¹ Vakweetu, musiye kukaana che itumero mwa Simwiine Jeeso Keresete, Simwiine wo kuverenga, cho kusachita neenza vamwi vaantu. ² Chikuti muuntu winjira mu mukopano na zweete maseka e gauda ku matwi naa zwete neenza, hape cho kwiinjira muhumanehi yo zweete zizavalo ziina iikwe. ³ Mmi ho vona muuntu yo zweete zilotu chokuti, ''Wuuwe wikalye aaha hashiyeeme,'' mmi muhumanehi wumucho kuti, ''Wuuwe wu ziime hana, kapa ''Wiikalye haansi,'' ⁴ kamuliwatuli? Kaheena muvawatulyi ve inhuho zeenu imbilala? ⁵ Muteeke, Vaakweetu vasunitwa, Aa Ireeza kana ava salyi vahumanehi veyinu ikaanda kuti vave vahumi mwi itumero ne kuva vashwaana vo muvuso wo kwiiwulu vwa vasepisa va musuni? ⁶ Mmi muva nyaansa vahumanehi! Kaheena vahumi va milyatiriza? Kaheena avo va mikwiitira kuchikota? ⁷ Ka va mitukoolyi ne kusinya iizina lyi muvasupwa chaalyo? ⁸ Kana, chikuti, muchitahaza mulawo wo vusimwiine kuya che lyiinzwi, ''Wusune mwaako moona mulyisuni,'' muchiita neenza. ⁹ Mmi chikuti musalulula vamwi vaantu, muchita chivi, mane muwatulwa ne mulawo kuti mwiina chivi. ¹⁰ Wumwi ne wumwi yi wi chirira mulao woonse, cho kuchoola wuumwiina vulyo, wiina mulandu wo kuchoola mulao yoonse. ¹¹ Mukuti yo chokuti, ''Kaanzi wuchiti vuhuulye,'' hape avati, ''Kaanzi wihayi.'' Chikuti nosachiti vusaangu, mmi chikuti wihaya, wu luuta mulawo. ¹² Lyinu waaambe ne kuchita sina vana veeti ni vawatulwa cho mulawo wo kusumunuka. ¹³ Mukuti mulawo kawiina iinse kwavana vaseena iinse. Iinse zuunda ikatulo. ¹⁴ Muvolyerwaanzi, vakweetu, chikuti wumwi wuti niina itumero, naseena miteendo? Aa iyo itumero yiwoola kumuhaza? ¹⁵ Chikuti mwaako wo mukwaame kapa mukulwakazi kazweete neenza mane keena chaalya mweelyo izuva. ¹⁶ Mmi wuumwi weenu wucho kuti, ''Yeende chekozo, wutukutirwa mane wikute.'' Chikuti kovahi ziintu zishiyamere miviri, iitusonzi? ¹⁷ Chokuswana iitumero chovuhaayo, chiiseena miteendo, ifwiire. ¹⁸ Hamwi wumwi wuwoola kucho kuti, ''Wiina iitumero, Iime niina miteendo.'' Ni toondeza iitumero yaako yiseena miteendo, Iime mbunikutoondeza itumero yaangu che miteendo yaangu. ¹⁹ Wu zumina kuti Ireeza wumwiina; wu chita neenza. Mmi kulyi madimona a zumina vulyo, mane vachachalyika. ²⁰ Wu saka kwiiziva, muuntu ya seena maano, kuti iitumero iisena miteendo kayiina iituso? ²¹ A yisheetu Aburahama kana ava shiyamiswa che miteendo cho zwiisa mwaane Isaka chitavero ha kangalani? ²² Wu vweene kuti yitumero iva teendi che miteendo yaakwe, nekuti iitumero yaakwe yiva maninini. ²³ Lyiinzwi live zuzirikizwa kuti, ''Aburahama ava zumini Ireeza, mmi ava valyilwa kuti wushiyeeme,'' mmi nasumpwa kuti mulyikani we Ireeza. ²⁴ Muvone kuti miteendo ichita kuti muuntu a shiyamiswa, ising'i che iitumero vulyo. ²⁵ Cho kuswana naaye, Rahabu we ihuulye ava jolozwa che miteendo cho tambula vatumwa mane nava vooza che inzira yiingi? ²⁶ Mukuti mubiri chiwuseena luhuho wufwiire, kwiina vulyo iitumero chiyisena miteendo iifwiire.