¹ Ye kiriktoi Jeiso ak alamalyennyi Jerusalem ak koit Betpage, agoi tulwetab Emitik, koyokto Jeiso aeng' che bo alamalyennyi, ² koleji, oba agoi nganaset ne mi taing'wong', ak onyoru ngunoto sigiriet ne ratat, komi ak moitanyi. Otiach tuwai ak ogetwo. ³ Ak ngo mwawok chi kiy, oleji, 'Makyinigei Kiptaiyat', ak kogonok ngunoto." ⁴ Ak kayaakis chu tugul, si kobit kosulda ne kimwa maotiot kole, ⁵ "Omwachi cheptab zion, 'Oroo chonjinin laitoriandeng'ung' ne tala, ak kolong'onu sigiriet--eng moita, moitab sigiriet."' ⁶ Ak kiba alamalyet ak koyai ko u yo kiiarojin Jeiso icheket. ⁷ Ak Kikweri sigiriet ak moitanyi, ak koiitochi ngoroikwai, ak kotebee inendet barak. ⁸ Ak kiito che chang chebo tuiyet ngoroikwai eng' oret, ak kotil alak temenikab ketik, ak koiito eng' oret. ⁹ Ak kimwaoti eng' kutit ne o tuiyosiek che kiindoe inendet ak che kirube koleen, "Hosana weritab Daudi, iberurot Inendet ne choni eng' kainetab Kiptaiyat! Hosanna eng' ole toror mising!" ¹⁰ Ak kingoit Jeiso Jerusalem, kochirchiren nganaset komugul kole, "Ng'o ni?" ¹¹ Ak kiwol tuiyosiek kole, "Ni ko maotiot Jeiso,ne bunu Nasaret ne bo Galili". ¹² Ak kichut Jeiso hekalut. Ak kioon tugul che kioldoisie ak che kiolisie eng' goyoto ak komilda mesosiek che bo walikab chepkondok, ak ng'echerokab che kioldoi cheptugenik. ¹³ Ak koleji icheket, "Sirat kele, 'Kiguure gonnyu gotab saet, ago kaowal koek kebenetab chorik." ¹⁴ Ak kibwonji inendet eng' hekalut ichek che ki koriotin ak che ing'waldos ak kisoob icheket. ¹⁵ Ago ye kingoroo tisiik che eechen ak sirik tuguk che kiae che bo kowong'et ak kingogas leguk che komwoei eng' kutit ne o eng' hekalut kole, "Hosanna Weritab Daudi" konerekcho mising. ¹⁶ Ak koleji, "Igose tuguk che mwaei ?" Kole Jeiso icheket, "Ee! Ago tomo osoman kele, 'kiiyai inye kalosunet kosulda eng' kutuswekab leguk ak che mengechen?" ¹⁷ Ak kibagakta Jeiso icheket ak kwo komanda eng' nganaset kwo Betania ak koru oloto eng kemout. ¹⁸ Ak karon ye kingowechege kowendi nganaset koam rubet. ¹⁹ Ak kingoroo eng' tabandab oret mogoiywet kwo ole mi ko manyorji kiy kobate sogek kityo. Ak kileji ketoto, "Kong'etee rani ko ma iiye logoek agoi koigeny," ak kitoi kores mogoywonoto. ²⁰ Ak ko kingogeer alamalyet, kokwong'io, kole "Katepto ano si kores mogoiywet sainita?" ²¹ Kiwolji Jeiso koleji, "Amwowok iman ale ngo tinye kayanet amosage, ko moyae kityo ne kagoyaak eng mogoiywondoni, ago ngomwochi mbo tulwoni oleji, 'Ngetutin ak kewirjin araraita,' koyaakse. ²² Ak tuguk alak tugul che osome eng' saet oyani otoche." ²³ Ak kingoit Jeiso hekalut orit, ko kita konetisie kobwonji inendet tisiik che eechen ak boisiek che bo bichoto, ak koleji, "Nee kimnatet ne iyae tuguchu, ak kigonin