¹ Ak kimanda Jeiso eng' hekalut kwo bandanyi. Ak kibwanji alamalyennyi ak koborji inendet teeksosiekab hekalut. ² Ago kiwolji kole, "Ogere tuguchu tugul?Amwoko, iman ale, mang'etune koita agenge baragutab age, ne ma kiwirjini ng'weny." ³ Ak ko kingotebche ng'weny eng' tulwetab Emitik, kobwanji inendet alamalyennyi eng ung'ot, ak kole, "Mwaiwech, egu au tuguchu? Ak tun ko nee kaborunetab chonuneng'ung ak bekunetab ng'weny? ⁴ Ak kiwolji Jeiso koleji, "Oripge si mebeetok chi. ⁵ Amu bwanei che chang' eng kainenyu. Mwoe kolen, 'Ai Kristo,' ak kobeet che chang'. ⁶ Tun ogose agobo lugosiek ak ng'alek che bo baretabge, oripge si mocholie amu bwoni tuguchu ne matiny; ago tomo koit kagesunet. ⁷ Amu wendi ko setyini bororiet age bororiet age. Ak kobiit rubosiek ak botanetab ng'weny eng' orisiek che terotin. ⁸ Ago tuguchu tugul ko taunetab ng'woninwek che u che bo sigisiet. ⁹ Ak kondenok anyun ole mito nyalilda ak kobarak. Ak kosasok bororiosiek tugul agobo kainennyu. ¹⁰ Ak kinachi che chang' anyun, ak kong'gwektoige, ak kosasge age ak age. ¹¹ Ak tun ng'eetos maotik che chang' che bo lembech ak kobeeti che chang. ¹² Ak amu tesoksei yaitiet, kogaitititu chamyetab che chang' ¹³ Ago inendet ne muitoi agoi kagesunet kesaru. ¹⁴ Ak keamdooti logoiywechu kororon bo bounatet eng' ngweny komugul koek baornatet eng' bororiosiek tugul. Ak koit anyun kagesunet. ¹⁵ "Ak ngogeer anyun kito ne kisase ne bo ng'emisiet, ne kimwa maotiot Daniel, kotonone ole tilil "(ingoguiyo inendet ne somoni), ¹⁶ "Ngorwechi tulondok anyun icheket che mi Judea, ¹⁷ ak inendet ne mi got barak ko mo wol kole si konem tuguk che mi gonnyi, ¹⁸ ama weechge let inendet ne mi mbar si koib ngoriennyi. ¹⁹ Ago bwo eng' ichek che managotin ak ch tinye leguk che mengechen eng' betusiechoto! ²⁰ Osa anyun si mabiit mweeng'wong' eng' betusiekab kaititindo nda eng' betutab sabato. ²¹ Amu egu anyun nyalilda ne kindet, ne kitomo kobiitu kong'ete taunetab ng'weny agoi raa, ama ma kobiitu kogeng. ²² Ngot ko ki ma kitil konwogitu betusiek choto, nda magisoru chi. Ago kikitil betusiechoto agobo che lewenotin. ²³ Ngo mwowok chi age tugul eng' betunoto kole, 'Oroo mi oli Kristo' nda 'mi oloo, ko ma toyan. ²⁴ Amu ng'eetos Krisoisiek che bo lembech ak maotik che bo lembech, ak kobortoi kaborunoik ak kwong'utik che kindon, si ngomugak kobeet mbo che lewenotin. ²⁵ Ogeer anyun, kaasib amwowok kotomo sait. ²⁶ Noto anyun, ngemwowok kele, 'Ogeer, mito inendet surkweni ko mat obe. Anan, 'Oroo mito inendet got ne bo orit' ko mat oyan. ²⁷ Amu u yo mong'u kalyelet eng' kong'asis, ak kotok agoi cherongo, ko u noto chonunetab Weritab Chi. ²⁸ Oldo age tugul ole mito musto, korurugchinige oloto motonyik. ²⁹ "Ak ne matiana ko kagogesge nyalinda ne bo betusiechoto, kotuitu asista, ama kokwengtoi arawet, ak kororok kokelik eng' kipsengwet, ak ketumtum kimnatosiek che bo kipsengwet. ³⁰ Ak kotook anyun eng' kipsengwet kaborunetab Weritab Chi, ak koteiyo anyun bororiosiek tugul che bo ng'weny ak koroo konyonii Weritab Chi eng' baragutab bolik chebo kipsengwet eng kimnotet ak torornated ne o. ³¹ Ak koyoktoi malaikaisekyi eng cheet ne o ne bo iriaget, ak koum lewenikyi kobunu usonaik ang'wan, kong'ete tabandab kipsengwet agoi tabandab age. ³² Onetege anyun kalewenetab mogoiywet. Ngo ng'arng'aritu kipsakatinikyi (temenikyi) ak kong'otyo sogek onai ole legit kesisiet. ³³ Ko u noto ak akwe, ngo roo tuguchu tugul onai ole kagolegtit, inendet, mito kurgotik. ³⁴ Amwowok, iman ale masiirtoi ebeni, ama isulda tuguchu tugul. ³⁵ Sirtoi kipsengwet ak ng'weny ago masirtoi ng'alekyu. ³⁶ Ago manoei chi age tugul agobo betunoto ak sainoto manoei mbo malaikaisiek che bo kipsengwet, nda ko Werit, ago Kwanda inege. ³⁷ Kou ole kiteptoi betusiechu ki bo Noa, egu ko u noto chonunetab Weritab Chi. ³⁸ Amu u eng' betusiechoto ko kitomo kobiit maranet kiamisie ak kieese, kitunisie ak kiigoitoi kitun agoi betut ne kiwo Noa melit orit, ³⁹ ak kima nai icheket agoi koit maranet ak koges ichek tugul,--egu ko u noto nyonunetab Weritab chi. ⁴⁰ Tun boisie murenik aengu' eng' mbar kimuti age, kebagakta age. ⁴¹ Ng'oise chepyosok aeng'u eng' koitab bai agenge; kimuti age ak kebagakta age. ⁴² Oripse anyun, amu monget betut ne chonii Kiptaiyandeng'wong. ⁴³ Ago onai ole, nda kiga nai chitab kobo got kole sait anono ne chonii chorindet nda kiripsei ak nda kimo kochomdoi kebut gonnyi. ⁴⁴ Noto anyun ochoboge ak akwe amu choni weritab chi eng' sait ne mobwotyini ole choni. ⁴⁵ "Ng'o anyun otwogindet ne kiyani ak ko ng'o ne kiindeno kiptaiyandennyi kotononji gonnyi ak kogochi biko amitwogikwai eng' betut ne eme? ⁴⁶ Baibai otwogindonoto, ngo weechgei kiptaiyandennyi konyor koyoe ko u noto. ⁴⁷ Amwowok iman ale indenoi inendet koboi tuguk tugul che tinye. ⁴⁸ Ago ngo mwa otwogindet ne ya muguleldonyi kole, 'Ta koenige Kiptaiyandennyu', ⁴⁹ Ak kotoi kobir che otwogik koboto inendet, ak koamisie ak koeise koboto che bogitos, ⁵⁰ Ko choni anyun kiptaiyatab otwogindonoto eng' betut ne leen inendet machoni ak sait ne menget. ⁵¹ Ak kobir inendet missing ak kogochi inendet keberbertanyi koboto chombilik, ole eng' oloto komi rirek ak nyeetab kelek.