¹ Ak king'oloji Jeiso anyun tuiyosiek ak alamalyennyi. ² Koleji, "Tebe sirik ak Parisaik ng'echeretab Musa. ³ Noto anyun oyai ak orib tuguk alak tugul che ng'otok oyai. Ago morub ko u boisionikwai amu mwoe icheket kityo ama yaei. ⁴ Ee, rotei milotik che nyigisen ak ko che koromen kegeseni, ak kondeno tigigoikab biko. Amenoktoe icheget' mbo eng mornet agenge. ⁵ Ago yaei boisionikwai tugul si kogeer biko. Amu yaei koteebeesitu lolotinwek che keibe sirutik ak kobaroi tabanwekab ngoroikwai. ⁶ Ak kochame ole toogunot eng' igorwek ak nge'echerok che eechen eng' sunagogisiek, ⁷ ak kagatosiek eng' oldinwekab aldaisiet ak keguure icheket biko 'Rabbi'. ⁸ Ago moto geguurenok 'Rabbi,' amu otinye konetindeng'wong agenge kityo, ak otupche akwee tugul. ⁹ Ak amoguure chi eng' ng'weng kwanda amu agenge Kwandang'wong', inendet ne mi kipsengwet. ¹⁰ Amocham keguurenok 'kanetindet', amu agenge kanetindeng'wong, noto ko Kristo. ¹¹ Ago inendet ne o eng kwenung'wong koegu kiboitiondeng'wong'. ¹² Ak age tugul ne itororigee kemining'iti , ak age tugul ne imining'itige ketorori. ¹³ Ago bwo eng akwe, sirik ak Parisaik, chombilik! Ogere bounatetab kipsengwet si machut biko. Amu moite akweget oloto, ak amochamjini che machei koit oloto, koba. ¹⁴ Bwo eng akwe sirik ak Parisaik chombilik! Amu oame gorikab mosogik ak osae sautik che koen eng' kenengwong' ¹⁵ Bwo akwe, sirik ak Parisaik, chombilik! Amu oaitosi araraita ak emet owal chito kobunjok, ak ngo kagobunjok, oyai inendet koek lekwetab oretab mat (Gehenna) konyil aeng' kosiirok. ¹⁶ "Bwo eng akwe, kandoik che o koriotin, che omwoe ole, 'Age tugul ne murtoe hekalut ko ma kiy. Ago age tugul ne murtoe tahabu che bo hekalut kotinye besendo'. ¹⁷ Akwe salonik che koriotin! Anono ne o, tahabu nda hekalut ne kitilile tahabu? ¹⁸ Ak, 'Age tugul ne murtoe kaptisisiet ko ma kiy. Ago age tugul ne murtoe kagochinet ne mito kaptisisiet, ko besenindet inendet.' ¹⁹ Akwe bichu koriotin! Anono ne o, kagochinet nda kaptisisiet ni itilili kagochinet? ²⁰ Noto anyun, inendet ne murtoe kaptisisiet, komurtoe kaptisisionoto ak tuguk tugul che mito yoto. ²¹ Ak inendet ne murtoe hekalut komurtoe oloto tilil, ak inendet ne menye oloto. ²² Ak inendet ne murtoe kipsengwet, komurtoe ng'echeretab Jehovah ak inendet ne tebe ng'echeranata. ²³ "Bwo eng akwe, sirik ak Parisaik, chombilik! Amu ogoitei kebebertab taman ne bo Heduosmn ak Bisalik ak kamon, ago kigomete amoae ng'alek che eechen che bo ng'atutik---choto ko imanda ak rirenetabge, ak oegu che kiyoni. Ago kanyoljinok oyae chuto, amobagach chun alak. ²⁴ Ee akwe kandoik che koriotin, ogeneni tingwichet ago olugui tambesiet! ²⁵ Bwo eng akwe, sirik ak Parisiak, chombilil! Amu otilili kikombet ak sanit barak, ago nyiitotin orit chorset ak chameng'wong bo ge. ²⁶ Inye Parisaindeni korat! Itilil korok kikombet ak sanit orit, si kobiit kotililitu barak agiche. ²⁷ "Bwo eng akwe, sirik ak Parisaik, chombilik! Amu o kerge ak kererisiek che kigesal koleelagitu che kororon iman barak eng' keeret, ago nyiitotin orit kowoik che bo biko che kigomeiyo, ak muruonindo tugul. ²⁸ Ko u noto, akwe otoogu ko u bikab imanda eng' taitab biko ago nyiitat oring'wong' chombilisiet ak ngogisto. ²⁹ "Bwo eng akwe, sirik ak Parisaik, chombilik! Amu oteeche kererisiek che bo maotik ak olelesanjini kererisiekab che bo imanda. ³⁰ Ak omwoe ole, 'Nda kikimite eng kenyisiekab kwanisiekcho, kita ma kitortoi koboto icheget korotikab maotik.' ³¹ Noto obaorionjinige ole oi werikab icheket che kibar maotik. ³² Onyiit anyun kerutiet ne bo kwanisiekwok. ³³ Akwe erenok, ee legukab erenok che ng'wonen Ochilildoi ano eng' kiruogetab Gehenna? ³⁴ Noto anyun otopen ayokwok maotik, ak biko che ng'omen ak sirik. Obore alak eng' icheket ak ogortoti alak, ak obire kipcharitit alak eng' icheket eng' sunagogisiekwok, ak ousoti kong'eete nganaset age agoi nganaset age. ³⁵ Si kobiit kobwanjok korotik tugul che bo imanda che kigetarta eng' ng'weny kongete korotikab Abel ne ki bo iman agoi korotikab Sakaria weritab Barakia, ne kiobar eng' kwenutab hekalut ak kaptisisiet. ³⁶ Amwowok iman ale, bwonjini ebeni tuguchu tugul. ³⁷ "Ee Jerusalem, Jerusalem ne barei maotik, ak kowire koik icheket che kigiyokun! Kiamach konyil ata aum legukuk ko u yo iumi ngogiet warekchi eng' kebebaikyi ago mocham! ³⁸ Otopen, kagebogokwok gong'wong koek kipkubere. ³⁹ Amu amwowok ale ma ogeroo kogeny agoi omwa ole, iberurot intendet ne choni eng' kainetab kiptayat."