¹ "Kikergeite anyun bounatetab kipsengwet bergeinik taman, che kiib taisiekwai, koba kotorokta sandetab katunisiet. ² Kisalon mut eng' ichek ak, king'omen mut. ³ Amu kingoib che salon taisiekwai ko ma ipto ichek kopoto mwanik. ⁴ Ago kiib che ng'omen mwanik eng' chuboisiekwai koboto taisiekwai. ⁵ Ak kingoto koenige sandet, kobirto met tugul ak konukyo. ⁶ Ago kibiit waaget kemoi kwen, 'Oroo kagoit sandet! Omonde ak otoroch inendet.' ⁷ King'eetyo anyun bergeiniechoto tugul, kochob taisiekwai. ⁸ Ak kileji anyun, che salonoi che ng'omen, 'okonech mwanikwok amu meche komisogis taisiekyo.' ⁹ Ago kiwolji che ng'omen koleji, "Amu maemech achek ak akwe, kaigai oba ole mi che oldoi ak oaljige.' ¹⁰ Ak kingoto kobendi koalisie koit sandet ak komongii anyun che chobotin, igortab katunisiet ak inendet, ak kigiger kurget. ¹¹ Ak eng' let kobga bergeinik chagei agiche ak kole 'Kiptaiyandani, Kiptaiyandani yatwech.' ¹² Ak kiwolji koleji, 'Amwowok, iman ale mangetok.' ¹³ Noto anyun oripse amu monget betut nda ko sait. ¹⁴ "Amu u yo kimache kwo chito emet age. Ak koguur otwogikyi, ak kogochi tugukyi. ¹⁵ Kiigochi age talentaisiek mut, kogochi age aeng, kogochi age agenge. Kikigochi age tugul ko u kamugennyi, ak kwo chichoto bandanyi. ¹⁶ Kiwo anyun inendet ne kitaach talentaisiek mut kwo koboisie, ak kinyor talentaisiek alak mut. ¹⁷ Ko u noto agine ne kitaach aeng' ko kinyor aeng' alak. ¹⁸ Ago kiwo ne kitaach agenge kwo kobolji ng'weny ak kouny feda ne bo kiptaiyandennyi. ¹⁹ Kingobata anyun betuisiek che chang' kocho kiptaiyatab otwogichoto, ak koiit koboto icheget. ²⁰ Ak kicho inendet ne kiga taach talentaisiek mut koibu talentaisiek mut alak. Ak kole, 'Kiptaiyandani kigonoo talentaisiek mut. Keer anyun angchu talendaisiek mut alak che kitesogis.' . ²¹ Kileji, kiptaiyandennyi kiiyai ne kararan otwogindeni kararan ago ne kiyoni! Koiegu ne kiyoni eng' tuguk che ng'ering' kandenin anyun ibou tuguk che chang'. Mongji anyun boiboiyetab kiptaiyandeng'ung.' ²² Ak kicho agine ne kigataach talentaisiek aeng' ak kole 'Kiptayandeni kigono talentaisiek aeng. Keer anyun kianyoru talentaisiek alak aeng'. ²³ Kilenji kiptaiyandennyi, 'Kiiyai ne kararan otwogindoni kararan ago ne kiyoni, koiegu ne bo iman eng' tuguk che ng'ering' kandenin ibou tuguk che chang'. 'Mongji anyun boiboiyetab kiptaiyandeng'ung.' ²⁴ Ak kicho agine ne kiga taach talentait agenge ak kole, 'Kiptaiyandani, kiangetin ale ii chi ne korom, igese eng' ole ma igolji kiy ak ium eng' ole ma ilechi. ²⁵ Ak kiaiywei, ak kiawe auny talentaing'ung eng' ng'weny. Angni anyun, ee naam king'ung.' ²⁶ Ago kiwolji Kiptaiyandennyi ak koleji, 'Inye otwogindet ne ya ak ko chemeatia, kiinai ile agese eng' ole ma gol, ak aumi eng' ole kima alechi. ²⁷ Kiga nyoljin anyun indene fedaisiekyu ole teseksot fedaisiek nda kaatach ko kaweechge chechu koboto che kitesak. ²⁸ Noto anyun osare inendet talentait ak ogochi inendet ne tinye talentaisiek taman. ²⁹ Amu kigochini age tugul ne tinye si konyor che chang' kosir. Ago kisore inendet ne matinye mbo ne tinye. ³⁰ Ak owirji anyun otwogindet ne matilei kiy tuindo ne bo sang', ole egu rirek ak nyeetab kelek'. ³¹ "Tun kacho Weritab Chi eng' torornatenyi koboto malaikaisiek tugul, kotebe anyun ng'echeretab torornatennyi. ³² Ak kiyumji tainyi bororosiek tugul,ak kokwei ichek kobesio, ko u ye ibestos mestewot kechirek ak ng'ororek. ³³ Ak kondeno kechirek eunnyi ne bo tai ak ng'ororek eng' eunyibo katam. ³⁴ Yeityo komwochi laitoriat ichek che mi eunnyi ne bo tai koleji, 'obwa, akwe che oberurotin che bo Kwanda, onam bounatet ne kigechobwok kong'ete ko kagilumda ng'weny. ³⁵ Amu kiama rubet, ak kiogono aam, kiama melel ak kiogono aee; ki aii too ak kiotaacha; ³⁶ Ki amite aach ngor, ak kiolaksewo, ki amiani ak kiobwa otopeno; kiomi korgoret ak kiobwonjo.' ³⁷ Kowolji anyun che bo imanda koleji, 'Kiptaiyandani, kigiroin au koamin rubet ak kebain? nda koamin melel akikikoni iee? ³⁸ Ak kigiiroin au ko ii too, ak ketachin? nda imi kumetinye ngor ak kelokun, ³⁹ Ak kigiiroin au imiani nda eng' kergoret ak kebwonjin? ⁴⁰ Ak kowolji laitoriat koleji, 'Amwowok iman ale ko u yo kioyochi agenge eng' tupchosiechu chu, mbo chu tiginen eng' tugul ko kioyaiywo.' ⁴¹ Koleji anyun ichek che mi eutab katam, oba eng' ole ami akwe che o chubotiin, oba mat ne bo koigeny ne kigechopchi oindet ak malaikaisiekyi. ⁴² Amu kiama rubet, ak mokono aam, kiama melel ak kima ogono aee; ⁴³ Ki aii too ak kima otaacha, kiami aach ngor, ak kima olokwo, kiamioni ak eng' korgoret, ak kimo obwa otopeno.' ⁴⁴ Kowol anyun agiche ak kole, 'Kiptaiyandani kigiroin au koamin rubet nda melel nda ko i too, nda imi aach ngor, nda imioni, nda imi korgoret ama kiboisieun?' ⁴⁵ Kowolji anyun kole, 'Amwowok iman, ale, ko u yo mo yachi agenge eng' chu tiginen eng tugul ko ma oyaiywo.' ⁴⁶ Ak bendi chu ole mi nyalilda ne bo koigeny ago bendi che bo imanda ole mi sobondab koigeny."