¹ Ak kingo'lolji Jeiso ichek kogeny eng' kalewenaik, koleji, ² Kigergeitege bounatab kipsengwet ak laitoriat agenge ne kiyochi werinnyi igortab katunisiet. ³ Ak kii yokto otwogikyi koguur icheket che kiga kemwochi agobo igortab katunisiet ak kima cham kobwa. ⁴ Kiiyokto kogeny otwogik alak kole, 'omwochi ichek che kiga kemwochi, "Oleji kaachob amitwogikyu. Kageeny eikyu ak alak che akwaen, ak chobotin tuguk tugul. Obwa igortab katunisiet." ⁵ Ago mamake kiy anan kokas iit ng'alekyi, ak kiba ortinwekwai kwo age mbarennyi, kwo age boisiennyi ne bo mung'aret. ⁶ Kong'et alak, konam otwogikyi ak konyalil ak kobar. ⁷ Ago kineerech laitoriat, ak kiiyokto lugosikyi kobar rumichoto, ak kobeel nganasengwai. ⁸ Kimwochi anyuun otwokyi kolenji, 'Chobot katunisiet, ago ma muchini che kigaa ketaach. ⁹ Ara anyun oba ole besiechini ortinwek ak oguurji igorta ne bo katunisiet tugul che konyoru. ¹⁰ Kiba anyun otwogichoto ortinwek, ak koyum tugul che kinyor, che yaachen ak che kororon. Ak kinyi toek gotab katunisiet. ¹¹ Ago ko kingo mong' laitoriat kogeer toek, kogeer chito ne kima ilaach ngoroikab katunisiet. ¹² Ak kileji, 'Choruani, kejonde ano oli ametinye ngoroikab katunisiet? Ak kinamak kut mang'alal. ¹³ Ak king'et laitoriat kole kiboitinikyi, 'Orat chichi kelyek ak eunek, ak owirji sang ole mito tuindo, ole mito rirek ak nyeetab kelek' ¹⁴ Amu chang biko che kigiguur, ago ng'ering che kikilewen' ¹⁵ Kiba anyun Parisaik koruoch ole namdoi inendet eng' ng'alekyi. ¹⁶ Ak kiiyokyi kasubikwai koba ole mi inendet, koboto Herodik. Koleji Jeiso, "Konetindoni kingen kele i bo iman, ak ineti oretab Jehovah eng' iman. Ameiwei chi age tugul, ak mechile togochikab biko, ametinye kalotunet. ¹⁷ Mwowech anyun, tos ilen nee inyee? Tos chamdaat eng' ng'atutik kegochi kodi kaisari nda ololo?" ¹⁸ Ago kinai Jeiso yaitengwai ak kole, "Amu nee si otiema akwe chombilichu? ¹⁹ Oboruo chepkondet ne bo kodi." Ak kiipchi inendet denarit. ²⁰ Ak kileji Jeiso "Bo ng'o itondo ak kainet ne siret?" ²¹ Koleji inendet, "Bo Kaisari." Koleji Jeiso anyun, "Ogochi Kaisari tuguk che bo Kaisari, ak ogochi Jehovah tuguk che bo Jehovah". ²² Ak ko kingogas, kokwong'io. Ak kibagakta inendet koba oreng'wai. ²³ Kibwonji inenedet betunoto Sadukai, che mwoe kole, momi ng'eetyetab che kigobek. Ak kiteebe inendet, ²⁴ Kole, "Konetindoni, kimwa Musa kole, 'Ngo me chi, ama tinyei leguk, kondi wring'wai chepyosonata si kololji mat wering'wai'. ²⁵ Kimi kwenunnyo murenik tisabu che tupcho ak kiitunis ne bo tai, ak kime. Amu kima sich lekwa, kondi chepyosennyi wering'wai. ²⁶ Kiai ko u noto ne bo aeng' agine ak ne bo somok agoi ne bo tisab. ²⁷ ak Kingomeyo tugul, kome chepyoset agine. ²⁸ Ara anyun eng' ng'eetyet kobunjini ng'o chepyosonata eng' choto tisab? Amu kiga kotun tugul". ²⁹ Ago kiwolji Jeiso koleji, "Ochilili amu mongen sirutik anan ko kimnatetab Jehovah. ³⁰ Amu eng' ng'eetyet ko maitunisie, ama kigoitoi kitun. Ago kergeitu ak malaikaisiek che mi kipsengwet. ³¹ Ago anyun agobo ng'eetyetab biko che kigomeiyo, kotomo osoman ne kimwowok Jehovah kole, ³² 'Aii Jehovah ne bo Abraham, aii Jehovah ne bo Isak, aii Jehovah ne bo Jakobo'? Jehovah ko ma Jehovah ne bo che kigomeiyo ago bo che saptos." ³³ Ak ko kingogas tuiyosiek nito, kokwong'io agobo konetisiennyi. ³⁴ Ago kingogas Parisaik kole kagonam kut sadukaik ng'alekab Jeiso, koyumge. ³⁵ Ak kiteebe agenge ne ng'omotiotab ng'atutik kotieme inendet---- ³⁶ Kole, Konetindeni, anono ng'atutiet ne o eng' ngatutik?" ³⁷ Koleji Jeiso inendet, "Cham Kiptaiyat Jehovah neng'ung eng' muguleldang'ung' komugul, ak eng' sabondong'ung komugul, ak eng' ng'omnoteng'ung' komugul. ³⁸ Nito ng'atutiet ne o ak ko ne bo tai. ³⁹ Ak ne bo aeng ne kerge ak nito ko ni--- 'Cham chitab kokweng'ung ko u ole ichamdoige.' ⁴⁰ Tonone ng'atutik tugul ak maotik ng'atutichu aeng'." ⁴¹ Kingo ta komi Parisaik tugul yoto, kotebe Jeiso icheket ng'olyo. ⁴² Kole ,"Obwati nee akwee agobo Kristo? Weritab ng'o inendet?" Koleji inendet "Weritab Daudi." ⁴³ Koteebe ichek koleni, "Amu nee anyun si koguure Daudi inendet eng' Tamirmiriet, Kiptaiyat, kolen, ⁴⁴ 'Kileji Kiptaiyat, Kiptaiyandennyu, "Tebe eungu ne bo tai, agoi andene buniguk keldebesaikab kelyeguk"? ⁴⁵ Ngot koguure anyun Daudi inendet 'Kiptaiyat', ko werinyi kole nee?" ⁴⁶ Ak kima imuch age tugul kowolji inendet ng'olyo, ak kong'ete betunoto agoi, ko mata kogany chi kotebee inendet ng'olyo kogeny.