¹ Lyinu Jeeso naa tanga ku va ruta che milya. Naa cho kuti, "Mukwaame a va vyalyi iwa lyo muwoomba cho kulyi zaakiriza, cho ku sa irindi ha kamwiinwa muwoomba. A vaa zaaki inzuvo yiina he iwulu, cho ku walyima valyimi. Ku zwaaho cho ku hinda lweendo. ² Che inako isheyeeme naa ka tumina muhikaana ku vatokomeri ve iwa lyo muwoomba ku iza ku hinda zihantu zo muwoomba mu luwa. ³ Mmi va va mu hindi, cho ku mu kava ni va mu tumina kwaa ka zwa, naa saa kweete chintu. ⁴ Hape naa va tumina muhikaana zumwi, u va va horofaza naaye mu mutwi mane cho ku mu fwiisa insoni. ⁵ Cho ku tumina zumwi hape u va ve ihayi. Va va chiti vangi che nzira yi swana, ku horofaza vamwi mane cho ku ihaya vamwi. ⁶ A veena zumwi muntu yaa a vaa si sheere kuti a mutume, mwaanaswiisu waakwe yoo sunitwa. A vaalyi njeeye wa mamanimani ku mutuma ku valyi. Naa cho kuti, ''Mu va ka mukuteke.'' ⁷ Mmi valyimi vo muwoomba nni vaa wambinsaana kuti, "Uuzu njeeye swaana. Mu ize, tu mu ihaye, ku zwaaho vuswa muvu ku veere vweetu." ⁸ Va va mu woondi cho ku mu ihaya, cho ku mu sohera hansi lye iwa. ⁹ Lyinu, si iwa kaa chite vulye? Keeze cho ku sinya vonse va tokomeere luwa ku zwaaho cho ku luha vamwi. ¹⁰ Ka heena mu vaa valyi ilyi ingolo? "Ivwe lyi va va kaani vazaakisi, nje lyi vaavi ivwe lyoku zaakira. ¹¹ Iichi chi vaalyi ku zwa kwa Simwiine mane chi komosa mu menso eetu." ¹² Ni vaa saka mu va woola ku wonda Jeeso, mmi cho ku tiya vungi vwa vantu, ka kuti va vee zivi kuti u kweete u va guviriza. Ku zwaaho mpu va mu siyiire cho ku lyi yeendera. ¹³ Mmi lyinu ni vaa tumina Vafarasayi ni veena Heroda kwaalyi kuti va ka mu wonde cha manzwi. ¹⁴ Chinga vaa sika, cho ku mucho kuti, ''Muruti, twiizi kuti ka wiina indava ne muntu mwaa lolyera zintu, mane ku salululyi vantu. U ruta cho vusakusima inzira ye Ireeza. Kwiina mulandu ku ruwera mutero kwa Kaishara nandii? Tu ruwere nandi tu siye?'' ¹⁵ Mmi Jeeso ne iziva ku lyi lyanganya kwaavo cho ku va cho kuti, ''Chiinzi ha mu ni lyika? Mu nihe malyi kuti ni woolye ku a vona.'' ¹⁶ Ni vaa lyeeta amwi kwa Jeeso. Cho ku va cho kuti, ''Chiswaniso ne izina lyaani ilyi? Ni vaa cho kuti, '' Nji za Kaishara.'' ¹⁷ Jeeso naa cho kuti,'' Muhe Kaishara za Kaishara, Ireeza zee Ireeza.'' Va va mu komokerwa. ¹⁸ Lyinu Vasadukayi va cho kuti ka kwiina ku vuuka mu vafu, ni veeza kwaalyi. Ni va mu vuuza ni vati, ¹⁹ "Muruti, Mushe a va tu ngolyeri, 'cho kuti mukulwa muntu waa fwa cho ku siya mukulwaakazi, ni ku seena mwaana, a hinde muihyaavo wo mwaanche,cho ku zaalyira mukulwe vaana.' ²⁰ Ku veena vaanaswiisu va mana iyaanza ne to uvere, we ntanzi a va hindi mukulwakazi cho ku fwa naa seena mwaana, ²¹ Zumwi wo vuuveri a va mu hindi naaye cho ku fwa naa seena vaana, wo vuutatu naaye. ²² "Veena ku mana iyanza ne to uvere ni vaa vula ku siya vahwiire. Ku masulye aavo vonse mukulwaakazi naaye cho ku fwa. ²³ Mu ku vuuka kwa vafu, chi va vuuka hape, kaa ku veere mukaani? Ka kuti aava vaanaswiisu vonse va va musesi.'' ²⁴ Jeeso naacho kuti, "Ka chinngi mu foseeza, ka kuti