¹ Mmi nna va cho kuti , ''Vusakusima ni mulwiirite, kwiina vamwi va ziimeene hahanu va seeti ni va fwe ni va seeni ku vona muvuso we Ireeza ni u keeza che ziho." ² Mazuva a mana iyanza ne kaamwiina chinga a mana, Jeeso nna hinda Pitorosi ne Jemusi ne Johani cho kuya ku iwulu lye irundu ilye, ni veena voo voona. Mmi lyinu nna sanduka ha vusu vwaavo. ³ Zizwaato zaakwe ni zaa veera a hulu, ku tuva ku zambiriiza, ku tuva ku zamba mirora ye inkanda mu yi woola ku tuvisa. ⁴ Lyiinu chi va si kweete ku wamba ne Jeeso, Elija ne Mushe ni vaa voneka. ⁵ Pitorosi ne itava Jeeso naati, "Muruti, ku lotu kuti tu kwiina hanu, mmi lyiinu chite kuti tu zaake zitomba zoo tatwe, chimwi nchako, chimwi ncha Mushe, chimwi chive cha Elija." ⁶ ( Ka kuti ka hena a veezi chaava ku lukere ku wamba mukuti va va lyikalyiriirwa.) ⁷ 7 Ikope ni lyeeza cho ku va wumbiriza. Lyinu lyinzwi ni lyaazwa mwi ikope, "Uzu njeye Mwaanaswiisu wangu u ni suni a hulu." Mu mu teeke." ⁸ Va vaati chi va lola mumbalyi ho hwaaho, ni vaa shaala ka kwiina u va vweene, mbwiteeri Jeeso vulyo yee yeena. ⁹ Va vaati chi va suuka ku irundu, Jeeso naa va laula kuti sanzi va lwiiri vantu chi vaa vona, mbwita iiri Mwana wo Muntu chi na nna vuka mu va fwiire. ¹⁰ Lyinu ni va lyi vikira iiyi indava mukati kaavo, ku zwaaho aavo cho ku taanga ku wambinsaana mukati kaavo "kuti ku vuuka mu vafwiire" ku teewa nzi. ¹¹ Ni va mu vuuza kuti, "Chinzi vangolyi ha vacho kuti Elija u lukeere kwiiza lwe ntanzi?" ¹² Naa va cho kuti, ''Elija wiizira tanzi ku voozekeza zintu mu meekalo. Lyinu chinzi ha ku ngolyetwa kuti Mwaana wo Muntu u lukera ku nyanda ne ku hindirwa hansi? ¹³ Lyinu ni mu lwiira kuti Elija a veeza, a vaa chiti zonse zi va va kusaka kwaalyi, mu ku ngolyetwa mu mangolo. ¹⁴ Lyinu va vaati chi va voola ku varutwana, ni vaa vona ni va zimbulukitwa vantu vanngi mane ne vangolyi ni va va kananisa. ¹⁵ Lyinu chinga va mu vona, ikuunga ni lyaa komokwa, cho ku ngombweera kwaalyi ku ka mu rumeresa. ¹⁶ Naa vuuza varutwana vaakwe, "Mu kweete ku lyikananisa naavo chechinzi?" ¹⁷ 17. Umwi wa vantu ku zwa mu vunngi nna mu itava kuti, "Muruti, nna lyeeta mwanaswiisu waangu kwaako. Wiina luhuho lu muchita kuti a siye ku wamba. ¹⁸ Ulu luhuho lu mu zuminiza choku mu wiisikiza haansi, u manina koto u zwa ifulu mu kaholo, u suma meeno aakwe, muviri waakwe choku zuminina. Naacho varutwana vaako kuti va zwiisa ulu luhuho mmi vaa kaangwa." ¹⁹ Jeeso nna ve tava kuti, "Unwe ve chivaka cho kuvula itumero, ka nni kalye naanwe luvaka lu sika hayi kuti mu zumine? Mu mulyeete kwaangu." ²⁰ Nni va lyeeta muswisu kwa Jeeso. Lyiinu luhuho chiinga lwa vona Jeeso, nni lwa wiisikiza muswiisu haansi choku taanga ku zwa ifulu mu kaholo. ²¹ Jeeso choku vuuza iisi, "Wiina luvaka lu sika hayi neena vuti?" Iisi nna cho kuti, "Chinga a vaati a ku zaalwa. ²² Kangi lwiina ku mu sohera mu mulyiro hamwi mu menzi nni lu lyika ku mu ihaya. Cho kuti u woola ku chita chimwi tu fwiire inse cho kutu tusa" ²³ Jeeso nna mu cho kuti, "Cho kuti u woola, zintu zonze zi woolyeka kwaalyi yo u zumina" ²⁴ Ho hwaaho, Isi muhwiire cho ku huwa naati, "Ni zumina! ni tusa mu ku saa zumina kwaangu!" ²⁵ Jeeso chingaa vona kuti vantu va ka ngombwerere kwaalyi, a va kalyimeri luhuho