayan?" ⁵⁴ Sumagot si Jesus, "Kung niluluwalhati ko ang sarili ko, wala itong saysay. Ang aking Ama ang lumuluwalhati sa akin--siya ang itinuturing ninyong inyong Diyos. ⁵⁵ Hindi niyo siya kilala pero kilala ko siya. Kung sasabihin kong hindi ko siya kilala, magiging sinungaling din ako katulad ninyo. Pero kilala ko siya at tinutupad niya ang kaniyang salita. ⁵⁶ Ikinagalak ng inyong amang si Abraham na makita niya ang pagdating ng araw ko at masaya siya." ⁵⁷ Sinabi sa kaniya ng mga Judio, "Wala ka pa ngang limampung taong gulang pero sinasabi mong nakita mo na si Abraham?" ⁵⁸ Sumagot si Jesus, "Sinasabi ko sa inyo ang totoo, bago pa dumating si Abraham, AKO Nga. ⁵⁹ Kaya dumampot sila ng bato at tinangka nilang batuhin siya pero umiwas si Jesus at umalis sa templo.