ng'o kimnatoni?" ²⁴ Ak kiwolji Jeiso koleji, "Amoche agine ateebenak ng'olyot agenge, ne ngo'mwowo, amwowok agane kimnatonoto ayae tuguchu. ²⁵ Kibunu ano kabatisanetab Johana? Bunu kipsengwet nda kibunu biko? Ak kichaamjige kole ngot kemwa kele, kibunu kipsengwet kimwowech inendet kole, 'Kiyai nee anyun si moyan inendet?' ²⁶ Ago ngemwa kele, 'Kibunu biko', keiwei tuiyet amu iyoni tugul kole maotiot Johana." ²⁷ Ak kiwolji biko Jeiso, koleji, "Makingen". Komwochi agine koleji, "Momwowok agine kimnatet ne ayae tuguchu. ²⁸ Ago Oleen nee? Kitinye chi werik aeng.' Ak kiwo ole mito weritab ne bo tai, ak koleji, 'Weri ui boisie rani eng' mbaretab sabibuk.' ²⁹ Ak kiwol kole, 'Mawendi', ago eng' let kosik ak kwo. ³⁰ Ng'oityo kwo ole mito ne bo aeng' ak komwochi ko u noto. Ak kiwol kole, 'Awendi,' ago mawo. ³¹ Ng'o eng' choto aeng' ne kiyai magetab kwandangwai? Komwa kole, "Ne bo tai." Komwochi Jeiso ichek koleji, "Amwowok iman ale sib kondoenok koitei bounatetab Jehovah taagikab aisurut ak chepkugonik. ³² Amu kichonjok Johana eng' oretab imanda, ago ma oyan inendet. Ago kiiyan inendet taagikab aisurut ak chepkugonik ago akwe ko king'oroo ko ma osigu si kobiit oyan inendet. ³³ "Ogas kalewenet age. Kimi chito age ne kitinye got ak kiminji sabibuk mbaret ak kong'ot ak kobal kebenet ole kikurung'e logoek ak kotech go ne koi, ak komanakyi meek ak kwo emet age. ³⁴ Ak ye kingo kagorik ruratetab logoek koyokto otwogikyi koba ole mi meek, si koib logoekyi. ³⁵ Ak kinam meek otwogikyi ak kibir age, kibar age, ak kiwir age eng' koik. ³⁶ Kiiyokto kogeny otwogik alak che siire che bo tai ak koyochi ichek ko u noto. ³⁷ Ak eng' let koyokyi werinyi kole, 'teegisi werinnyu.' ³⁸ Ago ye kingoroo meet werit, komwochige kole, 'Nito ko ne bo tuguk. Obwa kebar inendet ak kenyaban tuguk che kata tun bunjini inendet.' ³⁹ Ak kinam inendet, ak kotoorta komanda eng' mbar ak kobar. ⁴⁰ Noto anyun kingocho chitab kobo mbaretab sabibuk koyachini nee meechoto?" ⁴¹ Kolenji, "Barei chichoto bo mbaret bichoto yaachen eng' mbaret ne ya, ak komanakyi mbaretab sabibuk, meek alak che igochini inendet logoek eng' ruratengwai." ⁴² Kileji Jesiso ichek, "Tomo osoman sirutik kele, 'Koita ne kitoiyo teegik ko kigeyai noto koek koita ne bo luita. Kibunu nito Kiptaiyat ak kiek kwong'utiet eng' konyekyo'? ⁴³ Noto anyun amwowok ale, kisorenok bounatetab Jehovah ak kigochi bororiet age ne yiei logoekyi. ⁴⁴ Ak inendet ne ibutyini koi barak koile konyaknyakanak ago age tugul ne tiringjinige koita konyinyirogse." ⁴⁵ Ak kingogas tisiik che eechen ak Parisaik kalewenaikyi konai kole kang'alali agobo icheket. ⁴⁶ Ak ko kingocheng' konam inendet, ko kiiywei tuiyosiek amu kiiyoni kole maotiot inendet.