¹ Siina Jeeso ha vaalyi kuzwa mu itempere, zumwi wa varutwana vaakwe nna mucho kuti, "Muruti, vone vulotu vwaa mavwee nne vulotu vwaa mazuvo!" ² Nna mucho kuti, ''U vweene muzaako woonse uuwu mukaando? Ka kwiina ivwe lyeeti nni lyi shaalye he iwulu lye lyimwe nandi lyeeti nni lyi vulye ku saa wisikizwa haansi." ³ A vaati cho wii ikeere he iruundu lye ziteente lyi va lolyinzeene ne itempere, Pitorosi, Jemusi, Johani nne Enduru nni vaa mu vuuzikiza ku mbalyi, ⁴ ''Tu lwiire, iizi zintu kazi pangahalye lyiiri? Cheeti nni chive chishupo chiinzi ha kuti iizi zintu chi ziina ha fwihi nne ku pangahala?'' ⁵ Jeeso nna tannga ku vacho kuti, ''Mu tokomere ka nzi kuvi nne muntu yeeti nna muziyeza. ⁶ Vaangi ka ve ze mu izina lyaangu mane nni vacho kuti, njeeme iiye, mane kava ziyeza vaangi. ⁷ Chi nna mwa zuwa inkoondo mane nne mahulyuhulyu e inkoondo, nni mu siye ku vireera; iizi zintu zi lukeere ku pangahala, mmi vufero keeti nni vu kusikite. ⁸ Chisi ka chi lwiisa chisi chimwe, mane nne vusimwiine ka vu lwiisa vusimwiine vumwi. Ka kuve nne ku nyanganya kwe inkaanda mu zivaka zi siyeene siyeene mane nne lwiinza. Aa matangiro e zitavi zoku hwizumuka. ⁹ Mu ikalye nni mu tokomeere. Ka va mutwaalye ha vusu vwe zikota zo molawo, mane ka mu ku kaviiwa mu masinagoge. Ka mu ziime ha vusu vwa vahitizi mane nne ha vusu vu vasimwiine che ivaka lyaangu, nni mulyi mu vupaki ku valyi. ¹⁰ Mmi manzwi a lukeere ku waambwa ku vantu voonse. ¹¹ Chi nna vamu woonda mane choku mu sumina, mu siye ku vireera kuti kamu waambe nzi. Ka kuti mwe iiyo inako, cheeti nni mu wambe kamu chi heewa; keeti nni yi ku veere uunwe mu waamba, mmi kayi ku veere luhuho lu jolola. ¹² Mwaanaswiisu ke ihayisa mwaanaswiisu kunnine, mane nne isii wo muntu mwana. Vaana ka va sandukire vazaazi vaavo mane choku ve ihayisa. ¹³ Ka mu toyeewa nne vantu voonse che ivaka lye izina lyaangu. Mmi iiye yeeti nna alyi woonderere mbwiita ku mamanimani, uuzo nje muntu yeeti nna hazwa. ¹⁴ Chi nna mwa vona chintu chiina ikwe nni chi ziimeene hantu ha jolola (iye yoo vala a kumbulukwa), aavo veena kwa Judiya va tiirire ku maruundu, ¹⁵ a iiye yo wiina he iwulu lye inzuvo a siye ku suuka choku injira mukati kaayo, nandi ku hiinda chimwi mwa teni, ¹⁶ mane naaye yo wiina ku luwa saanzi a ka voolyi kuiiza ku hiinda chizavalo. ¹⁷ Mmi kaku ku mayivite aavo veena vahwiire mane nnavo veena tuchiche mwaawo mazuva! ¹⁸ Mu rapere kuti sanzi nni yi kuveere inako ya malyiha. ¹⁹ Ka kuti kaku ku veere nne manyaando makaando a hulu, a chita kuti ka eeni kuva ha teni ku zwa ku matangiro, Ireeza cho vuumba inkaanda, ku iiza ku sika suunu vuti, nne kuti, mane keeti nni ku voolye kuve vulyo hape. ²⁰ Kwaanda o kuti Ireeza a vaa fwiisa aawo mazuva nni ku sena ku vaavi nne inyama yeeti nni yiva hazwa. Mmi che ivaka lya vasalyitwa, aavo va a va salyi, nna fwiisa aawo mazuva. ²¹ Cho kuti zumwi kaa mucho kuti, 'Mu vone, Kirisiti zunuu!' 'kamba mu vone, zuunaa kuna!' saanzi nni mu zumuni. ²² Ka kuti Vakirisiti va mapa nne vaporofita va mapa ka va voneke mane ka va pange zi voneeka nne zikomosa, zoonse iizi nni zi pangirwa he iwulu lyoku ziyeza, chiku woolyeka, mane nne va salyitwa. ²³ Mu tokomere! chi nna mulwiira izii zintu zoonse inako nni yi siina ha vusu. ²⁴ Mmi ku mamanimani aawo mazuva a manyaando, izuva kalyi siiswa, mweezi keeti nni wuhe iseri, ²⁵ inkaani ka ziwe ku iwulu, mane nne ziho ziina mu iwulu kazi nyungooswa. ²⁶ Lyiinu njeeti nni va vone Mwaana wo Muntu nna keeza mu makope che ziho zikaando nne ku vereenga. ²⁷ Ku zwaaho njeeti nna kaa tumine mangiloyi aakwe ku ka kunganya vantu vaakwee vaa salyitwa ku zwa mu imbalyi ze inkaanda zoonse nne inhuho zoonne, kuzwa inkaanda kuyi manina mane nne ku iwulu kulyi manina. ²⁸ Mu lyi tute ituto ye isamu lye ikuzu. Hoo hwaaho vulyo tu tavi twa teni chitu taanga ku huvahala mane nne ku taanga ku mena makova, wiizi chipeto chimwe iziva kuti imbumbi chi yiina hafwihi. ²⁹ Voo vo vuti hape ha mu vona iizi ziintu nni zi pangahala, muizive kuti cho wiina hafwihi, hafwihi nne mulyaango. ³⁰ Cho vusakusima nni mulwiirite, uulu luzuvo keeti nni lu hite mbwiita zonse iizi zintu chini zaa pangahala. ³¹ Iwulu nne inkaanda kazi hite mmi manzwi aangu aawo keeti nni a mane. ³² Mmi ka ha iilyo izuva nne inako, ka kwiina yo wiizi nandi mangiloyi ku iwulu, nne haiva Mwaaaswiisu, mbwiita Taayo. ³³ Mu tukomere! Mu lyiisa, ka kuti kamwiizi kuti inako inzi. ³⁴ Ku kola mane iiri unkosi wa hinda lweendo- yoo siya inzuvo yaakwe choku yi siira vahikaana vaakwe, zumwe nne zumwe nni kwiina haa tokomeere, mmi choku laula shaangavira kuti saanzi a laalyi. ³⁵ Chiingi lyiinu mu ikalye nni mu tokomeere, ka kuti ka muiizi kuti simwiine we inzuvo u keeza lyiiri; yi woola kuva chiteengu, hakati ka masiku, mukoombwe chiwu lyira, nandi ha kusasani. ³⁶ Haiva nneeza cho kuhweera, saanzi amu waani mu lyeere. ³⁷ Chini mulwiira nni chilwiira zumwe nne zumwe; Mu lyiisa!''