¹ Mwaawo mazuva, ku veena hape ikunnga ikando mane ni ku seena chi lyiiwa. Jeeso nna sumpa varutwana vaakwe cho ku va cho kuti, " ² Ni fwiisiizwa inse nje ilyi ikunnga mukuti chi vaa zwiira kuvusu naame mazuva oo tatwe mmi ni ku seena cho ku lya. ³ Chi na va cho kuti va voolye ku mizi yaavo, mwendi va woola ku zuminina mu inzira. Hape vamwi vazwa kulye." ⁴ Varutwana vaakwe ni va mu itava kuti, "Tu woola ku wana kuhi zinkwa zi lyikeene ku ikutisa vantu moo wunu muzuka?'' ⁵ A va va vuuza kuti, "Mu kweete zinkwa zoo nngayi?" Ni vaati, " zi mana iyanza ne too uvere" ⁶ A vaa lawuiiri ikunnga kuti lyi ikalye hansi. A vaa hindi zinkwa zi mana iyanza ne too uvere, nna aha vuitumero, cho ku zi kauhanya, nna a ha varutwana vaakwe kuti va zi viike ha vusu vwaavo, ni va zi viika ha vusu vwe ikunnga. ⁷ Va veena ne tuswiizana, mmi chiinga a mana ku tu raperera, cho ku tu ha varutwana vaakwe kuti naato va tu wavire vantu. ⁸ Va vaalyi mane cho ku ikuta. Va vaa kunganya vufwaafwaalyi vu vaa shaalyi, vu vaa kwani mu matundu makando a kwana iyanza ne too uvere. ⁹ Vantu vonse va vaalyi ku yendera ku miyanda yiina ikumi yoo nne. Mmi naa a va cho kuti va kwiya. ¹⁰ Hoohwaaho naa a zwa ne varutwana vaakwe cho ku injira mu vwaato ni vaa zuhira ku chisi cha Dalimanuta. ¹¹ Vafarasai cho ku iza ni vaa tanga ku lyi kananisa naaye. Ni va saka chishupo mwaalyi chi zwa ku iwulu, ku mulyika. ¹² A vaa kwitiri luhuho lwaakwe kunsi a hulu nna va cho kuti, "Lyaaho chinzi imbuto ya lyilyahanu ha mu saka chishupo? Vusakusima ni mu lwiirite, ka kwiina chishupo cheeti ne chi heewa imbuto ya lyilyahanu." ¹³ Mmi naa va siya, cho ku voola cho ku injira mu vwaato, naa ya ku imwi mbalyi. ¹⁴ Lyinu hanu varutwana va vaa zivalyi ku lyi hindira zinkwa. Ku veena vulyo chinkwa chii mwina mu vwaato. ¹⁵ A va va kalyimeri naati, "Mu lolye, mane mu ikalye ne mu lyi lyiisiiza mu lyi vavalyere mu chivirisa cha Vafarasayi ne chivirisa cha Heruda." ¹⁶ Varutwana cho ku lyi wamba mukati kaavo, "Nje kuti ka tu iina chinkwa." ¹⁷ Jeeso a vaa lyemuhi ichi chintu, mmi cho ku va cho kuti, "Chinzi ha mu kweete mu wamba cho ku vula chinkwa? ka mwiini ku lyemuha? ka mwiini ku zuwisiza? Chi mu vaa holohi inkulo? ¹⁸ Mwiina menso, ka mu voni? mwiina matwi, ka mu zuwi? ka mu kumbulukwa? ¹⁹ Chivaka chii ni vaa hindite zinkwa zi mana iyaanza cho ku chi kauhanyeza valyikana mwaanda i mana i yaanza, mu vaa kunganyiza vufwaafwaalyi vwe chinkwa mu matundu o nngayi?" va va itavi ni vaati, "Ikumi ne too uvere." ²⁰ Lyinu chi ni kauhanyeza vo mwaanda yo nne