¹ Ako kingo kagesich Jeiso eng' Betlehem nebo Judea eng' betusiek che kibo laitoriat Herod, keer anyun kipka Jerusalem biko che ng'omen kobunu kongasis koteeboti kole , ² "Mi ano inendet laitoriatab Yahudik ne kagesich? Amu kokigeer kogeliennyi eng' kongasis, ak kagibwa kegutungji inendet." ³ AK kingogas noto laitoriat Herod, koimgee, koboto Jerusalem komugul. ⁴ Kiyum Herod tisiik che eechen tugul ak sirik chebo biko, ak koteebe kole, "Kisigchini ano Kristo?" ⁵ Ak kiwolji koleji, "Kisigyini Betlehem nebo Judea, amu kisir maotiot ko u noto kole, ⁶ 'Ee inye Betlehem, emetab Juda, ma kele itigin mising eng' kandoikab Juda, amu mong'unenen bounindet ne tun egu mestewotab bikyu Israel."' ⁷ Kigur anyun Herod eng' ung'ot biko che ng'omen, si kogin ak konai kole kitoogu au kogeliet. ⁸ Kiyokto koba Betlehem ak kileji, oba ocheng' komie lekwet ne mining. Ng'o kaonyoru inendet obka omwowo si anyo agane akutungji inendet." ⁹ Ak kingo kagogas ng'alegab laitoriat, koba bandangwai, ak ogeer anyun kiindoji icheket kogeliet ne kiga koroo eng' kong'asis kot koit ak kotonon eng' baragutab ole kimi lekwet ne mining. ¹⁰ Ago kingogeer kogeliet noto koboiboitu eng' boiboiyet ne neo mising. ¹¹ Ak kiba got orit ,ak kigeer lekwet ne mining koboto kamennyi Maria. Ak kibutyi ng'weny ak kogutungji inendet. Kitiach konoraikwai che bo komonutiet ne kindet kogochi inendet, kagochinoikab tahabu, tuguk che nyamdut ak tuguuk che u igomoik. ¹² Kiiteechi Jehovah icheget eng' koruotitoet koleji, amoweekyige ole mi Herod, ak konaam anyun oret age koba emengwai. ¹³ Ak kingo kagoba icheket, komongji malaikaiyatab Kiptaiyat Josep eng' karuotitoet koleji, "Ngeet, imut lekwet ne mining ak kamennyi, ak omwechi Misiri. Otebee oloto agoi tun amwoun, amu chengei Herod kobar lekwet ne mining." ¹⁴ King'eet anyun kembout noto Joseph komut lekwet ne mining ak kamet koba Misiri. ¹⁵ Ak kitebee oloto agoi kome Herod. Kisulda anyun nito ng'olyot ne kimwa Kiptaiyat kobun maotiot kole, "Kiaguur werinnyu komong eng' Misiri". ¹⁶ Kingogeer Herod, anyun kole kiken inendet biko che ng'omen, konerech mising. Ak kiiyokto kebar leguk tugul che ng'etik che ki mi Betlehem ak eng' tabanwekyi tugul kong'etee chebo kenyisiek aeng ak korek ng'weny, kosubge ak kasarta ne kigamwa biko che ngomen. ¹⁷ Kisulda anyun eng' betunoto ng'olyot ne kigamwa maotiot Jeremia kole, ¹⁸ "Kigigas tuget eng' Rama, rirek ak kateiyet ne kindet ko rirjini Rael legukyi, ak kitai kesaisai amu ki ma komi." ¹⁹ Ak kingo kagome Herod, ogeer anyun komongji malaikaiyatab Kiptaiyat Josep eng' Misiri eng' karuotitoet ak koleji, ²⁰ "Ng'et imut lekwet ne mining' koboto kamenyi, oba emetab Israel, amu kogomeiyo icheket che kichenge kobar lekwanoto mining." ²¹ King'eet anyun Josep, ak komut lekwet koboto kamet, ak kobwa emetab Israel. ²² Ago ye kingogas kole bou Arkelau Judea eng' bounatet ne kibo kwandanyi Herod, koiywei kwo oloto. Ak kingoteechi Jehovah eng karuotitoet kowechigee komostab Galili ²³ ak kiwo kotebe ng'anaset ne kiguure Nasaret. Ak kosulda nito ne ki kamwa maotik, kole kiguure inendet Nasaretintet.