¹ Amu kergei bounatetab kipsengwet ak chitab kobo got ne kimusta kariron kwo kuguur meek (kiboitinik) Kobwa mbarennyi ne bo sabibuk. ² Ak kingo kagochamnyechi ak meechoto kogochi denarit agenge eng' betut agenge, koyokto koba mbarennyi. ³ Ak kimanda kogeny ko legit sait somok ak koroo alak kotonondos eng' oldab aldaisiet ama tinye boisiet. ⁴ Ak kileji, 'Oba ak akwee mbaretab sabibuk, si agonok ne nyolu'. Ak kiba anyun kobois. ⁵ Kimanda kogeny ko legit sait lo ak eng' sait sogol, akiyai ko u noto. ⁶ Ak kimanda Kogeny olo bo sait taman ak agenge ak konyor alak kotonondos ak kileji icheket, 'kainee si otonone oli betut komugul amotinye baisio?' ⁷ Kileji anyun bichoto inendet, 'Amu ma koneech chi boisiet'. Koleji icheket, 'Oba ak akwee, "mbaretab sabibuk'. ⁸ Ak kingoek koskoleny, komwochi chitab kobo mbaretab sabibuk kiboitondenyi ne o koleji, 'Kuur meek ak igochi melekwekwai, itaune ne bo let agoi ne bo tai'. ⁹ "Ak kingobwa ichek che kiga kiguur ko legit sait taman ak agenge konyor chi tugul denarit agenge. ¹⁰ Ak ko kingobwa che bo tai koleen nyoru che siire, akinyor agiche denarit agenge chi tugul. ¹¹ Ak kingotaachmelekogikwai, kong'ung'unji chitab kobo got. ¹² Komwa kole, 'Kabois chu bo let sait agenge kityo, ak keyai kokergeitge bichoto ak ache che kagibirtege betut kemugul eng' asista ne ng'wan.' ¹³ "Ago kiwolji koleji agenge eng' ichek, 'Choruani, ma yaun kiy ne ya. Tos kama kikosyine tuwai denarit agenge? ¹⁴ Nam neng'ung ak iwe oreng'ung. Chamennyu ogochi chichito ne bo let ko u ye kagonin inye. ¹⁵ Tos ma nyoljino ayai ne amache eng' tuguk chu? Nda kaamjin ng'etkong amu ai chi ne kararan?' ¹⁶ Ara egu anyun che bo let che bo tai ak egu che bo tai che bo let." ¹⁷ Ye kingolonye Jeiso Kowendi Jerusalem, komut alamalaik taman ak aeng, koba taban ichegei ak koleji ichek eng' oret. ¹⁸ "Oroo, kilonye Jerusalem, ak kekoitoi weritab chi kwo eunegap tisik che echen ak sirik ak kiruokyi kele kome inendet ¹⁹ ak kigoito inendet kegochi bororiosiek si ko mor inendet, kobir inendet ak kogartat inendet. Ago eng betutab somok keng'eti inendet" ²⁰ Kijonji anyun inendet kametab weritab zebedayo koboto werikyi, ak kogutungji ak kosom inendet kiy. ²¹ Ak kileji Jeiso, "Imoche nee?" Koleji, "Ng'at ile kotebe werikchu aeng'u age eung'ung nebo tai ak age eungung nebo katam, eng' bounateng'ung." ²² Ago kiwol Jeiso kole, "Mongen kito ne osome. Omuchi akwee oee kikombet ne legit aee?" Koleji Inendet, "Kimuchi." ²³ Koleji ichek, "Oee iman kikombennyu. Ago ketebe eunnyu nebo tai ak eunnyu ne bo katam ko ma ane ne igoitoi, ago bo icheket che kikochopchi Kwandanyu." ²⁴ Ak kingogas chun tamanu, konerekcho agobo choto aeng' che tupcho. ²⁵ Ago kiguur Jeiso icheget ak koleji, "Onget ole bou eng' kimnatet baunikab bororiosiek ak bou ichek bikwai che eechen. ²⁶ Ago ma u noto eng' akwee. Ago age tugul ne moche koek ne o eng, kwenung'wong koek ne kiboitiondeng'wong. ²⁷ Ak age tugul ne moche koek ne bo tai eng' kwenug'wong koek otwogindeng'wong, ²⁸ Mbo ko u noto kima cho Weritab Chi keboisiechi ago si kobois inendet ak kogoito sobondonyi koek kito ne kitioge che chang'." ²⁹ Ako kingo mondoi ichek eng' Jeriko, korub inendet tuiyet ne o. ³⁰ Kimi kipkoratinik aeng' che kitebsot eng' oret taban ye kingo kas kole siirtoi Jeiso , kowakcho kole ,"Kiptayat, weritab Daudi, rirenech ." ³¹ Kiger kong' tuiyet bichoto kole, kosisyo, ako kites kowokcho kole, "Kiptaiyandani rirenech, eeh weritab Daudi." ³² Ak kitonon Jeiso, ak koguur ichek ak koleji, "Omoche ayaiywok nee?" ³³ Koleji inendet, "Kiptaiyandani, kimoche keyatwech konyekyo." ³⁴ Ak kirire Jeiso, ak kitwa konyekwai. Ak kogeerto eng sainata ak korub inendet.