zinnkwa zi mana iyaanza ne too uvere, mu vaa izuza matundu oo nngayi? Va va mu cho kuti, ''A mana iyaanza ne too uvere" ²¹ Naa a va cho kuti, "Ka mwiini ku zuwisiza?" ²² Va veeza kwa Bethesaida. Vantu va veena kwa teni va vaa lyeeti mukwaame a va fwiire menso mmi ni vaa kumbira Jeeso kuti a mu wonde. ²³ Jeeso nna a mu kokera cho ku mu hindira hanze lyo muzi. Chiinga a mana ku mu swiira mu menso cho ku mu viika manza, a va mu vuuza kuti, "Kwiina cho u vweene?" ²⁴ Na inusa mutwi, cho kuti, "Ni vweene vantu ni va swana si neeri zisamu zi kaya vu yeenda." ²⁵ A voolyi a viiki manza a kwe hape ha menso aakwe, mmi unkosi cho ku iwula menso aakwe, ku vona kwaakwe cho ku voozekezwa, cho ku taanga ku vona chimwi ne chimwi vulyo sinte. ²⁶ Jeeso nna mu tuminiza ku inzuvo yaakwe, "Sanzi u ke injiri mu muzi." ²⁷ Jeeso nna zwiira ne varutwana vaakwe ku mizi i sumpwa Sizariya Filipo. Mu nzira a vaa vuuza varutwana vaakwe kuti, "Vantu va cho kuti nje ime ini?" ²⁸ Ni vaa mu itava kuti, "Johani wo ku koloveza. Vamwi vati, 'Elija,' mmi vamwi aavo, 'Umwi wa vaporofiti." ²⁹ A va va vuuza kuti, "Uunwe mu cho kuti nje ime ini?" Pitorosi na itava kuti, "Njo uwe Kirisiti." ³⁰ Jeeso nna a va lwiira cho ku koza kuti va siye ku lwiira vantu chaakwe. ³¹ Mmi nna a tanga ku va ruta kuti Mwaana wo Muntu u swanerwa ku iza ku nyanda mu zintu zinngi, mane keeza a kanwa ne vakulwaana, mapurisita makaando ne varuti vo mulawo, mane no ku ihayiiwa, mmi cho ku vuuka mu mazuva oo tatwe. ³² A va va lwiiri naa jolweeza indava. Mmi Pitorosi nna mu hindira he imbalyi cho ku taanga ku mu kalyimera. ³³ Mmi Jeeso nna lola varutwana vaakwe ku zwaa aho cho ku kalyimera Pitorosi naati," Zwee ha masulye aangu, Saatani! Ka u viikite ingana yaako mu zintu ze Ireeza, u iviikite mu zintu za vantu." ³⁴ Ku zwaa aho naa sumpa ikunga konse ne varutwana vaakwe, cho ku va cho kuti, "Cho kuti ku ina muntu yoo u saka ku ni ichirira, u swanera ku lyi lyisampula, a hinde chifapaano chaakwe, cho ku nii ichirira." ³⁵ Mu kuti zumwi no zumwi yoo u saka ku vuluka vuhalo vwaakwe ka vu mu zovere, mane zumwi no zumwi yoo u zoverwa vuhalo vwaakwe che ivaka lyaangu ne lya manzwi a jolola, kaa a vu vuluke. ³⁶ Muntu u voolyerwa nzi mu ku lyikunganyiza inkanda yonse, mmi cho ku zoverwa ne vuhalo vwaakwe? ³⁷ Muntu u wola ku zwiisikiza nzi mu maziimo o vuhalo vwaakwe? ³⁸ Zumwi no zumwi yoo u ni fwiira insoni moo lunu luhasi lu sanguheere mane ne lu viihere, Mwaana wo Muntu keeza nna mu fwiire insoni ha kuti cho u keeza mu ikanya i Veesi ne mangiloyi a jolola."