¹ Jeeso naazwa heecho chivaka naaya ku inkanda ya Judiya cho kuya ne ku inkanda iina ku vusu vo lwiizi lwa Jorodani, mmi vuungi vwa vantu nni vweeza kwaalyi hape.Nna taanga ku varuta hape siina kuya che itwayero yaakwe. ² Mmi Vafarasayi nni veeza kwaalyi cho ku mulyika cho ku mu vuuza kuti, ''Kuya cho mulao mukwaame u zuminiinwa ku kaana muihyaavwe?" ³ Nne itava, ''Mushe a va mulawiiri ku tiinzi?" ⁴ Nni vaacho kuti, ''Mushe a va zuminini mukwame kuti a ngolye ingolo lyoku mukaana ku zwaaho cho ku mu hindika.'' ⁵ Ivaalyi che vukukukutu vwe inkulo zeenu chiingi a va mu ngolyeri uuwu mulawo,'' Jeeso naa vacho vulyo. ⁶ Mmi ku mataangiro o ku vuumbwa, Ireeza a vaa vuumbi Mukwaame ne mukulwaakazi.' ⁷ Che ilyi ivaka mukwaame ka a siye veesi ni vanyiina cho ku ka ngabasira mwiihyavwe, ⁸ uvu vuuveri vu va inyama iimwina.' Ka va siri voovere, mmi che inyama i mwina. ⁹ Lyinu cho kwiina vulyo chintu chaa lyeeta haamwiina Ireeza, muntu sanzi a chi halulyi hakati." ¹⁰ Chi veena mu inzuvo, varutwana ni va mu vuuza hape che iyi indava. ¹¹ Naa vacho kuti, "Umwi ne umwi yo u kaana mukaakwe cho ku ka sesa mukulwaakazi ungi chaa mu chitira vuhuulye. ¹² Mmi ne mukulwaakazi ha kaana mukaakwe cho ku sesa mukwaame uungi, u chita vuhuulye." ¹³ Mmi ni vaa lyeeta vahwiire vaniini kwaalyi kuti a va wonde, mmi varutwana cho ku va kalyimera. ¹⁴ Mmi Jeeso chiinga lyemuha, keena a va lyi tumeri naa vacho kuti,'' Mu siye vahwiire veeze kwaangu, mu siye kuva viinda, mu kuti muvuso we Ireeza nji wa va swana naavo. ¹⁵ Vusakusima ni mu lwiirite , uuzo ya seti naa taambulye muvuso we Ireeza siina muhwiirezana keeti naa ka wi injire.'' ¹⁶ Ku zwaaho naa wonda vahwiire mu manza aakwe cho ku vaha mikonde ne ku va viika manza mu mitwi. ¹⁷ Mmi chiinga tannga ku zwiira ha vusu ne lweendo lwaakwe, unkosi cho ku mu ngombweera, ne ku mu fukamina, cho ku cho kuti, ''Muruti yo u shiyeeme, ni chite nzi kuti ni woolye ku vona vuhalo vusaa mani?'' ¹⁸ Jeeso naa mu cho kuti, ''Chiinzi hooni sumpa yo u shiyeeme? Ka kwiina yo u shiyeeme, kunze lye Ireeza ye yeena. ¹⁹ Wiizi milao: 'Siye ku ihaya, siye ku chita vuhuulye, siye ku iva, siye ku hambiriza ,siye ku chengerera, ne kuti u kuteke veeso ne vannyoko'.'' ²⁰ Unkosi naacho kuti, ''Muruti, ku zwa mu vuniini vwaangu ni vaa zuwisiza iyii milao.'' ²¹ Jeeso a va mu lolyi cho ku mu suna. Naa mu cho kuti, ''ka wiina chintu chii mwiina. U lukeere ku wuza zoonse zo wiina naazo, cho ku ziha vahumanehi, hoo chita vulyo, ka u ve ne vuhumi ku iwulu. Ku zwaaho, wiize u ni shaalye mu masulye.'' ²² Mmi aa manzwi a va mu sasamisa ahulu, cho ku katuka naa wiiriirwa che ivaka lyo kuti a va humine ahulu. ²³ Jeeso ava lyolyi mumbalyi cho kucho varutwana kuti, ''Ku kaavo vulye kuti vahumi ve injire muvuso we Ireeza!'' ²⁴ Varutwana nni va komokerwa manzwi aakwe. Mmi Jeeso naa vacho hape kuti, ''Vahwiire, ku kukutu vulye ku injira muvusu we Ireeza! ²⁵ Ku huvirira kuti Ikaamera yi injire mulyiinso lye inaalyiti, kuunze lyo kuti muntu muhumi a ke injire muvuso we Ireeza.'' ²⁶ Vava komokwa ahulo, cho kulyi vuuza kaha vuhaavo, ''Lyiinu ku woola ku hazwa inni?'' ²⁷ Jeeso choku valola cho kucho kuti, ''Mmi ku kaavo ku vantu, ku zwaaho kwe Ireeza ku huva. Ka kuti zintu zoonse zi woolyeka kwe Ireeza." ²⁸ Pitorosi choku taanga ku waamba naaye, "Vone, uuswe tuka siyite chimwe nne chimwe mane tuku sheere mu masulye." ²⁹ Jeeso naacho kuti, Cho vusakusima nni mulwiirite, ka kwiina ava siyi inzuvo, nandi vaanaswiisu kunine, nandi vaanakazana kunine, nandi vaanyina, nandi