¹ Lyinu hanu ka kwina iwatulo kwa avo veena mwa Kirisiti Jeso. ² Mukuti mulawozana we luhuho lwe vuhalo mwa Kirisiti Jeso u va ni hululyi ku mulawozana we chivi ne lufu. ³ Mukuti mulawo chu sena u valyi kuwola ku chita mukuti u va vulyiteziho che inyama, Ireza a va chiti. A va tumi Mwanaswisu wakwe mu chiswano che inyama ye chivi kwiza ku va chitavero che chivi, mane na watula chivi mwi inyama. ⁴ A va chiti ichi ku chitira kuti mulawo zu saka zi ve ni zi chitahazwa mweetu, uswe tu sa yendi kuya che inyama, mi kuya che luhuho. ⁵ Avo va hala kuya che inyama va teekesa zintu ze inyama, mi avo va hala kuyache luhuho va teekesa zintu ze luhuho. ⁶ Mukuti ingana ye inyama lufu, mi ingana ye luhuho vuhalo ne ikozo. ⁷ Ichi ivakalye kuvihere Ireza kwe ingana ya inyama, mukuti ka yi lawulwa ne mulawo we Ireza, Nangati ku woola kuva. ⁸ Avo veena mwi inyama ka va wollyi ku sangisa Ireza. ⁹ nehakuvavulyo, ka mwina mwi inyama mi mu luhuho, haiva niiri vusakusima kuti Luhuho lwe Ireza luhala mwenu. Mi haiva umwi na sena luhuho lwa Kirisiti, ka hena wakwe. ¹⁰ Haiva Kirisiti wina mwenu, muviri ufwire mwi imbalyi ye chivi, mi luhuho luhala mwi imbalyi ye kushiyama. ¹¹ Haiva luhuho lwakwe a va vuusa Jeeso mu vafu luhala mweenu, iye ya va vusa Kirisiti kuzwa kwavo vafwire kahe vuhalo miviri ifwa yeenu nayo che Luhuho lwakwe, yo hala mukati kenu. ¹² Lyinu vulyo, vakwangu-chiswisu, tu korota, mi insini kwe inyama ku hala kuyache inyama. ¹³ Mukuti haiva ne muhala kuyache inyama, mu yendere kufwa, mi haiva che Luhuho ne mu twaala misevizi ye miviri ku lufu, ka mu halye. ¹⁴ Mukuti sina chinavungi havu hitirwa ne Luhuho lwe Ireza, ava vana-swisu ve Ireza. ¹⁵ Mukuti ka hena mu va tambulyi luhuho lwe kuwondwa kuvolyera vulyo mu ku tiya. Kunzelyovulyo, mu va tambulyi luhuho lwe kuhindwa, lu tu lyira chalo, '' Abba, Tayo!'' ¹⁶ Luhuho ka ha vuhalo vuha vushupi ne luhuho lweetu kuti tu vaana ve Ireza. ¹⁷ Haiva ne tulyi tu vaana, lyinu tu valyavuswa,valyavuswa ve Ireza. Mane tu kopanere vulyavuswa ne Kirisiti, haiva vusakusima tu nyanda naye vulyo kuti tu ve ne tu tembiwa naye naswe. ¹⁸ Mukuti ni wana kuti manyando eyinu inako ka swanerwa ku swaniswa ne iverengo yeeti ne twi isenwiirwa. ¹⁹ Mukuti ku suluhera kwe zivumbatu kuzimaniine ku tondezwa kwa vana-swisu ve Ireza. ²⁰ Mukuti zivumbantu zi va twaalwa kuku vulamusula, insini kwe kusuna kwazo, mi kwa akwe iye a va ku twaalyi. Kwi ina mwi isepiso ikolyete ²¹ kuti zivumbantu ka zi hazwa mu vuhikana vo kuvola, mane ne kuti ka zi lyetwa mu ku sumunuka kwe Iverengo ya vana ve Ireza. ²² Mukuti twi izi kuti zivumbantu zonse zisanda ne ku zalyira mu zitavi hamwina nangati nahanu. ²³ Insini icho vulyo, mi nangati uswe, twi ina zihantuntanzi ze Luhuho-naswe kahavuhetu tu sandasanda mukati keetu, kuzimanina kusalwa kweetu, kuvulukwa kwe muviri yeetu. ²⁴ Mukuti choku kukola tu va hazwa. Mi chetu koziza ka chichitahalye ka chiini ku vonwa, mukuti njeni yo zimanina cha va voni na kolyete? ²⁵ Mi haiva ne tu kolyete ka ha che tu sa voni, lyinu tu chi zimanina che inkulwende. ²⁶ Mwi inzira i swana Luhuho naalo lu tusa mu kusakola kweetu. Mukuti ka twizi mu tu lukere kurapera, mi Luhuho kahavuhakwe lu tu raperera che misando isataluswa. ²⁷ Iye yo sakisisa inkulo wizi ingana ye Luhuho, mukuti u raperera mu mazimo a varumere kuya che kusuna kwe Ireza. ²⁸ Twi izi kuti kwavo va suni Ireza, u chitira zintu zonse hamwina kushiyama, kwa avo va sumpitwa kuya che kusaka kwaakwe. ²⁹ Mukuti avo va vezi, a va twaalyi mu kuva mu chiswano cha mwana-swisu wakwe, kuti a ve mwanantanzi mukati ka vanaswisu vangi. ³⁰ A vo va va twaalyi, ava a va sumpi naavo. Avo va va sumpi, ava naavo a va vashiyamisa. Avo va vashiyamisa, ava a va va nyemuni naavo. ³¹ Mu tu wambi inzi lyinu kaha izi zintu? Haiva Ireza naalyi weetu, injeni yolwa naaswe? ³² Iye ya sena ava ngameri mwana-swisu wakwe mi a va mu lyeeti mu mazimo etu tu vonse, ka vulye vulye chaakwe ku tuha zintu zonse? ³³ Injeni yeeti na lyeti kuhambizwa kumbalyi ya va salyitwa ne Ireza? Ireza injeyena yo shiyamisa. ³⁴ Injeni yeeti na watulye? Kirisiti injeyena a va tufwiri, mane ku zamba aho, a va vuuswa. U vusa ne Ireza mu chivaka che kukutekwa, mane injeyena yo tu raperera. ³⁵ Injeni yeeti na tu kawuhanya ku chishemo cha Kirisiti? Milyiko, nandi manyando, nandi kafulo? ³⁶ Vulyo sina mu ku ngolyetwa, '' Che kuvulyerwa kweenu twi ihayiwa lusuku lonse. Tu va hindwa siina imberere zi ku ihayiwa.'' ³⁷ Mu zintu zonse izi tu zambite va wolyete che iye a va tu suni. ³⁸ Mukuti che ni va tomamisa kuti nihaiva lufu,nandi vuhalo, nandi mangiloyi,nandi mivuso, nandi zintu zihanu, nandi zintu zi keeza, nandi ziho, ³⁹ nandi vulye, nandi kunsi, nandi nihaiva chintu chimwi chivumbitwa, ka chi wolye ku tu kawuhanya ku chishemo che Ireza, chiina mwa Kirisiti Jeso Simwine weetu.