¹ Udi hio,Yesus nerau ke rueh belas murid E balalu ngami here kuasa nihi otoritas entu roh-roh jahat,nihi lei mat nyamare panyakit. ² Aye mengutus here mat memberitakan gene Kerajaan Allah palus memulihkan. ³ Eau E napot here,"ada nunda inon lei huang kian nu,ada nunda tungkeh,tas,roti,duit atawa rueh lambar lamma. ⁴ gi lewu awe lei kayo suluk,muneng bo ta aro hampe kayo tulak nekei uneng hio. ⁵ napot here sa bakoi kakan narime kayo,tanan bo kota hio balalu kibas bo abu e nekei pee nu jari pangingat nadap here." ⁶ udi hio tulak bo here rasul nihi bakaliling gi desa-desa nelang memberitakan injil balalu nyamare ulun-ulun maringin ta awe-awe."kebingungan Herodes gene Yesus ⁷ Herodes,isa raja wilayah,ngarengei gene kaluhan hal sa rahat jari balalu aye bingung tuu gene papire ulun ngantuh bahwa Yohanes Pembaptis haot buan tekei helang ulun matei, ⁸ rahat e sa lain ngeau bahwa Elia haot balua waleng,balalu naan lei sa ngeau bahwa isa tekei erang kulun nabi sa welum ta wayah sadi haot haot buan. ⁹ Herodes ngeau,"kuki haot netek ulu Yohanes.jari,hiekah ulun sa gene Aye kuki ngarengei kabar sa sameh hio iti?balalu,Herodes hamen tuu mat panalu Yesus."panguta mat gi dime ribu ulun. ¹⁰ Katika here Rasul waleng,here nyurah napot Yesus gene kaluhan hal sa haot na ulah here balalu Aye nunda here mat kakareb gi isa kota bangaran Betsaida. ¹¹ Tapi,ulun ajoh karasa hal hio balalu here lei nutah E.balalu,nelang nahalu here,Yesus bapander napot here gene Kerajaan Allah nihi lei here sa kakan na samare. ¹² Katika andrau mulai kamalem,ka rueh belas murid Yesus hawi napot Aye palus ngeau,"huyu bo ulun-ulun hio tulak gi tumpuk-tumpuk nihi pedesaan tangar iring iti mat nupui uneng bamalem namput panguta gene ta iti takam muneng ta uneng terpencil." ¹³ Tapi,Yesus ngeau nihi here,"kayo bo sa ngami here kuman."tuing murid-murid E,"kami ekat naan dime roti nihi rueh kenah,keculai amun kami tulak midi panguta mat gi kaluhan ulun iti." ¹⁴ Tangar hio naan kira-kira dime ribu ulun laki.Yesus ngeau napot murid-murid E,"huyu bo here maharung bakalompok,kira-kira dimem pulu ulun per kalompok." ¹⁵ Balalu,here lei ngulah susuk nihi sa na huyu Yesus balalu nuyu kaluhan ulun hio maharung. ¹⁶ Balalu,Yesus ngalap dime roti nihi rueh kenah hio,nadap gi langit,memberkati e, mepet-mepet e,balalu ngami e napot here murid mat here nyadia e napot ulun ajoh. ¹⁷ Balalu,here kaluhan kuman nampe wising.udi hio,tisai-tisai tetekan roti sa na kumpulkan naan rueh belas panuk penu."Petrus mengakui Yesus aye hio Kristus ¹⁸ ta isa katika,wayah Yesus rahat ba lako doa kakareb E,murid-murid E hayak Aye.balalu,Aye nane napot here,"hie kah Kuki iti manurut ulun ajoh?" ¹⁹ tuing here,"Yohanes pembaptis,sa lain ngantuh Elia,balalu sa lain lagi ngantuh Kayo aye hio isa tekei nabi-nabi wayah sadi sa buan waleng." ²⁰ Udi hio,Yesus ngeau napot here,"tapi,manurut nu,hiekah Kuki?" tuing Petrus,"Kayo aye hio Kristus tekei Allah." ²¹ Tapi,Yesus nampa ingat here nihi mehet balalu nuyu here mat bakoi mawara napot hie lei gene hal iti."Yesus mawara pampatei E ²² Udi hio Yesus ngeau,"Anak Murunsia harus rara ajoh hal balalu na tulak ulah tueh-tueh,imam-imam kapala,nihi ahli-ahli Taurat,balalu na wunu nihi sagar na tambuan tangar andrau katelu." ²³ Yesus ngeau napot here kaluhan,"amun erang kulun kakan nutah Kuki,Aye harus nulak areb e kakareb,balalu mikul salib e satiap andrau,balalu nutah Kuki. ²⁴ Gene,hie lei sa bausaha menyelamatkan nyawa e,sagar ka jawoh nyawa e.tapi,hie sa ka jawoh nyawa e gene Kuki,aye sagar nyalamat e. ²⁵ inonkah untung e amun erang kulun kiuh kaluhan dunia,tapi matei atawa kajawoh nyawa e kakareb? ²⁶ Napot ulun sa nginam mangan gene Kuki nihi paneranKu,Anaka Murunsia lei sagar mangan mangaku ulun hio katika Aye hawi huang Kemuliaan E nihi kemuliaan Amah E,nihi here malaikat kudus. ²⁷ Kuki mawara sa sabujue e napot kayo,naan papire ulun ta helang sa mindri ta ini sa ba bakoi sagar matei sa mete ngini Kerajaan Allah."Yesus hayak Musa nihi Elia ²⁸ Kira-kira,8 andrau udi Yesus nampe pengajaran E hio,Aye nunda Petrus,Yohanes,nihi Yakobus mambai gi gunung mat lako doa. ²⁹ Katika Yesus rahat lako doa,rai E baubah nihi lamma E jari mahilak ba kilauan. ³⁰ Udi hio,tena lah rueh ulun rahat bapander nihi Aye.karueh ulun hio aye hio Musa nihi Elia, ³¹ sa nyantena areb e huang kemuliaan nihi bapander gene pampatei Yesus sa sagar hinang na tampa genep ta Yerusalem. ³² Ta wayah hio,Petrus nihi hengau-hengau e rahat na kuasai ulah sa ruru sa mehet,tapi katika here bujur-bujur ta sadar,here ngini kemuliaan Yesus nihi rueh ulun sa mindri hayak-hayak nihi Aye. ³³ Katika Musa nihi Elia sagar nanan Yesus,Petrus ngeau,"Guru,maeh bo takam tatap tangar iti.kami sagar na pindri telu kemah,isa gi Kayo,isa mat gi Musa,balalu isa mat gi Elia."tapi,Petrus bakoi sadar inon sa na antuh e hio. ³⁴ Katika Petrus rahat ngantuh hal hio,hawilah awan nyanungen here hampe Petrus,Yohanes nihi Yakobus jari takut katika here suluk gi huang awan hio. ³⁵ Udi hio,karengei lah lengan tekei awan hio,"itilah Anak-Ku,Ayelah sa na pidi Ku,rengei bo Aye." ³⁶ udi hio lengan hio tadoh,Yesus ekat kakareb E.here ngarahasia kan e nihi bakoi mawara erang kulun lei ta andrau-andrau hio gene inon sa haot na inni here."erang kulun nakia laki na bebaskan tekei Roh jahat ³⁷ Mat gi katuni andrau e,katika here minau tekei gunung,sa rombongan hante ulun ajoh hawi napot Yesus. ³⁸ erang kulun tekei ulun ajoh hio kamiak,"Guru,kuki lako napot Kayo,suwuk bo anakku gene aye isa-isa e anakku. ³⁹ Inni bo,naan roh sa menguasai e,balalu salenga aye kamiak kamakai.roh hio ngagunsang-gunsang aye hampe wawa e babusa,roh hio nampa hanang aye tarus nihi bakoi hakun nanan aye. ⁴⁰ Kuki haot ngalako napot murid-murid Nu mat nulak e,tapi here bakoi kiuh ngagawi e." ⁴¹ Tuing Yesus,"Ui,kaon turunan sa bakoi harap nihi tawang!pire kalawah lagi Kuki harus muneng