¹ Ivaati luzuva lwe Insavata chiinga lwa mana, Mariya Magadalena ne Mariya nnyina Jemusi, ne Salome va va ka wulyi mafuta kuti veeze va ka siinge muviri wa Jeeso. ² Kakusasani ahulu ku siri ku lunza luzuva lwe ntanzi lwe insunda, ni vaa fumina ku ikumbu izuva chi lyi zwa. ³ Va vaalyi ku wambinsana, ''Njeeni yeeti a ka tu chunduluseza ivwe lyiina ha mulyanngo we ikumbu?'' ⁴ Mmi yi vaati chi va nyemuna menso, ni va vona kuti ivwe lyi zwiisiizwa, mu kuti lyi vaalyi ikaando. ⁵ Ni ve injira mu ikumbu cho ku vona mulombwana a vaa zweete ku tuva, ne ikeere ku malyo, ni vaa komokwa. ⁶ Naa va cho kuti, ''Sanzi mu tiyi. Mu saka Jeeso wo mu Nazareta, a vaa vambwiirwa. U vuukite! Ka heena aha. Mu vone ha chivaka ha va va mutuulyite. ⁷ Mmi mu yende, mu ka lwiire varutwana vaakwe ne Pitorosi kuti u kaya vu yendera ha vusu vweenu kwa Ghalaleya. Ka mu ka mu vone kookooko siina mwa va mulwiiri.'' ⁸ Ni vaa zwa mu ikumbu ni va kaya vutiya; ni va chachalyikite ne ku komokwa. Ka kwiina u va vaa lwiiri che ivaaka lyo kuti va vaa tiite. ⁹ Kakusasani ahulu ni ku siri ku lunza izuva lye ntanzi lye insunda, cho u mana ku vuuka, cho ku ka lyi vonesa kwa Mariya Magadalena, waa va zwiisa madimona eena ku mana iyaanza ne toovere. ¹⁰ Naa zwa cho ku ka lwiira va veena naaye, chi va lyira. ¹¹ Va vaa zuwi kuti u hala mane a vaa vonwa naaye, mmi ka heena va vaa zumini. ¹² Ha masulye eezi zintu a va ka lyivonahaza mu vantu voouvere, va vaalyi ku ya vu yenda mu nzira. ¹³ Ni vaa yenda cho ku ka lwiira varutwana vonse, mmi ni vaa vula ku zumina. ¹⁴ Ku zwaaho Jeeso naa lyi toondeza kwaavo va veena ikumi ne kaamwiina chi va sii keere ni va lya he itaafulye, cho ku va lwiisikiza ku vula itumero kwaavo ne inkulo inkukutu, che ivaka lyo kuti ka heena va vaa zumini avo va va mu voni chingaa mana ku vuuka mu vafwiire. ¹⁵ Naa va cho kuti, ''Mu kwiiya mu inkanda yonse, mu ka hase mulaeza mu vantu vonse. ¹⁶ Iiye yo u zumina cho ku kolovezwa kaa hazwa, mmi iiye yaa sa zumini kaa nyanswa. ¹⁷ Iizi zitoondezi kazi yende naavo va zumina: Mu izina lyaangu ka va zwiisa Madimona. Ka va wambe mu indhimi zihya. ¹⁸ Ka va wonde inzoka cha manza aavo, mane hape ka vati ni ha vanywa chinywantu chi ihaya, keeti ni chi va sasamisa. Ka va viike valweere manza, ku zwaaho ka va holye." ¹⁹ Yi vaati Simwiine choo mana ku wamba naavo, naa tantusezwa ku iwulu cho ku ke ikala ku iyanza lye Ireeza lya malyo. ²⁰ Varutwana ni vaazwa cho ku ka kutaza kumwi ne kumwi, vovulyo Ireeza neena naavo nee izuziriza manzwi che zitoondezi zi va vaalyi ku panga mukati kaavo.