luvi naacho kuti, "Uwe luhuho lo ku saa waamba ne ku saa zuwa, ni ku laulyera kuti,u zwe mwaalyi, mane sanzi no u voolyi wii njiri mwaakwe." ²⁶ Lu vaa lyiriri ku iwulu cho ku hondanisa muswiisu ahulu ku zwaaho cho ku zwa mwaalyi. Muswiisu a vaa lolyeki mane iri u fwiire, vunngi vwa vantu ni vwaacho kuti, "Cha a fwa!" ²⁷ Mmi Jeeso naa mu woonda che iyanza cho ku mu nyemuna, muswiisu cho ku ziima cha mateende. ²⁸ Lyinu Jeeso chinga njira mu inzuvo, varutwana vaakwe cho ku mu vuziikiza ku imbalyi, "Chinzi ha sana twaa woola ku luzwiisa?" ²⁹ Naa vacho kuti, "Iizi zo uwu mushovo keeti che zi zwiiswa kunze lye itapero," ³⁰ Chinga vaa zwaaho va ve njiri cha Galaleya.Ka heena a vaa suni kuti vantu ve izive kuti veena kuhi, ³¹ mukuti a vaalyi ku ruta varutwana vaakwe. A va vacho kuti, "Mwaana wo Muntu ke ize naa heewa mu manza a vantu, mane ka va mu ihaye. Ku zwa mu ku ihayiiwa, ka a vuuke hape ha ku hita mazuva oo tatwe." ³² Mmi ka heena va vaa zuwisisa iyi indava, mane va vaa tiyi ku i mu vuuza. ³³ Ni veeza kwa Kaperaname. Lyiinu cho u siina mu inzuvo nna va vuuza, "Seke mu wamba kaha chiinzi mu inzira?" ³⁴ Mmi ni vaa toontola. Mu kuti va vaalyi ku kaya vu lyikananisa mu inzira kuti mukaando ahulu njeeni. ³⁵ Ne ikala haansi cho ku sumpa varutwana vaakwe, cho ku vacho kuti, "Haiva zumwi vulyo u saka kuva we intanzi, u lukeere kuva wa mamanimani, mane ne muhikaana wa vonse." ³⁶ A va hinde muhwiirezana cho ku mu viika hakati kaavo. A va mu hindi mu maanza aakwe cho ku vacho kuti, ³⁷ "Umwi ne umwi yoo tambula muhwire yoo u swana no uzu che izina lyaangu, naame u ni taambula, mmi ha a ni taambula, ka taambulyi ime meemeena, u taambula nnaaye yaava kani tumi." ³⁸ Johani cho ku mu cho kuti, "Muruti, twaa vona muntu zumwi naa zwiisa madimona mu izina lyaako mmi twa mu ziimika, mu kuti ka a tu sheere mu masulye." ³⁹ "Mmi Jeeso cho ku vee itava kuti, "Mu siye ku mu ziimika mu kuti ka kwiina yeeti naa chite zintu zi kaando che izina lyaangu ku zwaaho cho ku waamba vuvi ka haangu. ⁴⁰ Zumwi ne zumwi yaa saa lwi naaswe wiina naaswe. ⁴¹ "Zumwi ne zumwi yo kuha inkomoki ya menzi mukuti u wa Kirisiti, cho vusakusima ni mulwiirite, keeti naa vulye ku ruwerwa. ^{42 44} Zumwi ne zumwi yeeti naa chite kuti voo vwaava va niini va zumina mwaangu va chunchune, ka a ku shiamerwa ku sumininwa ivwe ikaando lyi siriswa mu insiingo cho ku soherwa mu iwate. ⁴³ Cho kuti iyaanza lyaako lyiku chita kuti u fosa, lyi kosolye. Ku lotu kuti u ke njire mu vuhalo cho vuholye kunze lya manza oo vere cho ku ya ku ibimbiro lyo mulyiro u saa zimi. ^{46 45} Haiva iteende lyaako lyi ku pangisa mafosisa, lyi kosolye. Ku lotu ku tambula vuhalo no wiina vuholye kunze lyo ku va ne mateende onse cho ku ka soherwa mu ihere. ⁴⁷ Haiva lyinso lyaako lyi ku pangisa mafosisa, yi ngogomone. Ku ku shiyameere kuti wii njire mu mu vuso we Ireeza ne lyinso lyi mwiina kunze lyo ku va ne menso oo vere cho ku soherwa mu ihere, ⁴⁸ uuko isene lyaavo ka lyi fwi, mane ne mulyiro ka u zimwa ⁴⁹ Zumwe nne zumwe kaa luungwa cho mwiinyo wo mulyiro. ⁵⁰ Mwiinyo u shiyeeme, mmi lyiinu ha wu zoverwa vukalyi vwaawo njeeni yoo u woola ku vu voozekeza hape? Mu ve ne mwiinyo mukati keeno, mane mu ve ne ikozo ku zumwi ne zumwi weenu."