kamwiizi manzwi ne ziho ze Ireeza? ²⁵ Chini vaa vuuka mu vafu, ka kwiina ku seswa ne ku sesa, mmi chi va swana ne mangiloyio ku iwulu. ²⁶ Mmi cho kuya cha va fwiire ne ku vuuswa kwaavo, a ka mwiini ku vala mu ivuuka ya Mushe, che indava ye chivuna, ne kuti Ireeza a va waambi kuti, 'Njeeme Ireeza wa Aburahama, ne Ireeza wa Isaka mane ne Ireeza wa Jaakovo'? ²⁷ Ka heena Ireeza wa va fwiire, mmi nje Ireeza wa va hala. Mu foseeza.'' ²⁸ Zumwi wa vangolyi ne iza ku zuwa zi va vaalyi ku wamba; naa vona kuti Jeeso we itava nenza. Naa mu vuuza kuti, "Njo wuhi mulao u zamba imwi?" ²⁹ Jeeso a vee itavi kuti, "Chiina musula njo kuti, 'Zuwe, Isiraere, Simwiine Ireeza weetu, Simwiine u mwiina. ³⁰ U lukeere ku suna Simwiine Ireeza che inkulo yaako yonse, cho luhuho lwaako lonse, muhupulo waanko woonse, nne che ziho zaako zoonse. ³¹ Wo vuuveri mulao njo uwu, U lukeere ku suna muntu kuninaako mmo ulyi suniine.' Ka kwiina umwi mulao hape ku zamba iiyi yoo uvere. ³² Mungolyi naacho kuti, "Muruti, yoo u Shiyeeme! Waa wamba cho vusakusima kuti Ireeza uu mwiina, mane ne kuti ka kwiina Ireeza zumwi kunze lyaakwe. ³³ Ku mu suna che inkulo yonse yaako, cho muhupulo ne ziho zonse. Ne ku suna zumwi sina mmo u lyi suni, ku zamba ineo zo ku hiisha ne zitavero zo ku hiisha." ³⁴ Jeeso chingaa vona kuti we itava nenza ipuzo, naa mu cho kuti, Ka wiina kulye nee muvuso we Ireeza.'' Chinga kwaa zwaaho, ka kwiina zumwi hape a vaati na alyi zuwa ku mu vuuza ipuzo. ³⁵ Jeeso ne itava vuti, chaa vaalyi ku kweete ku ruta mu itempere; naati, Chinzi vangolyi ha va cho kuti Kiristi mwaanaswiisu wa Daafita? ³⁶ Daafita iye mwiine, mo luhuhu lu jolola, a vaacho kuti, Simwiine a va wambi ne Simwiine waangu, wu ikalye ku iyanza lyanngu lya malyo, mbwiita chi naa chita zira zaako hoo tenteka matende. ³⁷ Daafita u mu sumpa 'Simwiine,' lyiinu vulye kuti Kirisiti a sumpwe Mwaana wa Daafita?" Chinavungi cha vantu ni cha mu teekereza cho ku sannga. ³⁸ Mu ituto zaakwe Jeeso a vaacho kuti, "Mutiye vangolyi va yeenda nni va zweete zizavalo zilye nne ku saka ku rumereswa mu misika ³⁹ Nne ku saka ku ikala mu meekalo eena ha vusu mu masinagoge, nne ku ikala mu zivaka za maziimo mu mikiti. ⁴⁰ Va ziyeza va fwiirwa mu mazuvo aavo, mane va rapera itapero inde kuti vantu va va vone. Aava vakwaame ka va taambulye ku nyaanswa ku kaando." ⁴¹ Mmi Jeeso ne ikala hansi ku vambana ne ibonkesi lya malyi mu itempere, avaa lolyereere vantu chiva viika malyi mu ibonkesi. Vantu vangi va va humite ni va viika malyi maangi. ⁴² Mmi mufwiirwa wo mukulwakazi wo muhumanehi ne za cho ku newula malyi aakwe oovere, a lyikana ipeeni. ⁴³ Mane a vaa sumpi varutwa vaakwe cho ku va cho kuti, ''Cho vusakusima ni mulwiirite, uuzu mukulwaakazi wo muhunanehi waa zwiisa malyi a zamba a vonse aava vaa zwiisa mu iputukesi lyi zwiisikizwa. ⁴⁴ Ka kuti vonse vaa vaa zwiisa cho kuya mu va humiire. Mmi uuzu mufwiirwa woo mukolwaakazi a vaa zwiisa ku zwa mu vuhumanehi vwaakwe, cho ku viika malyi aakwe onse aava viikite vuhalo vwaakwe ha teni.''