¹ Ni mu kumbira lyinu, vakwangu-chiswisu, che inse ze Ireza, mu shupe miviri yeenu chitavero chihala,jolola, tambulwa kwe Ireza. Ichi nje musevezi weenu u zuweka. ² Sa nzi mu taveri yinu inkaanda ahulu, mi ve ni musandulwa che kushahazwa kwe ingana yenu.Mu chite ichi kwiziva chishiyeme,tambulwa, ne kusaka kwe Ireza kulyitikaneere. ³ Mukuti ni cho, cheivaka lye isehuhazo e ni vahewa, kuti umwi ne umwi wiina mukati keenu sa nzi valyi naheneere hehulu kuzamba mu va lukeere.Kunzelyovulye, va lukeere ku nahana mwi inzira e shiyeme, siina vulyo Ireza mwa vaheri umwi ne umwi chilyikanyo chimwi che itumero. ⁴ Mukuti twiina twina vamweetu vangi mu muviri u mwina, mi ka hena inungu zonse zina musevezi u mwina. ⁵ Mu inzira e swana, uswe tulyi muviri u mwina mwa Kirisiti, mane tu unungu za vamwi kahavuhetu. ⁶ Twina inewo ziseyeneseyene kuya che isehuhazo e tu vahewa. Haiva enewo yo umwi voporofita, ka yi chitwa kuya chechikara che itumero yakwe. ⁷ Haiva enewo ye umwi kuchitira, ka chitire.Haiva umwi wina enewo ye kuruta, ka rute. ⁸ Haiva enewo ye umwi kukutaza, ka kutaze. Haiva enewo ye umwi kuha, ka yi chatahaza mukuwava.Haiva enewo ye umwi kuhitira, ka kuchitwa che kutokomera. Haiva enewo ye umwi ina mu ku tondeza inse, ka kuchitahazwa che vuitumero. ⁹ A chishemo che vulye kulyitumukanyo.Muvine icho chilyi chivilaala; mu wonderere he echo chishiyeme. ¹⁰ Kaha chishemo cha vakweetu-chiswisu, mu lyisune ko umwi ne umwi. ¹¹ Kaha kuwondesa, sa nzi mu lyehi. Kaha luhuho, mu twahalye.Kaha Simwine, mu mutendere. ¹² Musange mu kukola ku mwina naako kaha zikeza. Muve inkulonde mu matata enu.Mu zwirere ha kurapera. ¹³ Mu kopaneere mu vutoki vwa varumeri. Musake inzira zingi ze kushupa kutambula ¹⁴ Musehuhaze avo va mu kataza; musehuhaze mane sa nzi mu kuti. ¹⁵ Mu sange navo va sanga;mu lyire navo va lyira. ¹⁶ Mu ve ne ingaana e mwina ko umwi ne umwi.Sa nzi mu nahane mwi inzira ze kulyinyemuna, mi mutambulye vantu vena hanse. ¹⁷ Sanzi mu vezekeza vuvilaala cho vulaala.Mu chite zintu zi shiyeme mu menso a vantu vonse. ¹⁸ Haiva kuwolyeka, siina ahulu mu kwi ikalyire che enu, mu ne ikozo ku vantu onse. ¹⁹ Sa nzi mu lyi vusulukeza,vasunwa,mi mu he inzira ku vukalyi vwe Ireza. Mukuti ku ngolyetwa, '' kuvusulusekeza inji kwangu; ka ni ruwere,' kuwamba Simwine.'' '' ²⁰ Mi haiva chira chaako chifwirenzala, mu lyisike. Haiva u fwireinyota, mu he chinywiwa. Mukuti haiva ne u chita ichi, ko kunganya makala o mulyiro ha mutwi waakwe. ²¹ Sa nzi mu zundwa vuvilaala, mi mu zunde vuvilaala che kushiyama.