¹ Mukuti wuunwe mwiizi, vakweetu, mukuti kwiiza kwetu wuuko kwenu kana avalyi vuholo. ² Kono, moona mumwiizi, nangati tuvasukuluki kukataanzi mane nitwa fwiiswa iinsoni kwa Filipo, tuva kolyete kwe Ireeza kuwamba naanwe che ivangelyi ye Ireeza cho kulyikalyika. ³ Mukuti kuruta kweetu ka kulyizingite ha mafosisa, kapa vuvilala, kapa kucheenga. ⁴ Mmi, moona mu tuva zuminiinwa ne Ireeza kusepahala mwi ivangelyi, mutucho, ising'i kusaangisa vaantu, kono Ireeza. Njeeye yo tatuva iinkulo zeetu. ⁵ Mukuti kana tuveeza ne maanzwi wo kuziyeza, mu mwiizi, kapa ku teendesa maanzi a wuungula iinkulo iinkaando - Ireeza mushupi weetu. ⁶ Naandi kusaka kuteembwa ne vaantu, kweenu kapa vamwi vaantu. ⁷ Ni tuva kuumbiri zikaando ni tulyi tu vaapositola va Kirisiti. Kono, tu vashiyeeme kweenu sina nyinaavana cho humbulyikiza vaane. ⁸ Chikwiina vulyo twiina irato kweenu. Tu vasaangi kulyi kawuhanyeza naanwe ising'i vulyo lyiinzwi lye Ireeza kono mane ne vuhalo vweetu. ⁹ Mukuti mu vaavi vovutokwa ahulu kweetu. Mmi musihupula, vaakweetu, mavote ne masukuluka eetu. Tuvalyi kuteenda masiku ne kukamwi kuti tusiye ku milyemena chitu ruta ivangelyi ye Ireeza. ¹⁰ Mu vashupi, ne Ireeza, kushiyama, ne kusanyanswa mbo vuhalo vweetu ku varumeri. ¹¹ Naaho mwiizi mu tuveena kuwumwi ne wuumwi weenu, iiri nje shaavana ne vaana vaakwe, ¹² kumikutaza ne ku mikozainkulo ne kumikutaza kuyeenda munzira zishiyeeme ze Ireeza, yo misumpira mu muvuso waakwe wuvereenga. ¹³ Chelyi ivaka tulyitumera kwe Ireeza iinako zoonse, kuti chinga mwa tambula mulayezo we Ireeza wumuvazuwi kweetu, muva wutambulyi ni wusalyi wo muuntu, kono vusakusima, niwulyi we Ireeza, wukweete kuteenda kweenu muzumina. ¹⁴ Wuunwe, vakweetu, mu valyikanisa ikereke ze Ireeza ziina mwa Judeya cha Kirisiti Jeeso. Mukuti naanwe muva sukuluki vulyo ne vaantu ve inkaanda yeenu, muvavachiti ku Majuta ¹⁵ vavehai Simwiine Jeeso ne vaporofita, vava tuhindiki. Ka vasangisa Ireeza. Kono, veena lunya ku vaantu voonse. ¹⁶ Vava tuviindi kuwamba ne Venkaanda kuti naavo vahazwa. Vukaavo nkokuti iinako zoonse vaweera zivi zaavo. MMi vukaavo kavu vawiire ku mamanimani. ¹⁷ Mmi wuuswe, vakweetu, tuva zwiisizwa mweenu munnakozana, cho muviri ising'i inkulo. ¹⁸ Tuva lyikayerere kwiiza kweenu - sihulu Iime, Pawulusi, ni valyiki hape - mmi Satani cho kutu kangisa. ¹⁹ Isepiso ne kusaanga kweeti kapa iinkava yo kulyiteemba havusu vwa Simiine Jeeso che innako yo kwiiza kwaakwe? Kaheena wuunwe? ²⁰ Mukuti njowe mukuverenga ne kusaanga kweetu.