¹ Lyinu chi va keeza kwa Jerusalema, va veena ha fwihi ne Bethiphage ne Bethani ku iruundu lye zitente, mane Jeeso avaa tumi varutwana vaakwe voo uvere, ² mane naa vacho kuti, "Mukwiya ku muzi utu lolyinzeene naawo. Mu kuti chi mu injira mu ulyi, mu mu ka waane kadonki ka seeni ku chirwa. Mu ka ka sumunune mu kalyeete kwangu. ³ Mane cho kuti zumwi u mu cho kuti, ´´Chiinzi ha mu chita vuti?' Mu cho kuti, ´Simwiine u yi saka, mane mwaa ka yi vooza."' ⁴ Ni vaa yeenda cho ku ka waana kadonki ni ka sumiinwa ha mulyaango hanze lye inzirazana yi iwukite, mmi ni va ka sumununa, ⁵ Mane vantu vamwi va va zimeene ni vaacho kuti, ''Mu kweete ku chita nzi, ha mu sumununa kadonki?'' ⁶ Ni va va lwiira siina Jeeso mwaa ka va cho, mmi vantu ni va va siya cho kulyi yeendera mu inzira yaavo. ⁷ Varutwana voo vere va Jeeso va va ka lyeeti kadonki cho ku sohera he iwulu lya teni zizavalo zaavo kuti Jeeso a ka ichire. ⁸ chinavungi ni chaa zala zizwaato zaavo mu inzira, mane vamwi ni va zalyira mitavi i va vaa kosolyi mu mawa. ⁹ Aavo va vaa yendeere ha vusu ni ha masulye aakwe ni vaa sumpwirira, ''Hosana! Ku sehuheere iyee yo wiiza mu izina lya Simwiine Ireeza. ¹⁰ Kwiina Mikonde ku muvuso we isheetu Daafita! Hosana mu iwulu!'' ¹¹ Jeeso a vaati cho wi injira mwa Jerusalema na ke injira mu itempere cho ku taanga naa kweete u lola chimwi ne chimwi mukati kaayo yonse. Che ivaka lyo kucho kuti, inako chi yi va va siyite, naa zwaaho ne veena ikumi ne voovere vaakwe cho kuya ku muzi wa Bethani. ¹² Mu izuva lyi ichirira, chi va ka voolyete kwa Bethani, a vaa fwi inzala. ¹³ Mane a vaati cho u lola ha vusu cho ku vona chisamu che ikuzu chi veena makova, mmi naaya ku ku vona kuti aa chiina zihaantu. Mmi naa ka waana kuti ka chiina zihaantu makova vulyo, ka kuti ka heena yi vaalyi inako ya makuzu. ¹⁴ Naa a lyi cho kuti, ''Ka kwiina yeeti naa voolye a lye zihaantu mwaako hape.'' Varutwana vaakwe cho ku mu zuwa. ¹⁵ Mmi naa sika mwa Jerusalema, ne ku injira mu itempere cho ku taanga naa hindika va wula ne va wuza mu itempere. Naa wiisa mataafulye a va wuza malyi mane ne zipura zaavo va vaalyi ku wuza inkwirimba. ¹⁶ Mmi naa vula ku va zuminina kuti vazwe ne zi va vaalyi ku wuza. ¹⁷ Mmi naa va ruta naa a cho kuti, ''Aa ka ku ngolyetwa kuti inzuvo yaangu ka ive inzuvo ye itapero ya vantu ve nkanda yonse? Mmi unwe mu va yi pangi irindi lya vasa. ¹⁸ Mmi vapurisita vakulwaana ne vangolyi va va mu teekete kuti wa wamba kutinzi, mmi ni vaa saka inzira yo ku mu ihaya. Ni va mu tiya ka kuti vantu vonse va va komweeswa ituto zaakwe. ¹⁹ Mmi yi vaalyi kuti mu chitengwaana chimwi ne chimwi ha chi sika, va vaalyi ku zwa mu muzi mukando. ²⁰ Kakusasani chi va kaya vu yeenda, ni vaa vona isamu lye ikuzu ni lyi nyaaniine ku ya ku mihisi yaalyo. ²¹ Pitorosi naa kumbulukwa naa cho kuti, ''Muruti, vone! Isamu lye ikuzu lyo u vaa kuti, "Muruti, vone! Isama lye ikuzu lyo u vaa kuti lyi vaa nyaani." ²² Jeeso naa vee itava, ''Muve ne itumero mwe Ireeza. ²³ Cho vusakusima ni mulwiira kuti ini kamba ini yeeti naacho ilyi irundu kuti, 'nyukuke ahoo u ye mu iwate mmi naa a saa nyansa mu inkulo yaakwe mmi cho ku zumina kuti chaa wamba ka chi pangahalye, iicho Ireeza ncheeti naa pange. ²⁴ Lyinu ni mulwiira kuti: chimwi ne chimwi chi mu raperera ne ku kuumbira ka mu chi heewa mane ka chive cheenu. ²⁵ Chi mu ziima ni murapera, mu lukeere ku woondera vamwi naanwe kuti isheenu wiina ku iwulu a mu woondere zivi zeenu naanwe. ²⁶ Cho kuti ka mu woonderi vamwi, ne isheenu wiina ku iwulu naaye keeti naa mu woondere zivi zeenu.'' ²⁷ Ni va ka voola hape kwa Jerusalema. Jeeso a vaati cho u kaya vu yeenda mu itempere vapurisita vakulwana ne vangolyi ne vahitizi va veeza kwaalyi. ²⁸ Ni va mu cho kuti, '' U vaa heewa ne ini kulawula ne ku panga izi zintu? Mane yaava ku lawiiri kuti u zi chite njeeni?'' ²⁹ Jeeso naa va cho kuti, ''Muni mu vuuza ipuzo yii mwiina. Mu ni lwiire naame mu ni mulwiire ziho zi ni chita chaazo izi zintu. ³⁰ Ikolovezo ya Johani yi vaalyi ku zwa ku iwulu nandi mu vantu? Mu ni itave.'' ³¹ Mmi ni vaa wambisana mukati kaavo ni va lyi cho kuti, ''Chi twa a cho kuti, e vaalyi ku zwa ku iwulu, mbwa a cho kuti chinzi ha mu seena mu va mu zumini?' ³² Mmi chi twa a cho kuti, e vaalyi ku zwa mu vantu,'...''mmi ni vaa tiya vungi vwa vantu ka kuti vantu va veezi kuti Johani muporofita. ³³ Mmi ni ve itava Jeeso kuti, ''Ka twiizi. ''Mmi Jeeso naa va cho kuti, ''Naame keeti ni mu lwiire ziho zini chita chaazo iizi zintu.''