¹ Mu tambulye umwi ne umwi yasakolyete mwi itumero, ne ku sena kuha iwatulo kaha inkaani. ² Muntu umwina wiina itumero ye kulya chimwi ne chimwi, umwi yasakulyete ulya mireho vulyo. ³ Iye yo lya chimwi ne chimwi sa nzi a nyansa ya salyi chimwi ne chimwi. Ne ya salyi chimwi ne chimwi sa nzi a watulyi umwi yo lya chimwi ne chimwi. Mukuti Ireza a va mutambulyi. ⁴ Njo we ini, uwe yo watula muhikana wo muntu ungi? Inji ha vusu vwa simwine wakwe ha zima nandi kuwa. Mi ka chitwa ku zima, mukuti Ireza u woola ku mu chita a zime. ⁵ Muntu u mwina u tavera izuva lyimwina hehulu lyelyimwi. Umwi u tavera izuva lyimwi ne lyimwi kulyikana. Muntu umwi ne umwi ka zundwa mwi ingana yakwe. ⁶ Iye yo kuteka izuva, u lyi kutekera Simwine. Ne iye yo lya, u lyira Simwine, mukuti uhaw vuitumero kwe Ireza. Iye ya salyi, u zimikira Ireza kulya. Naye uha vuitumero kwe Ireza ⁷ Mukuti ka kwina weetu yo lyi halyira, mane kakwina yo lyi fwira. ⁸ Mukuti haiva ne tu hala, tu halyira Simwine. Ne haiva tufwa, tu fwira Simwine.Lyinu nandi tu hala nandi tufwa, ntu ve Ireza. ⁹ Mukuti che ilyi ivaka Kirisiti a vafwi ne kuvuka lovuveeri, kuti a woolye kuva Simwine wa vonse vafu ne va hala. ¹⁰ Mi unwe, chi nzi ha mu watula mwenu-chiswisu? Ne unwe, chi inzi ha mu nyansa mwenu-chiswisu? Mukuti tu vonse ka tu ziime havusu vwe chipura che kuwatula che Ireza. ¹¹ Mukuti ku ngolyetwa, '' Siina mu ni hala, '' ku wamba Simwine, '' Kwa ngu izwi lyimwi ne lyimwi ka lyi fukame, ne lulyimi lumwi ne lumwi ka luhe vutimero kwe Ireza.'' ¹² Vulyo lyinu, umwi ne umwi weetu kahe vuitaviro kahakwe kwe Ireza. ¹³ Lyinu, tu siye kulyi watula, mi kunzelyovulyo tu hinde ichi, kuti ka kwina umwi yeeti a chichunchuni nandi kaswa mwaakwe-chiswisu. ¹⁴ Ni izi mane ne zundidwa mwa Simwine Jeeso, kuti kakwina chisajololyi kahavuhacho. Vulyo kwaalyi yo hinda chimwi ne chimwi ka chijolweere, kwaalyi ka chijolweere. ¹⁵ Haiva mwenu chiswisu u sasaminwa ivaka lye zilyo, ko mu siyendi mu chisemo. Sa nzi mwi ihayi che zilyo zeenu uzo Kirisiti wa va fwiiri. ¹⁶ Lyinu sa nzi mu siyi misevezi yeenu ishiyeme e chite vantu ku va shuta. ¹⁷ Mukuti muvuso we Ireza ka hena we zilyo ne kunywa, mi kaha kushiyama,ikozo, ne kusanga mu Luhuho lu Jolola. ¹⁸ Mukuti iye yo tendera Kirisiti mwe iyi inzira u tambulwa kwe Ireza ne ku zumininwa ne vantu. ¹⁹ Lyinu kuzwaho, ka tu vwime zintu ze ikozo ne zintu zi zaka umwi. ²⁰ Sa nzi mwi ihayi musevezi we Ireza cheivaka lye zilyo. Zonse zintu vusakusima zi jolola, mi kuvilaala ko zo muntu yo lya ne ku mu chunchunisa. ²¹ Ka kushiyeme ku salya inyama, nandi kunywa vujwara, nandi chimwi vakweenu-chiswisu cheeti a sasaminwe. ²² Izi tumero zi mwina naazo, mu zi wondesa hakati keenu ne Ireza. Mikonde kwaalyi ya salyi watulyi mwe icho cha zuminina. ²³ Iye yo vireera u watwirwa haiva nalya, ivaka ka kuzwi kwe Itumero. Ne chimwi ne chimwi chi sa zwi kwi itumero chivi.