veisi, nandi vaana, nandi inkaanda, che ivaka lyaangu, nne che ivaka lyo mulaeza, ³⁰ yeeti naa vulye ku heewa kwiina miyaanda cho vuungi ha hanu vuti mwe yinu inkaanda: mazuvo, vaanaswiisu kunine, vaanakazana kunine, nne vaanyina, nne vaana, nne inkaanda, nni kwiina nne ku katazeha ha teni, nne mu inkaanda yi keeza, vuhalo vu saa mani. ³¹ Mmi vangi veena ku vusu ka vave ku mamanimani, ku zwaaho va mamanimani cho kuva ve intaanzi." ³² Va veena mu nzira, nni va kaya kwa Jerusalema, Jeeso naa va hitiire ku vusu. Varutwana nni va komokwa, mmi aavo vava musheere mu masulye nni valyi kalyilyiirwa. Ku zwaaho Jeeso choku suumpira veena ikumi nne toovere he imbalyi choku taanga kuva lwiira kuti va keeza kuku pangahalyirwa inzi mu vufwihi. ³³ ''Mu vone, tu kaya kwa Jerusalema, mmi Mwaana wo Muntu u kaya kuku heewa mu mayaanza a va purisita va kulwaana nne vangolyi. Ka va munyaansikiza lufu choku muha vantu ve inkaanda vulyo. ³⁴ Ka va mushewunwiine lufu, choku mu swiira, ku mushimeha, choku mu ihaya. Mmi ku zwaaho chini kwaa hita mazuva ootatwe kaa vuuke." ³⁵ Vaana va Zebediya va sumpwa Jemusi nne Johani va veeza kwaalyi nni vati, ''Muruti, tu saka kuti u tu chitire cheeti tu sake kwaako.'' ³⁶ Naa vacho kuti, ''Mu saka kuti nni muchitire nzi?'' ³⁷ Aavo choku mucho kuti, ''Tu zuminine kuti twi kalye naawe muku vereenga kwaako, umwi e kalye ku malyo ako, umwi choku ikala ku mamonso.'' ³⁸ Mmi Jeeso naa ve tava naati, '' Ka muiizi chi musaka. A mu woola ku nywa inkomoki yeeti nni nni nywe nandi ku zimanina ikolovezo yeeti nni nni kolovezwa chaayo?'' ³⁹ Nni va mucho kuti,'' Tu woola.'' Jeeso naa vacho kuti, "Inkomoki yeeti nni nni nywe ka mu yinywe. Ikolovezo yeeti nni nni kolovezwa chaayo, ka mu kolovezwa chaayo. ⁴⁰ Mmi yo kuti umwi yoo ni kala ku malyo nandi ku ma monso, ka heena iime nni niha, mmi mbwiita kwaavo va vakanyereezwa." ⁴¹ Mmi varutwana vamwi veena ikumi nne toovere chiinga va zuwa iyi ndava, choku taanga nni va nyerererwa Jemusi nne Johani. ⁴² Jeeso choku valyi sumpira nnaati, ''Mwiizi kuti a voo va hindwa niiri va vusi va vantu ve Inkanda kuti va va lyaatiriza vulyo, mane nnaavo va maziimo a hee wulu vava laula vulye. ⁴³ Mmi ka ku lukeere kuva vulyo mukati keenu. zumwe nne zumwe yoo saka ku kuzwa mukati keenu a ve muhikaana wenu, ⁴⁴ mane nayee yoo saka kuva we ntaanzi u lukeere kuva chikombwa cha voonse. ⁴⁵ Mwaana o Muntu ka heena a vee ziri ku teenderwa, mmi a ve iziri ku teendera, mane nne kuha vuhalo vwaakwe nni yilyi chi wulyiso cha vaangi." ⁴⁶ A veeza kwa Jeriko. Mmi cho zwa mwa Jeriko ne varutwana vaakwe ne vungi vwa vantu, mwaanaswiisu wa Timayusi, Batimayusi, mukumbiizi wo muhofu, a vee ikeere he imbalyi ye inzira. ⁴⁷ Chiinga a zuwa kuti nje Jeeso wa Nazareta, naa taanga ku huwa naati, "Jeeso, Mwaana wa Daafita, ni fwiire inse!'' ⁴⁸ Chinavungi cha vantu ni chaa lwiisa mukwaame wo muhofu, ni chi mu cho kuti toontolye. Mmi iiye naa zwiira ku vusu ne ku huwa, "Mwaana wa Daafita, ni fwiire inse!'' ⁴⁹ Jeeso naa ziima cho ku laula kuti a ka sumpwa. Ni vaa sumpa mukwaame wo muhofu, cho ku cho kuti, ''Kolye! ziime! U ku sumpa.'' ⁵⁰ Naa zavula uvaaki waakwe cho ku mu zindira ku imbalyi, cho ku ziima cho ku hweera, cho kuiza kwa Jeeso. ⁵¹ Jeeso naa mu itava naati, ''U saka kuti ni ku chitire nzi?'' Unkosi a sa voni cho ku cho kuti, ''Muruti, Ni saka ku taambula ku vona kwaangu.'' ⁵² Ku zwaaho Jeeso cho ku mu cho kuti, "Kwiya. Itumero yaako chi ya ku hoza.'' Ho hwaaho cho ku taanga ku vona hape, mane naa mu shaala mu nzira.