hayak kaon nihi sabar napot kayo?tunda bo nakia hio gi iti." ⁴² Katika nakia hio rahat ngariet napot Yesus,roh jahat hio mambanting e gi tane nelang ngagunsang-gunsang e.tapi,Yesus nyampengar roh najis hio,nyamare nakia laki hio,balalu nyampudi e napot amah e."Yesus mawara pampatei E ⁴³ Kaluhan ulun waoh entu kuasa Allah,tapi katika here magun dodor-dodor napot kaluhan hal sa na ulah Yesus,Aye ngeau napot murid-murid E, ⁴⁴ "rengei bo antuhan iti maeh-maeh:Anak Murunsia sagar na sarah gi tangan murunsia." ⁴⁵ Tapi,here murid bakoi mamaham aheng paneran hio,balalu hal hio na siok napot here hampe here bakoi kiuh mamaham e.tapi,here takut nane napot Yesus gene arti paneran hio."Hie kah sa panga dahulu? ⁴⁶ Isa katika,jari kalakat tangar helang murid-murid Yesus gene hie sa panga dahulu ta helang here. ⁴⁷ Tapi,Yesus karasa aheng atei here,balalu Aye ngalap erang kulun nakia halus balalu nunda e mindri tangar iring Aye. ⁴⁸ Balalu,Aye ngeau napot murid-murid,"Satiap ulun sa narime nakia halus iti huang aran Ku,aye narime Kuki.Balalu,hie lei sa narime Kuki,aye lei narime Aye sa mengutus Kuki.gene,sa panga hina ta helang kayo,aye lah sa panga dahulu."Tuhi sa sameh ⁴⁹ Yohanes nuing E balalu ngeau,"Guru,kami nginni erang kulun nulak roh jahat huang aran Nu balalu kami ba usaha nyantadoh e gene aye bakoi tekei kelompok takam." ⁵⁰ Tapi,Yesus ngeau napot aye,"ada nyantadoh e gene hie lei sa bakoi nawan kayo,aye naan ta tuhi nu."Yesus na tulak ta Samaria ⁵¹ Katika wayah e magin riet mat gi Yesus na tamap entu,Aye nampa kuat atei E mat tulak gi Yerusalem. ⁵² Aye nuyu papire utusan ngadahulu Aye.balalu,utusan-utusan hio lei tulak balalu suluk gi isa ka wua tumpuk tangar daerah Samaria mat manyiap kaluhan e gi Aye. ⁵³ Tapi,ulun-ulun ta uneng hio bakoi narime Yesus gene Aye rahat nuju gi kota Yerusalem. ⁵⁴ Katika murid-murid Yesus,aye hio Yakobus nihi Yohanes,nginni hal iti,here ngeau,"Tuhan,inonkah Kayo ngakan kami mat nuyu apui minau tekei langit balalu nutung here? ⁵⁵ Tapi,Yesus ngulik gi lutuk balalu nyompo here. ⁵⁶ Balalu,Yesus nihi murid-murid E tulak gi tumpuk sa lain."Tantangan napot Panutah Yesus ⁵⁷ Katika here rahat huang kiaan,naan erang kulun ngeau napot Yesus,"Kuki sagar nutah Kayo gi awe lei Kayo tulak." ⁵⁸ Yesus lei ngeau napot aye,"rubah naan tolong mat uneng muneng balalu wurung-wurung ta udara naan sarang e.Tapi, anak murunsia bakoi naan uneng mat gi istirahat.' ⁵⁹ Yesus ngeau napot sa lain,"tutah bo Kuki!"tapi,ulun hio ngeau,"Tuhan ijin bo dulu e kuki tulak ngogang amah ku dulu e." ⁶⁰ Tapi,Yesus ngeau napot aye,"elah bo ulun matei ngogang ulun matei here,tapi kayo harus tulak memberitakan Kerajaan Allah." ⁶¹ Balalu,naan erang kulun lagi ngeau,"kuki sagar nutah Kayo,Tuhan,tapi ijin bo kuki mawara dulu nihi babuhan ku." ⁶² Yesus ngeau napot aye,"bakoi naan erang kulun lei sa haot ngandak tangan e ta entu bajak,tapi ngulik lagi gi lutuk,sa pas napot Kerajaan Allah."